АҚШ-тағы инфляция, Франциядағы дағдарыс: осы аптада инвестор нені білуі керек
АҚШ-тағы инфляция жөніндегі мәліметтер осы аптада Уолл-стрит үшін шешуші факторға айналады. Бұл деректер АҚШ Федералдық резерв жүйесінің 17 қыркүйекке жоспарланған пайыздық мөлшерлеме жөніндегі отырысы қарсаңында жарияланады, деп жазады The Wall Street Journal. Қор нарығы реттеуші қыркүйек айында мөлшерлемені қайтадан төмендетеді деп күтуде. Алайда монетарлық саясатты одан әрі жұмсарту қарқыны белгісіз күйінде қалып отыр, деп атап өтті басылым.
Еуропада инвесторлар Франция үкіметіне сенім вотумына дауыс беруге назар аударады. Бұл дауыс беру бюджет мәселесіне қатысты келіспеушіліктер аясында өтеді. Сонымен қатар, Еуропалық Орталық банктің пайыздық мөлшерлеме бойынша шешімі де маңызды болмақ. Азияда басты назар Қытайдан келетін макроэкономикалық деректерге аударылады.
Yahoo Finance-тың хабарлауынша осы аптадағы корпоративтік есептіліктер кестесі өткен аптамен салыстырғанда одан да аз болады. Негізгі назар — жасанды жады саласындағы алпауыт Oracle, Photoshop бағдарламасын жасаушы Adobe және АҚШ-тың ірі бөлшек саудагерлерінің бірі Kroger компанияларының қаржылық нәтижелеріне бағытталады. Barron's басылымы сондай-ақ 9 қыркүйекте өтетін Apple компаниясының таныстырылымына назар аударады. Бұл іс-шарада жаңа смартфондар желісі ұсынылады деп күтілуде және жаңартылған құрылғылар көрсетілуі мүмкін.
8 қыркүйек, дүйсенбі күні, бюджетке байланысты Франция үкіметіне сенім вотумына дауыс беру еуроаймақтағы облигациялар мен валюталар нарығы үшін негізгі оқиға болады. «Францияда дүйсенбі күні өтетін үкіметке сенім вотумы аптаның басында нарық динамикасына әсер ететін тонды белгілеп беруі мүмкін», — деп жазды Tickmill Group компаниясынан Патрик Маннелли өз клиенттеріне.
Қытайда тамыз айындағы экспорт деректері жарияланды. Бұл деректер АҚШ-пен арадағы сауда соғысының қытайлық экспорттаушыларға қалай әсер етіп жатқанын көрсетеді. ҚХР-дың Бас кеден басқармасының деректеріне сәйкес тамыз айында тауарлар экспорты жылдық есепте 4,4%-ға өсті, бұл ретте сарапшылар 5% өсімді болжайтын. Бұл көрсеткіш ақпан айынан бергі ең баяу өсім болды, деп жазады Trading Economics. 11 тамыз күні әлемнің екі ірі экономикасы сауда келіссөздерін жалғастыру үшін 90 күндік уақытша бітім жасады. Бұл келісімге сәйкес, АҚШ Қытай импортына 30%-дық, ал Қытай АҚШ тауарларына 10%-дық баж салығын енгізді. Алайда, екі елдің де бұл жағдайдан шығатын жол табуы қиын болып отыр, деп жазады Reuters.
9 қыркүйек, сейсенбі күні Apple компаниясы iPhone 17 жаңа модельдерін, соның ішінде ультражұқа iPhone 17 Air смартфонын таныстырады деп болжануда. Сонымен қатар, Apple Watch 11 смарт-сағаттары мен AirPods Pro 3 құлаққаптары да таныстырылуы мүмкін.
Сол күні GameStop, Oracle, Puig Brands, Rubrik, SailPoint және Synopsys компаниялары тоқсандық есептерін жариялайды.
10 қыркүйек, сәрсенбі күні АҚШ Еңбек статистикасы бюросы (BLS) тамыз айындағы өндірушілердің көтерме бағалары бойынша деректерді жариялайды. Бұл деректер тарифтердің өндіріс саласындағы инфляциялық қысымды күшейтіп жатқанын не күшейтпей жатқанын көрсетеді. Сарапшылардың орташа болжамы бойынша, өндірушілер бағасының индексі (PPI) жылдық көрсеткіште шілде айындағыдай 3,3%-ға өседі.
Қытайда тамыз айындағы тұтыну бағаларына қатысты деректер жарияланады. Бұл деректер дефляцияға қатысты алаңдаушылықты не растайды, не жоққа шығарады. HSBC мәліметінше, шошқа еті мен мұнай бағасының төмендеуі тамызда негізгі дефляциялық факторлар болған.
Chewy және Inditex компаниялары қаржылық есептерін ұсынады.
11 қыркүйек, бейсенбі күні BLS АҚШ-тағы тамыз айындағы инфляция бойынша деректерді жариялайды. Консенсус-болжамға сәйкес тұтыну бағалары индексі (CPI) жылдық есеппен 2,9%-ға өседі. Бұл шілде айындағы көрсеткіштен 0,2 пайыздық тармаққа жоғары. Азық-түлік пен энергия бағасын ескермейтін core CPI көрсеткіші Уолл-стрит сарапшыларының пікірінше, тамыз айында 3,1%-ға өсуі тиіс, бұл шілде айындағы деңгеймен бірдей.
Еуропалық орталық банк пайыздық мөлшерлеме бойынша шешім қабылдайды. Нарық қатысушылары реттеуші депозиттер бойынша мөлшерлемені 2% деңгейінде сақтайды деп сенімді. Сондықтан инвесторлар келесі айларда мөлшерлемелер өзгеруі мүмкін бе деген болжамдарға қатысты ишараларды іздейді. Бұл, әсіресе, АҚШ-тың жоғары баж салығы еврозона экономикасына төндіретін қауіптер аясында маңызды, деп жазады WSJ.
Түркия Орталық банкі де пайыздық мөлшерлеме бойынша шешімін жариялайды. Инвесторлар мөлшерлеменің 2 пайыздық пунктке төмендеп, 41%-ға жету ықтималдығын 85% деп бағалайды. Шілде айында өткен алдыңғы отырыста Түркия Орталық банкі наурыздан бергі алғашқы рет мөлшерлемені бірден 3 пайыздық пунктке төмендеткен болатын, бұл нарық күткеннен де жоғары болды.
Adobe және Kroger компаниялары өткен тоқсанға қатысты қаржылық нәтижелерін жариялайды.
12 қыркүйек, жұма күні Мичиган университеті АҚШ-тағы қыркүйек айына арналған тұтынушылар сенімі индексін ұсынады. Сарапшылар болжамы бойынша көрсеткіш 59,3 тармақ деңгейінде болады, бұл тамыз айындағыдан бір тармаққа жоғары, бірақ тарихи деңгейлерден әлдеқайда төмен.
