Reddit акциялары күшті есептен кейін 19%-ға өсті. Қазір сатып алған дұрыс па?
31 қазанда Reddit әлеуметтік желісінің акциялары 19%-ға жуық қымбаттады. Бұған компания табысы екі еседен астам өсіп, Уолл-стриттің болжамдарынан асып түскені себеп болды. Сонымен қатар, Reddit бір акцияға шаққандағы табысын төрт есе арттырып, сарапшылар күткеннен де жоғары болжам берді.
Егжей-тегжейі
31 қазанда сауда барысында Reddit акцияларының бағасы $230,97-ге дейін көтерілді. Бұл — алдыңғы күнгі жабылу бағасынан 18,8% жоғары және 30 қыркүйектен бергі ең жоғары деңгей. Қазір акциялар 2025 жылдың басымен салыстырғанда шамамен 35%-ға қымбат.
Reddit-тің 30 қыркүйекте аяқталған тоқсандағы табысы 68%-ға өсіп, $585 млн болды. Bloomberg-тің сарапшылары $549 млн деп болжаған. Yahoo Finance осыны атап өтті.
Бір акцияға шаққандағы түзетілген пайда $0,8 болды. Бұл — былтырғы осы кезеңдегі $0,16 нәтижемен салыстырғанда төрт еседен астам жоғары. Reddit сол кезде алғаш рет биржаға шыққаннан кейін пайда жариялаған еді.
Компания тағы не айтты?
Күнделікті белсенді бірегей пайдаланушылар саны (DAU) 19%-ға өсіп, 116 млн-ға жетті. Бұл Bloomberg-тің 114 млн деген болжамынан жоғары. Дегенмен аудитория өсімінің баяулауы жалғасуда. Бұл кейбір сарапшыларды алаңдатып отыр, деп жазды Yahoo Finance. Reddit соңғы бес тоқсанда қатарынан өсім қарқынының төмендеуін тіркеді. Бұл көрсеткіш компания үшін өте маңызды, өйткені жарнама арқылы табыс табу мүмкіндігі осыған тікелей байланысты.
Үшінші тоқсанда трафиктің күткеннен жақсы болуы халықаралық аудиторияның артуымен байланысты. Reddit күнделікті 64,4 млн халықаралық қолданушыны тіркеді. Бұл болжамдағы 62,2 млн-нан көп. АҚШ-тағы пайдаланушылар саны 51,6 млн болды, бұл 51,9 млн болжамнан сәл төмен.
Компания төртінші тоқсанға қатысты да оптимистік болжам берді. Reddit бұл кезеңде $655–665 млн аралығында табыс күтеді. Бұл көрсеткіштің ең төменгі шегі де Уолл-стрит болжаған $636 млн-нан жоғары.
Операциялық табыстың көрсеткіші — түзетілген EBITDA $280 млн болады деп күтілуде. Бұл сарапшылар болжаған $258 млн-нан жоғары.
Сарапшылар не дейді?
Компания есебінен кейін, 31 қазанда Morgan Stanley Reddit акцияларының мақсатты бағасын $230-дан $250-ге дейін көтеріп, «сатып алу» ұсынымын (Overweight) сақтап қалды. Бұл бағалау 30 қазандағы жабылу бағасымен салыстырғанда 29% өсімді білдіреді.
Бұған дейін Deutsche Bank те Reddit акцияларының мақсатты бағасын $205-тен $245-ке көтеріп, «сатып алу» (Buy) ұсынымын растады. Бұл 26%-дық өсу потенциалын білдіреді.
Reddit-ті бақылайтын 30 сарапшының 18-і акцияны сатып алуға кеңес береді (Buy және Overweight), 10-ы бейтарап (Hold) пікірде, ал екеуі сатуға кеңес берген.
