Бүкіл ЖИ-бенефициарынан мықты есеп: Уолл-стрит шағын компанияны не үшін жақсы көреді?
ЖИ-серверіне арналған байланыс интерфейстерін әзірлейтін Credo Technology Group компаниясының акциясы мықты тоқсандық есеп жарияланғаннан кейін 13%-дан астамға күрт өсті. Amazon, Microsoft пен Масктың xAI-ы клиенті болған бұл компания ЖИ-бумның бенефициары, деген сенімде сарапшылар.
Егжей-тегжейлі
4 қыркүйектегі саудада Credo акциясы бір сәтте 13% өсіп, рекордтық $141 болды, кейін өсімі 10%-ға дейін баяулады. Жыл басынан бері қағаз 105% қымбаттады, ал 2022 жылғы ақпанда биржаға шыққалы бері 1000%-нан асты.
Credo жоғары жылдамдықтағы деректерді беру шешімін әзірлейді. Компания энергия тиімді байланыс интерфейстеріне маманданған, олар деректерді өңдеу орталықтарында, соның ішінде жасанды интеллект инфрақұрылымында ерекше сұранысқа ие. Өнім түріне қарай Credo-ның бәсекелестері Broadcom, Marvell, Astera Labs, Intel және Cisco.
Неге қымбаттады акция?
4 қыркүйектегі раллиге шілдеде аяқталған 2026 қаржы жылының бірінші тоқсанына шыққан есеп себеп болды. Компанияның табысы өткен жылдың осы кезеңімен салыстырғанда 274% өсіп, $223,1 млн болды. FactSet дерегінше, сарапшылардың күткен орташа бағалауы $190,6 млн еді. Түзетілген пайда $0,52 болып, консенсус-прогноздағы $0,36-дан жоғары шықты, деп жазады Barron’s.
Компанияның ағымдағы тоқсанға болжамы да мықты болды: Credo шамамен $235 млн табыс күтуде, ал сарапшылардың орташа бағалауы $201,9 млн-ды құрайды.
Credo бас директоры Билл Бреннан: «Компания өсімі гиперскейлерлермен және негізгі клиенттермен терең стратегиялық серіктестік арқылы қамтамасыз етілді. Нарықта сенімді әрі энергия үнемдейтін шешімдерге сұраныс артып отырғанын ескерсек, біз табыстың әрі қарай өсуін және әртараптануын күтеміз», — деді. Ол Barron’s-қа берген сұхбатында АҚШ-тың алты ірі гиперскейлерімен жаңа келісімшарттар жасауға үлкен әлеует бар екенін атап өтті.
BofA не дейді?
Bank of America пікірінше, Credo Technology бүкіл ЖИ-бенефициарының ішінде, соның ішінде Nvidia-ны қоса алғанда, ең мықты қаржылық нәтижелерді көрсетті. Инвестбанк сарапшылары Вивек Арьяның жетекшілігімен компания акциясына «сатып алу» рейтингін растады және мақсатты бағаны $120-дан $165-ке көтерді. Бұл — сәрсенбі күнгі жабылу бағасынан 32% жоғары.
Арья әсіресе AEC-кабельдер (активті электр кабельдері) өндірісін жоғары бағалайды. Дәл осы технологияны Credo жасап шығарған: ол ЖИ-серверлерді желілік коммутаторларға қосу үшін қолданылады. Бұл кабельдер оптикалық талшыққа қарағанда сенімдірек, аз энергия тұтынады және дәстүрлі пассивті мыс кабельдеріне қарағанда қашықтықта да қолданыла алады. 650 Group дерегінше, AEC нарығындағы Credo үлесі 73%-ды құрайды, деп жазады Barron’s.
