Apple үш күнде $640 млрд жоғалтты — Трамптың баж салығы әсер етті

Соңғы үш күнде iPhone өндіруші Apple компаниясының акциялары 19%-ға арзандады. Бұған АҚШ президенті Дональд Трамптың Қытайдан әкелінетін тауарларға 54% баж салығын енгізуі себеп болды. Apple өнімдерінің көп бөлігі Қытайда жасалатындықтан, бұл компанияға тікелей әсер етті. Нарықта бағасы $1200 тұратын топ iPhone енді 30%-ға қымбаттауы мүмкін.

Толығырақ

Apple акциялары үш күнде 19%-ға арзандап, компания нарықтық құны бойынша $638 млрд жоғалтты. Қазір Apple-дің жалпы капитализациясы $2,7 трлн-ды құрап отыр. Ал 2024 жылғы 10 шілдеде бұл көрсеткіш алғаш рет $3,5 трлн-ға жеткен еді.

Ірі технологиялық компаниялар арасында Apple ең қиын кезеңді бастан өткеріп жатыр. 7 сәуір күнгі саудада «Керемет жетілік» деп аталатын техногиганттардың ішінде тек Apple, Microsoft және Tesla акциялары ғана минусқа кетті. Apple акциялары күн ішінде 7,3%-ға дейін төмендеді, ал сессияны $181,5 деңгейінде — мамыр айынан бергі ең төменгі бағада — 3,7% төмендеп аяқтады.

Акциялар неліктен құлдырап жатыр

CNBC жазуынша сарапшылар Apple-ді сауда соғысы жағдайында ең осал компаниялардың бірі деп есептейді. Себебі компания Қытайдағы өндіріс пен жеткізілімге қатты тәуелді. 9 сәуірден бастап бұл елден әкелінетін тауарларға 54% баж салығы салынады. Apple-дің бірқатар өндірісі Үндістан, Вьетнам және Таиландта орналасқан, алайда бұл елдерден келетін тауарларға да жоғары тарифтер қолданылады.

UBS есебінше топ модельдегі iPhone бағасы $350-ға, яғни қазіргі $1200-ден 30%-ға қымбаттауы мүмкін. Barclays сарапшысы Тим Лонгтың пікірінше Apple шынымен де бағаны көтеруі мүмкін, әйтпесе акцияға шаққандағы табыс 15%-ға қысқарады. Балама ретінде — компания жеткізу тізбегін өзгертіп, тауарларды төмен тарифті елдер арқылы жеткізуі мүмкін.

Apple бұл жағдайға қатысты CNBC-ге түсініктеме беруден бас тартты.

Баффет дұрыс болжам жасаған

Атақты инвестор Уоррен Баффет басқаратын Berkshire Hathaway қоры 2024 жылы Apple акцияларын белсенді түрде сатқан. Қазір оның портфелінде 300 млн ғана Apple акциясы қалған, бұл компанияның барлық акциясының 2%-ын құрайды. Сарапшылар бұл шешімді өте сәтті деп бағалап отыр.

Сарапшылар пікірі

Wedbush сарапшысы Дэн Айвз Apple акциясының бағасын $325-тен $250-ге дейін төмендетті. Оның айтуынша, компанияның 90% өнімін Қытайда өндіруі оған үлкен қауіп төндіреді. Басқа елдерде өндірісті көбейтуге уақыт пен көп қаражат қажет.

Apple бұрын «қауіпсіз» актив деп саналатын. Бірақ қазір бұл көзқарас өзгеріп жатыр. Компания акциялары жыл басынан бері 25%-ға арзандады. Аналитиктердің орташа болжамы бойынша, акция бағасы $249,7 болуы мүмкін — бұл қазіргі бағадан 37% жоғары. Бірақ болашақта бәрі сауда саясатына байланысты болады.