Barrick Mining алтынның 55% қымбаттауынан кейін акционерлерге төлемдерді көбейтті
Әлемдегі ең ірі алтын өндіруші канадалық Barrick Mining компаниясы алтын өндірісінің жақсы нәтижелері мен бағаның өсуіне байланысты акционерлерге көбірек төлем жасау туралы шешім қабылдады. Компания акциялары 10 қараша күні сауда алдындағы сессияда 4%-ға өсті. Алтын жыл басынан бері 55%-дан астам қымбаттады.
Егжей-тегжейі
Barrick Mining Corp. тоқсан сайынғы дивидендті 25%-ға өсіріп, бір акцияға 12,5 цент төледі. Сонымен қатар өткен тоқсан қорытындысы бойынша қосымша 5 цент көлемінде «сыйақы» төлемі бекітілді.
Компанияның хабарлауынша, «ақша ағынының ерекше жоғары деңгейін» ескере отырып, директорлар кеңесі жыл басынан бері сатып алынған $1 млрд акцияға қоса тағы $500 млн көлемінде байбэк бағдарламасын мақұлдады. Үшінші тоқсанда компания 829 мың унция алтын өндіріп, 1,5 млрд доллар бос ақша ағынын тіркеді.
Уақытша бас директор Марк Хиллдің айтуынша, Barrick компаниясы тиімділікті арттыруға назар аударып отыр, деп жазады Bloomberg.
«Біз өндіріс нәтижелерін жақсартуға және акционерлердің табысын көбейтуге толық көңіл бөлдік, әсіресе Невада мен Доминикан Республикасындағы негізгі алтын активтерімізде. Барлық жұмыс процестеріне кешенді тексеру жүргізуді бастадық, осылайша жұмысымыздың тұрақты әрі қауіпсіз нәтиже беруін қамтамасыз етеміз», — деді Хилл.
Осы жаңалықтардан кейін компанияның акциялары 10 қараша күні сауда алдындағы сессияда 4,2%-ға өсті.
Алтын бағасы
Жыл басынан бері алтынның құны 55%-дан астам өсті. 10 қараша, дүйсенбі күні желтоқсан айындағы жеткізілімге арналған алтын фьючерстері 2,5%-ға қымбаттап, унциясы $4111-ге жетті — бұл соңғы екі аптадағы ең жоғары деңгей. АҚШ-тағы әлсіз макроэкономикалық деректер желтоқсандағы ФРЖ мөлшерлемесін төмендету күткенін арттырды, ал доллардың әлсіреуі алтын бағасына қосымша қолдау көрсетті, деп хабарлайды Reuters.
Challenger, Gray & Christmas компаниясының өткен аптада жариялаған деректеріне сәйкес, қазанда жеке секторда соңғы 22 жылдағы ең көп жұмыс қысқарту тіркелген. Сонымен қатар, қарашаның басында тұтынушылар сенімі индексі соңғы үш жарым жылдағы ең төмен деңгейге түсті. Бұл АҚШ үкіметінің ұзақ уақытқа жабылуынан туындаған алаңдаушылықты көрсетеді.
Reuters мәліметінше, алтын пайыздық табыс әкелмейтіндіктен, пайыздық мөлшерлеме төмендеген және экономикалық белгісіздік кезеңінде әдетте бағасы өседі.
Saxo Bank сарапшыларының пікірінше, «алтын алдағы 12 айда унциясына $5000 деңгейіне, ал күміс $65-қа жетуі мүмкін. Бірақ біз бағаның тез арада ең жоғары деңгейге қайта оралуына сақтықпен қараймыз».
