Apple акциялары құлдырап, Microsoft қайтадан әлемдегі ең қымбат компания атанды

Apple акцияларының құлдырауы Microsoft-ты қайтадан әлемдегі ең қымбат жария компания етті. АҚШ президенті Дональд Трамптың сауда саясатының нәтижесінде iPhone өндірушісі бір апта ішінде 25%-ға жуық құнсызданды. Apple компаниясының Қытайға тәуелділігі бизнесіне елеулі шығындар әкелсе, Microsoft осы белгісіздікке қарсы тұратын саладағы ең қорғалған компаниялардың бірі болып табылады.

Толығырақ

8 сәуірде Нью-Йоркте Microsoft акциялары 0,9%-ға арзандап, ал Apple акциялары 5%-ға құлдырады. Сауда қорытындысы бойынша Microsoft-тың нарықтық капитализациясы $2,64 трлн, ал Apple-дікі $2,59 трлн болды. 2024 жылдың басында Microsoft нарықтық құны бойынша әлемдегі ең ірі компания болды, бірақ кейін Apple қайтадан көшбасшылықты өзіне қайтарды. 2024 жылдан бастап екі компанияның капитализациясы негізінен $3 трлн деңгейінде тұрақтап тұрды, бірақ Трамптың баж салықтары пайда болғандықтан олар қатты арзандады. Соңғы төрт күндік сауда сессиясында iPhone өндірушісі 23%-ға жоғалтты, ал Nasdaq индексі осы уақытта 13%-ға құлдырады.

Сарапшылардың пікірі

Трамптың тарифтік жоспары жалпы нарыққа қысым көрсетсе де, Apple басқа технологиялық алпауыттардан көбірек зардап шекті, себебі компанияның смартфондарының басым бөлігі Қытайда өндіріледі. Қытайға тәуелділік пен компоненттердің қымбаттауы өнімнің бағасына әсер етуі мүмкін. UBS ірі швейцариялық банкі Apple-дің Қытайдан әкелінетін гаджеттері америкалық бөлшек саудада 30%-ға қымбаттайтынын ескертті, CNBC хабарлайды. iPhone-ды Азиядан АҚШ-қа көшіру жағдайында бұл смартфонның бағасы қазіргі $1000-дан  $3500-ге дейін жетуі мүмкін, дейді Wedbush аналитигі Дэн Айвз.

Microsoft осы жылдың қаңтарында Уолл-стритті әлсіз кіріс болжамымен алаңдатты. Дегенмен өткен аптада Jefferies сарапшылары көптеген бағдарламалық жасақтама компанияларының акцияларына мақсатты бағаларын төмендеткенде Microsoft компаниясын тарифтерден және белгісіздіктен барынша  «қорғалған» компания деп атап өткен болатын.