«Баламасы жоқ»: Needham үшін Reddit 2026 жылдың фавориті
Needham & Company
Reddit-тің бас компаниясы акциясын 2026 жылға арналған басты инвестициялық идея
деді және бағасы 25%-дан астам өседі деп күтеді. Сарапшылар жоғары әлеуетті
жарнама табысының ұзақ мерзімді өсуінен және ЖИ компанияларымен лицензиялық келісімдерден
көріп отыр.
Егжей-тегжейлі
Needham & Company
инвестбанкінің сарапшысы Лора Мартин Reddit акциясын 2026 жылдың басты идеясы
деп атап, сатып алу жөнінде рейтингін растады. Сондай-ақ, ол бір акцияға
мақсатты бағаны $300 деңгейінде қалдырды, бұл шамамен 28,7% өсім білдіреді.
Barron’s келтірген инвесторларға арналған жазбасында Мартин Reddit табысының
серпінді динамикасын, сондай-ақ форумдардың ауқымды мұрағаты жасанды интеллект
жүйелерін әзірлеушілер үшін құнды дереккөз екенін атап өтті.
22 желтоқсан,
дүйсенбідегі сауда жабылуында Reddit акциясы $233 болып, жыл басынан бері 43%
өсім көрсетті. Алайда 18 қыркүйекте тіркелген тарихи максимум — $270,7
деңгейінен кейін котировка айтарлықтай өзгерген жоқ. Қазанның соңында
жарияланған үшінші тоқсан бойынша мықты есеп те өсім трендін бекітуге
көмектеспеді, деді Barron’s. Сейсенбі күні компания акциясы 2,1% арзандады.
Needham неге Reddit-ке ставка жасап отыр?
Мартиннің айтуынша, Reddit жарнамалық табыстың өсу қарқыны бойынша TikTok, X және Facebook сияқты бәсекелестерінен алда. Бұл платформаның жарнама берушілер үшін жоғары тартымдылығымен, соның ішінде жас әрі белсенді аудиториясымен, жаңа жарнама құралдарымен және тар аяда маманданған қауымдастықтарымен байланысты.
«Жарнама агенттіктерімен байланыстарымыз көрсеткендей, клиенттер Reddit-тегі нишалық қауымдастықтарды, конверсиясы жоғары аудиторияны, өсіп келе жатқан пайдаланушылар базасын және ұзақ уақыттық тартылуды жоғары бағалайды», — деп жазды Needham сарапшысы.
2025 жылдың қорытындысы бойынша Reddit табысы 64% өсті — бұл Мартин қадағалайтын барлық компаниялар арасындағы ең жоғары көрсеткіш. Мұндай қарқын сақталмауы мүмкін болғанымен, инвестициялық банк 2027 қаржы жылынан бастап алдағы 10 жылда табыстың орташа жылдық өсімін 31,6% деңгейінде болжайды, деп жазды Barron’s.
Reddit ұзақ мерзімді әлеуеті оның ірі тілдік модельдер үшін маңызымен де байланысты. Alphabet пен ChatGPT әзірлеушісі OpenAI секілді компаниялар 16 млрд-тан астам пікірді қамтитын диалогтар мұрағатын пайдалану үшін Reddit-ке лицензиялық төлем жасайды. «Деректердің ауқымы мен сапасы бойынша Reddit-ке тең келетін балама жоқ, бұл компанияға шарт қоюға мүмкіндік береді, — деді сарапшы. — Уақыт өте келе Reddit деректері барлық генеративті ЖИ-модельдер үшін міндетті ресурсқа айналады деп санаймыз».
Needham бағалауынша, Google мен OpenAI қазірдің өзінде контентті лицензиялау үшін Reddit-ке жылына $100 млн-нан астам төлеп отыр. Егер компания өз материалдарын заңсыз пайдаланғаны үшін Anthropic пен Perplexity стартаптарына қарсы сот істерінде жеңіске жетсе, бұл сома екі есеге дейін өсуі мүмкін.
Басқа да сарапшылар пікірі
FactSet дерегінше, 29 сарапшы Reddit қағазын қадағалап отыр. Сатып алуға — 18, портфельде ұстауға — 10 сарапшы кеңес берді, ал сатуға — 1 ғана кеңес берілді. Уолл-стриттің консенсус бағасы — $250,4, бұл дүйсенбі күнгі жабылудан 7,4% жоғары.
Сонымен қатар, Reddit акциясының 14%-дан астамы қысқа позицияларда тұр, бұл Snap (6,5%) немесе Pinterest (3,3%) көрсеткішінен айтарлықтай жоғары, деп атап өтті Barron’s.
