Baird сирек металдар өндіретін жаңа компанияны сатып алуға кеңес берді
Baird компаниясының сарапшысы АҚШ-қа Қытайдан тәуелділікті азайтуға көмектесетін Ramaco Resources акцияларын сатып алуға кеңес берді.
Бастапқыда Ramaco көмір өндірумен айналысқан, бірақ кейін жер қойнауынан сирек кездесетін металдардың кен орнын тауып, соңғы жетпіс жылдан астам уақыттан кейін елдегі алғашқы жаңа кен орнын игере бастады.
Жыл басынан бері компанияның акциялары шамамен 350% өсті.
Baird пікірінше, жақын арада компания басқа жергілікті өндірушілер сияқты АҚШ үкіметінен қолдау алуы мүмкін.
Егжей-тегжейі
Baird сарапшысы Бен Калло Ramaco Resources компаниясының акцияларын бақылауға алды. 2023 жылы Ramaco күтпеген жерден Brook Mine кен орнын тапқан болатын. Онда сирек кездесетін металдар көп мөлшерде бар.
Калло компания акцияларын сатып алуға кеңес беріп, мақсатты бағаны 63 доллар деп белгіледі. Бұл қазіргі деңгейден шамамен 28% өсім деген сөз.
Сарапшы Ramaco компаниясын 2030 жылға қарай EBITDA табысы 444 млн доллар болады деп болжайды. Ол компанияға жаңа кен орнында өндіріс көлемін ұлғайту үшін бірнеше жыл қажет екенін айтты.
Каллоның айтуынша, 2030 жылы Ramaco тұрақты өндіріс деңгейіне жетіп, Brook Mine әлеуетін толық пайдалана алады.
Қытайдың АҚШ-қа сирек металдарды экспорттауға шектеу қою қаупінен кейін инвесторлар басқа жеткізушілерді іздей бастады. Бұл АҚШ-тағы өндіруші компаниялардың акцияларының қымбаттауына әкелді.
Каллоның пікірінше, Ramaco АҚШ билігінен де қолдау табады. Оның айтуынша, «үкімет пен сирек минерал өндірушілер арасында жаңа келісімдер жақын арада жасалуы мүмкін».
Компанияның ерекшелігі
Ramaco негізінен болат өнеркәсібіне арналған көмір өндіруімен танымал. Бірақ Қытайдағы артық өндіріске байланысты бұл салада қысым күшейген.
2023 жылы компания Вайоминг штатындағы өзіне тиесілі Brook Mine шахтасының астында сирек кездесетін элементтердің кен орны бар екенін анықтады.
Мамандардың бағалауынша, онда 1,7 млн тоннаға дейін металл оксидтері болуы мүмкін. Бұл кен орны — АҚШ-та соңғы жетпіс жылдан кейін ашылған алғашқы жаңа сирек металл кені.
2024 жылы Ramaco осы металдарды өңдейтін сынақ зауытын салады. Ол шамамен бір жыл жұмыс істеп, болашақ өндіріс зауытының көлемі мен форматын анықтайды.
Пайданың қанша болатыны және Ramaco жобаны толық өз қаржысымен жүзеге асыра ала ма — әзірге белгісіз.
Компания басшысы Рэнделл Аткинс көмір сатудан түскен табыс шығындарды азайтып, минерал өндірудің өзіндік құнын төмендетуге мүмкіндік беретінін айтты.
«Brook Mine сирек кездесетін элементтер мен маңызды минералдардың тапшылығын азайтуға көмектеседі. Ұлттық қауіпсіздік тұрғысынан бізге енді өз кенімізді Қытайға немесе басқа елдерге өңдеуге жіберудің қажеті болмайды», - деді Рэнделл Аткинс .
Оның есебі бойынша, кен орнында жылына 1400 тоннадай металл өндіруге болады.
Акциялар жағдайы
16 қазанда Ramaco акцияларының бағасы 49 доллар болды. Ал қазан айының басында, Қытай жаңа шектеу қоямыз деп ескерту жасағанға дейін, олар 34 доллардан төмен еді.
Жыл басынан бері компанияның акциялары 350%-ға жуық қымбаттады.
Дегенмен, 17 қазандағы саудада бағасы 5,3%-ға төмендеді.
FactSet дерегінше, Ramaco акцияларын жеті сарапшы бақылайды және барлығы «сатып алуға» кеңес береді. Орташа мақсатты баға қазіргі деңгейге жуық, бірақ акциялар тым тез өсіп жатқандықтан, аналитиктер болжамдарын жаңарта алмай жатыр. Каллоның 63 долларлық бағасы — Уолл-стриттегі ең жоғарысы.
Контекст
Қазір АҚШ-та сирек кездесетін элементтерді өндіретін және өңдейтін тек бір кәсіпорын бар. Ол — Калифорниядағы Mountain Pass.
Бұл кәсіпорынға MP Materials компаниясы иелік етеді. Оған АҚШ Қорғаныс министрлігі 35 млн доллар бөлген. Бұл қаржы зауыт салуға бағытталған.
Мемлекет пен MP Materials арасындағы келісім негізгі өнімдерге төменгі баға кепілдігін қамтиды, бұл компания акцияларының бағасын жыл басынан бері 437%-ға көтерді.
Калло MP Materials акцияларын да бақылайды. Ол олардың құнын 2030 жылға дейінгі болжамды EBITDA-ға сүйене отырып, 80 доллар деп бағалайды. Бұл қазіргі деңгейден шамамен 3,6%-ға төмен.
