АҚШ-тағы жұмыстан қысқартулар туралы дерек қор нарығын құлатты
Challenger, Gray & Christmas консалтинг компаниясы жариялаған АҚШ-тағы жұмыстан босату туралы есеп қор нарығына кері әсер етті. 6 қарашада сауда кезінде S&P 500 индексі 1,2%-ға төмендеп, кейін сәл түзеліп, мақала жарияланған сәтте 0,9%-ға теріс аймақта тұрды. Dow Jones Industrial Average индексі 0,8%-ға азайды, ал технологиялық Nasdaq Composite бірден 1,5%-ға құлдырады. Сауда барысында бұл көрсеткіш 2%-ға дейін жетті.
Ұялы телефондарға арналған чиптер өндіретін Qualcomm акциялары, Уолл-стриттің күткенінен жоғары есепке қарамастан, 5%-ға арзандады. Кеше едәуір өскен жасанды интеллект чиптерін өндіруші Advanced Micro Devices (AMD) акциялары 7,5%-ға құлады. Әскери және азаматтық компанияларға арналған ЖИ шешімдерін жасаушы Palantir Technologies акциялары 6%-ға, бұлттық қызмет ұсынушы Oracle акциялары 3,5%-ға арзандады. Nvidia-ның бағасы да 3,6%-ға төмендеді.
Нарықты не алаңдатты?
Challenger, Gray & Christmas дерегінше, қазан айында АҚШ компаниялары 153 074 жұмыс орнын қысқартқан. Бұл — былтырғы осы аймен салыстырғанда үш есе көп және 2003 жылдан бергі ең жоғары қазан айындағы көрсеткіш. Ол кезде ұялы телефондардың таралуы еңбек нарығында ұқсас күйзеліс туғызған. Компания өкілі Энди Челленджердің айтуынша, бұл жолы қысқартуларға ЖИ арқылы автоматтандырудың артуы және шығындарды азайтуға деген ұмтылыс себеп болған. Ең көп қысқарту технология және логистика салаларында тіркелді.
Bloomberg агенттігі бұл деректерден кейін АҚШ Федералдық резерв жүйесінің (ФРЖ) желтоқсанда пайыздық мөлшерлемені төмендету ықтималдығы 60% деп бағаланғанын хабарлады.
Brown Brothers Harriman & Co. сарапшысы Элиас Хаддад Bloomberg-ке берген пікірінде:
«ФРЖ желтоқсанда мөлшерлемені тағы 25 базистік пунктке төмендетеді деп есептейміз. Себебі олардың қатаң саясаты еңбек нарығындағы әлсіздікті одан әрі тереңдетуі мүмкін», — деді.
Strategas сарапшысы Дон Рисмиллер де еңбек нарығы қазір тұрақты емес екенін айтты:
«Кейбір ФРЖ мүшелері желтоқсанда мөлшерлемені тағы да төмендету жөнінде нақты уәде беруге дайын емес. Бірақ еңбек нарығының әлсіреуі оларды бұл қадамға итермелеуі мүмкін», — деді ол.
