Алғаш рет платина бағасы 2300 доллардан асты
Платинаның бағасы тарихи ең жоғары деңгейге жетіп, бір унциясы алғаш рет 2300 доллардан асты. Бұған ұсыныстың шектеулі болуы және қарыз алу құнының тарихи тұрғыда жоғары деңгейде қалуы себеп болып отыр, деп жазады Bloomberg. Агенттіктің мәліметінше, сәрсенбі күні металл қатарынан оныншы сауда сессиясында қымбаттаған. Бұл 2017 жылдан бергі ең ұзақ өсу кезеңі.
2025 жылы платина бағасы жалпы алғанда 150%-дан астам өсті. Бұл Bloomberg дерек жинай бастаған 1987 жылдан бергі ең күшті жылдық өсім болды.
Не болып жатыр?
Бағаның күрт өсуі Лондон металл нарығындағы жағдайдың күрделенуімен байланысты. Bloomberg мәліметінше, банктер сауда баждарына қатысты тәуекелдерден сақтану үшін металды АҚШ-та орналастырып жатыр. Қазір АҚШ қоймаларында 600 мың унциядан астам платина жиналған, бұл әдеттегі деңгейден едәуір жоғары, деп жазады агенттік.
Биыл Қытайға жеткізілім жоғары деңгейде қалып отыр. Сонымен қатар Гуанчжоу фьючерстер биржасында платина келісімшарттары саудалана бастағаннан кейін сұранысқа қатысты оптимизм күшейді, деп хабарлайды Bloomberg. Аталған алаңдағы бағалар басқа халықаралық бағдарлардан айтарлықтай жоғары көтерілген.
Оңтүстік Африкадағы жеткізілімнің үзілуі қосымша қысым тудырып отыр. Соның салдарынан платина ұсыныс тапшылығына үшінші жыл қатарынан ұшырап отыр. Бұған қоса, қарыз алу құнының жоғары болуы химия, шыны және зертханалық өнімдерде металл пайдаланатын өнеркәсіп тұтынушыларының жұмысын қиындатып отыр. Осы себепті олар платинаны тікелей сатып алудан гөрі лизингке алуды жиі таңдай бастады.
Бұған дейін алтын мен күміс те тарихи ең жоғары бағаларын жаңартқан еді. Алтынның спот бағасы бір унциясы үшін 4525,77 долларға жетті. Жыл басынан бері металл шамамен 70% қымбаттап, 1979 жылдан бергі ең жақсы жылдық көрсеткішке жақындады. Ол кезде бағаның күрт өсуіне мұнай дағдарысы мен Ирандағы Ислам революциясы әсер еткен болатын.