BofA болжамы бойынша, гиперскейлерлердің технологияларды жедел енгізуі арқасында 2027–2028 жылдарға қарай AEC-кабельдер нарығы екі есеге өсіп, $2 млрд-қа жетуі мүмкін. Бұл $15 млрд көлеміндегі оптикалық трансиверлер нарығының небәрі 10–15%-ы ғана болмақ. Кабельдерден бөлек, Credo дата-орталықтарда қолданылатын оптикалық модульдер мен деректерді беру чиптерін де әзірлейді.
«Біз Credo-ға «сатып алу» ұсынысын растаймыз. Ол орта капитализациялы компаниялар арасындағы ең үздік акцияның бірі әрі біздің ЖИ-бенефициары бойынша топ-4 тізімдегі (Nvidia, Broadcom және AMD-пен бірге) негізгі позициямыздың бірі», — деді Арья CNBC келтірген есебінде.
Сарапшы Credo-ның клиенттік базасын әртараптандырып жатқанын атап өтті: компания Amazon, xAI және Microsoft-тан бөлек төртінші гиперскейлерді қосып үлгерді және оптика саласындағы өнім портфелін кеңейтіп жатыр.
«AEC пен оптикалық бизнес ауқымданған сайын, біз операциялық тиімділіктің әрі қарай өсуін көреміз. Ал жоғары жылдамдықтарға (1.6T/3.2T) көшу маржаны одан әрі арттыруы мүмкін», — деп қосты ол.
Арья Credo-ның Broadcom, Astera Labs және Marvell Technology секілді ірі ойыншылар бар оптикалық жүйелер нарығында белсенді бәсекеге кірісіп жатқанын атап өтті. Сонымен қатар ол акциялардың жоғары бағалануы тәуекел екенін мойындады, бірақ компанияға қатысты сенімсіздік білдірмей, басшылықтың сақ болжамдары арқасында сенімін сақтап отырғанын жеткізді.
Басқа да сарапшылар пікірі
«Мұндай есептен артық нәрсе күту қиын, — деп жазды TD Cowen сарапшысы Джошуа Бухальтер клиенттерге арналған жазбасында. — Credo деректер орталықтарындағы деректер көлемінің экспоненциалды өсуінен ұтып отыр… Біз компанияның өсу тарихының енді ғана басталғанына сенеміз».
Mizuho сауда бөлімінің сарапшысы Джордан Кляйн Credo-ны «ЖИ саласындағы ең үздік оқиғалардың бірі» деп атап, ол «уақыт өткен сайын тек жақсарып бара жатыр» деді, деп жазады MarketWatch. Кляйннің айтуынша, компанияға қатысты күтілімдер «технология, медиа және телекоммуникация секторының ішіндегі ең жоғарысының бірі болғанына қарамастан», Credo Уолл-стрит болжамдарын асыра орындады. Ол сондай-ақ күшті болжамның арқасында компания акциясына деген қызығушылық алдағы ағымдағы тоқсанда одан әрі арта түсетінін қосты.
Mizuho сарапшылары валдық маржаның 65% деңгейінде жоғары екенін атап өтіп, Credo-ны SerDes-технологияларындағы интеллектуалдық меншікке ие болу арқылы бәсекелестік артықшылығы бар тартымды компания деп сипаттады. Бұл технология чиптердің ішінде және олардың арасында жоғары жылдамдықты деректер беруді қамтамасыз етеді. Сарапшылардың пікірінше, мұндай артықшылық деректер орталығының толық иелену құнын (TCO) бәсекелестермен салыстырғанда айтарлықтай азайта алады. Mizuho бағалауы бойынша, SerDes IP нарығының әлеуетті көлемі Credo-ның AEC өнімдерінен жылдық шамамен $650 млн құрайтын табысының 15 есесіне дейін жетуі мүмкін.
MarketWatch дерегінше, Credo акциясын барлығы 12 сарапшы қадағалайды: олардың 10-ы сатып алуды (Buy), ал екеуі портфельде ұстауды (Hold) ұсынады. Уолл-стриттің консенсус бағасы $135,25, бұл сәрсенбі күнгі жабылу бағасынан 8% жоғары.
