Amazon 2025 жылы Big Tech компаниялары арасында басты аутсайдерге айналды
Amazon акциялары 2025 жылы «Ғажайып жетілік» (Magnificent Seven) құрамындағы ең нашар көрсеткішке ие болды және аутсайдер позициясынан Apple-ды ығыстырды. Жыл басынан бері Amazon акциялары 1%-ға да жетпейтін өсім көрсетті. Бұған инвесторлардың Amazon Web Services (AWS) бұлтты бизнесінің болашағына күмәнмен қарауы себеп болып отыр. Сонымен қатар, компанияның жасанды жады саласындағы нақты стратегиясының жоқтығы да қысым тудырып отыр. AWS нарық үлесі бойынша әлі де көшбасшы болып қалуда, алайда Microsoft Azure мен Google Cloud компанияларынан артықшылығы жылдам қысқарып келеді. Осындай жағдайда инвесторлар Amazon-ның үшінші тоқсандағы есебінен бұлтты бизнес өсімінің жеделдеуін күтуде.
Егжей-тегжейлі
23 қыркүйекте Amazon акциялары 3%-дан аса төмендеп, жыл басынан бергі бүкіл өсімді жойып жіберді. Компания акцияларының табыстылығы биыл тек 0,6%-ды құрады — бұл «Ғажайып жетілік» арасындағы ең нашар нәтиже. Бұған дейін бұл мәртебе Apple компаниясына тиесілі болатын, бірақ iPhone сату көлемінің артуына байланысты инвесторлардың сенімі күшейіп, Apple акциялары өсіп, Amazon-нан озып кетті, деп жазады MarketWatch.
Amazon-ның әлсіз динамикасы тек 2025 жылмен шектелмейді. Соңғы бес жылда компания акциялары небәрі 43%-ға өскен, ал сол кезеңде S&P 500 индексі 102%-ға артқан. Жылдық көрсеткішпен есептегенде Amazon үшін өсім 7,4%, ал S&P 500 үшін — 15,1%-ды құрайды. Бұл деректерді Dow Jones Market Data келтіреді.
Amazon неге аутсайдерге айналды
Mizuho аналитигі Джордан Кляйннің айтуынша инвесторлардың Amazon-ның жасанды жады бағытында нақты жол картасын ұсынбағанына көңілдері толмай отыр, деп жазады MarketWatch.
AWS бұлтты бөлімшесінің екінші тоқсандағы табысы 17,5%-ға артқанымен, бұл тек инвесторлардың күткен деңгейіне ғана сай келді, ал оны асыра алмады. Салыстырмалы түрде, Microsoft-тың бұлтты бизнесі 39%-ға, ал Alphabet 32%-ға өскен — бұл 2025 жылдың шілдесінде аяқталған тоқсан бойынша есеп. Екі компанияның нәтижелері де аналитиктердің болжамынан жоғары болды.
Бұған қоса, Amazon бас директоры Энди Джесси тоқсандық есеп беру кезінде AWS болашағына қатысты нақты бағдар бермей, инвесторларды белгісіздікке қалдырды, деп жазады MarketWatch. Джессидің айтуынша, AWS өсімін шектейтін негізгі мәселелер — электр қуатына қолжетімділіктің қиындығы, «чиптер мен сервер құрастыруға қажетті кей компоненттердің тапшылығы».
AWS нарықтағы үлесі бойынша әлі де ең ірі бұлтты қызмет жеткізуші болып табылады. Одан кейінгі орындарда Microsoft-тың Azure және Google Cloud тұр. Алайда Radio Free Mobile зерттеу компаниясының негізін қалаушы Ричард Уиндзордың пікірінше, AWS-тың бұл үстемдігіне жиі қауіп төнуде, әсіресе Azure тарапынан.
«Бұрын AWS Azure-ден бірнеше есе үлкен болатын, бірақ бұл күндер артта қалды. Егер Amazon баяулай берсе, ал Azure өсуді жалғастырса, бір уақытта Microsoft Amazon-ды басып озуы мүмкін», — деді Уиндзор.
Amazon-ның үшінші тоқсандық есебі нарықтағы компанияның қабылдануын өзгертуге мүмкіндік болуы мүмкін. Mizuho аналитигінің айтуынша, AWS өсімінің 20% шамасына дейін жеделдеуі инвесторлардағы алаңдаушылықты азайтатын маңызды белгі болар еді. Дегенмен, нақты анықтық болмауы да мүмкін: Джессидің айтуынша, мәселелерді шешу «бірнеше тоқсанға» созылуы ықтимал.
Аналитиктер не дейді
Өткен аптада Truist Securities Amazon акциялары бойынша «сатып алу» ұсынысын сақтап, мақсатты бағаны $250-ден $270-ге көтерді. Бұл бағалау акциялардың 22,3%-ға өсуін болжайды.
FactSet деректеріне сүйенсек, MarketScreener келтірген мәлімет бойынша Amazon акцияларына орташа рейтинг — «сатып алу», ал орташа мақсатты баға — $263. Бұл акциялардың 19,2%-ға өсу әлеуетін білдіреді.
