Инвесторлар алтын өндіруші компаниялардың акцияларын жаппай сатып жатыр
Bloomberg мәліметінше, алтынның бағасы 2013 жылдың сәуірінен бергі ең ірі төмендеуді бастан кешіп отыр. Спот нарығында металл бағасы унциясына $4082 дейін түсіп, 6%-дан астам құн жоғалтты.
Инвесторлар күмісті де белсенді түрде сата бастады. Оның бағасы 2021 жылғы ақпаннан бергі ең жоғары қарқынмен құлдырады. Күміс бірден 8,7%-ға арзандап, унциясына $47,9 болды.
Акциялар нарығындағы жағдай
Осы жағдай аясында ірі алтын өндіруші компаниялардың акциялары күрт арзандады. Newmont компаниясының акциялары 9,4%-ға құлдырап, 21 қазан күні S&P 500 индексіндегі ең нашар көрсеткішке ие болды, деп жазады Barron's. Barrick Mining акциялары шамамен 9%-ға төмендеді.
Barron's басылымы тау-кен компанияларының акциялары әдетте тұрақты және тіпті «ұйқыдағы» инвестициялар ретінде қарастырылады деп жазады. Кейінгі бес жылда Newmont акцияларының бета-коэффициенті (нарықтағы құбылмалылықты өлшейтін көрсеткіш) 0,49 болды, бұл олардың бағасы нарыққа қарағанда шамамен екі есе аз ауытқитынын білдіреді. Agnico Eagle Mines көрсеткіші де шамалас — 0,47, ал Barrick үшін бұл көрсеткіш сәл жоғары — 0,51.
Алайда алтын мен тау-кен компанияларының акциялар бағасының жылдам өсуі Уолл-стриттегі жағдайды айтарлықтай өзгертті. Barron's-тың пікірінше, қазір алтын өндірушілер бағалы металл құнының өзгерісіне биткойнға жауап беретін криптокомпаниялар сияқты серпінмен әрекет етуде. SPDR S&P Metals & Mining ETF 21 қазанда 6,6%-ға құнсызданды.
Неліктен нарық кері бағыт алды?
Рекордтан рекордқа жетіп келген қымбат металдар нарығына бірнеше фактор қатарынан әсер етті. Қытай мен АҚШ арасындағы сауда келіссөздерінің оң белгілері, доллардың нығаюы, АҚШ үкіметінің ұзаққа созылған шатдауны (жұмысын уақытша тоқтатуы) және Үндістандағы Дивали мерекесіне орай алтын сатып алу маусымының аяқталуы, деп түсіндіреді Bloomberg. FT қосымша тағы бір себепті атап өтті – шатдаунға байланысты фьючерстік нарықтағы инвесторлардың позициясы туралы деректердің жарияланбауы.
Макростратег Татьяна Дарьенің айтуынша: «Қазіргі шақта алтынға арналған ETF-терге инвестициялардың көлемі тарихи максимумға жеткен жоқ. Бұған дейінгі раллилер ұзаққа созылатын. Алайда тарих көрсетіп отырғандай, уақыт өте келе импульс бәсеңдейді, ал сатып алулар сатылымдарға ауысады. Егер кейінге қалдырылған [шатдаунға байланысты] деректер экономика күтілгеннен де мықты екенін көрсетсе, алтын бағасының тереңірек түзетілуі ұзақ күттірмейді».
MKS Pamp компаниясының талдаушысы Никки Шилз FT басылымына:
«Нарық қатты қыза бастады. Негізгі себеп — шектен тыс сатып алулар. Ралли өзінің шегіне жетті. Алтын бағасының алты апта ішінде $1000-ға өсуі оның артық бағаланғанын көрсетеді — біз қазір стратосферадамыз», — деді.
Renaissance Macro Research сарапшыларының Barron's келтірген жазбасында:
«Алтын қауіпті өсу аймағына енді. Бұқа нарығында (өсу тренді кезінде) пайда фиксациялау сәтін анықтау барған сайын қиындай түседі. Егер нарық кері бағыт алса, дәстүрлі трендке сүйенетін стратегиялар капиталды сақтауға тым баяу әрекет етуі мүмкін», — делінген.
