Morgan Stanley алтын бағасының өсуін жалғастырады деп сенеді. Бұл ралли тоқтай ма?
Morgan Stanley банкінің болжамынша, алтын бағасы рекордтық деңгейден аздап төмендегеннен кейін қайтадан өседі. Банк жаңа болжамында алтын келесі жылдың соңына дейін тағы 10%-ға қымбаттайды деп есептейді. Дегенмен сарапшылар АҚШ долларының нығаюы мен зергерлік бұйымдарға сұраныстың әлсіреуі бұл раллиді тежеуі мүмкін екенін ескертеді.
Егжей-тегжейі
Morgan Stanley бағалауынша, биыл алтын бағасы шамамен 55%-ға өсіп, әрі қарай да қымбаттай береді. Банк 2026 жылға арналған болжамын бір унция үшін $3313-тен $4400-ге дейін көтерді, бұл қазан айының басындағы деңгейден тағы шамамен 10% өсуді білдіреді.
«Инвесторлар алтынды тек инфляциядан қорғану құралы ретінде ғана емес, орталық банктердің іс-қимылдары мен геосаяси тәуекелдердің индикаторы ретінде де қарастырады. Біз алтын бағасының одан әрі көтерілуін күтеміз — бұған доллардың әлсіреуі, ETF қорларының белсенді сатып алуы, орталық банктердің резервтер жинауды жалғастыруы және белгісіздіктің жоғары деңгейі себеп болады», — деді Morgan Stanley-дің металл және тау-кен секторы бойынша стратегы Эми Гауэр.
Раллиге не кедергі келтіруі мүмкін?
Оптимистік болжамдарға қарамастан, Morgan Stanley алтын нарығындағы ралли белгілі бір кедергілерге тап болуы мүмкін екенін ескертеді. Егер АҚШ доллары күтілгеннен күшті болып қалса немесе Федералдық резерв жүйесі пайыздық мөлшерлемелерді қазіргі деңгейде ұстап тұрса, алтын бағасының өсу қарқыны бәсеңдеуі мүмкін.
«Бағаның шамадан тыс өсуі сұраныстың төмендеу қаупін тудырады. Мысалы, алтын қымбаттаған сайын орталық банктер мақсатты резерв көлеміне жету үшін аз сатып алады», — дейді Эми Гауэр.
Тағы бір тежеуші фактор — зергерлік бұйымдарға деген сұраныстың азаюы. Бұл сегмент әлемдік алтын тұтынудың шамамен 40%-ын құрайды.
«Зергерлік бұйымдарға сұраныс әлсірей бастағанын көрсетіп отыр. Екінші тоқсанда ол 2020 жылдың үшінші тоқсанынан бергі ең төменгі деңгейге түсті, себебі тұтынушылар жоғары бағаға жауап қатуда», — деп толықтырды Гауэр.
Алтын бағасымен не болып жатыр?
10 қазан күні алтынның құны алғаш рет бір унция үшін $4000-нан асып, әрі қарай да өсті. 20 қазанға қарай баға шамамен $4360-қа жетті, бірақ келесі екі күнде шамамен 6%-ға төмендеп, соңғы 12 жылдағы ең ірі құлдырауды көрсетті.
Bloomberg деректері бойынша, бұл төмендеу алтынмен қамтамасыз етілген ETF қорларынан ірі капитал әкетумен қатар келді. 22 қазанда олардың жиынтық қоры соңғы бес айдағы ең үлкен қысқаруға ұшырады. Инвесторлар АҚШ пен Қытай арасындағы сауда келісімінің геосаяси шиеленісті төмендетуі мүмкін екенін бағалай бастады, ал бұл алтын сияқты қорғаныш активтерге сұранысты әлсіретті.
«Тым қатты тартылған серіппе секілді, шамадан тыс раллиден кейін алтын бағасы қайта серпіле бастады. Бағаның $4000 деңгейінен жоғары тұруы техникалық түзетуге көбірек ұқсайды, ал негізгі бағыт — қорғаныш активтерге сұраныс пен “құнсыздануға қарсы” стратегияға қызығушылық — әлі сақталып тұр», — дейді Vantage Global Prime брокерлік компаниясының талдаушысы Хебе Чен.
23 қазан күнгі саудада алтын шамамен 2%-ға қымбаттап, қайта өсу траекториясына шықты.
