Басты жаңалықтар: Google Chrome-нан айырылуы мүмкін, мұнай қымбаттап жатыр

Google-ға қарсы антимонополиялық іс Chrome браузерін сатуға мәжбүр етуі мүмкін. Бұл Alphabet акцияларының 25%-ға құлдырауына және табыстың азаюына әкелуі ықтимал. Мұнай бағасы жеткізілімдердегі үзіліс қаупіне байланысты өсіп келеді. Ал АҚШ-тың болат өнеркәсібі акциялары Дональд Трамп болат пен алюминийге салынатын баж салығын екі есеге арттыруға уәде берген соң күрт қымбаттады. US Steel мен жапондық Nippon Steel арасындағы мәміле де жағдайға әсер етті. 3 маусым таңына арналған негізгі оқиғаларға шолумен таныса отырыңыздар.

Егер АҚШ-тың федералды судьясы Амит Мехта Google компаниясын Chrome браузерін сатуға міндеттесе, Alphabet акциялары 15–25%-ға төмендеуі мүмкін. Бұл туралы Barclays сарапшылары Yahoo Finance-ке берген инвесторларға жазбасында айтты.

2024 жылдың тамызында Google АҚШ Әділет министрлігімен болған тарихи антимонополиялық процесте жеңіліп қалған. Судья компанияны іздеу жүйелері нарығында — атап айтқанда, «жалпы іздеу» мен іздеу нәтижелерінің жоғарғы жағында көрсетілетін «мәтіндік жарнама» нарығында — монополия орнатты деп таныды. Өткен жұма күні Әділет министрлігі судьяны Google-ды Chrome-ды сатуға, іздеу сұраныстары туралы деректерді бәсекелестермен бөлісуге және Google-ды әдепкі іздеу жүйесі ретінде орнатуға мүмкіндік беретін эксклюзивті келісімдерге тыйым салуға шақырды.

Barclays сарапшысы Росс Сэндлер дүйсенбіде: «Chrome сатылу ықтималдығы әлі де төмен болғанымен, өсе түсті», — деп жазды. Оның айтуынша бұл браузерді сатып алуы мүмкін «ең ықтимал үміткерлер — қаржылық қолдауы мықты OpenAI (ChatGPT жасаушысы), Anthropic немесе Perplexity сияқты жасанды интеллект компаниялары болуы мүмкін».

Сэндлердің айтуынша Chrome-ды сатудың салдары Google үшін «ауыр соққы» болмақ. Себебі Chrome-ның 4 млрд қолданушысы бар және ол іздеу табысының шамамен 35%-ын қамтамасыз етеді.

«Бұл GOOGL акциялары үшін үлкен оқиға, тіпті Антимонополиялық іс Google-дың монополияға қарсы әрекеттеріне қарсы бағытталған «қара аққу» деуге де болады. Егер шешім шынымен осындай шешім қабылданса, акциялар сөзсіз құлдырайды. Себебі біз сөйлескен бірде-бір инвестор өз моделінде мұндай сценарийдің боларын ескермеген», — деді ол. Оның болжамынша, Chrome сатылған жағдайда Alphabet-тің бір акцияға шаққандағы табысы 30%-ға азаюы мүмкін.

Судьяның шаралар бойынша шешімі тамызда белгілі болады — дәл сол кезде Google-дың іздеу империясының тағдыры шешілмек. Сенбі күні Google шешімге апелляциялық шағым түсіретінін мәлімдеді.

Дүйсенбіде Alphabet-тің A класындағы акциялары 1,6%-ға төмендеп, жыл басынан бері 10,7%-ға арзандады.

Reuters агенттігінің хабарлауынша Азиядағы сауда сессиясының басында мұнай бағасы өсті. Бұған АҚШ-тың Иранға ядролық келісім бойынша жасаған ұсынысының Тегеран тарапынан қабылданбауы мүмкін деген алаңдаушылық пен Канададағы орман өрттері себеп болды.

Brent мұнайының фьючерстері 55 центке, яғни 0,85%-ға қымбаттап, баррелі $65,18 болды. АҚШ-тың West Texas Intermediate (WTI) маркалы мұнайы 59 центке, немесе 0,94%-ға өсіп, баррелі $63,11-ге жетті.

Осы аптаның дүйсенбісінде, 2 маусымда мұнай бағасы шамамен 3%-ға өсті. Бұған OPEC+ шілде айында мұнай өндірісін күніне 411 мың баррель деңгейінде ұстау туралы шешімі себеп болды — бұл нарық қатысушылары күткеннен аз және алдыңғы екі аймен бірдей.

Сейсенбі күні бағаның жоғары болуына геосаяси жағдайлар әсер етті. Reuters хабарлауынша Иран АҚШ-тың ядролық келісімді шешуге қатысты ұсынысын қабылдамайды. Себебі ол Тегеран мүддесін ескермейді әрі Вашингтонның уран байытуға қатысты қатаң позициясын жұмсартпайды. Егер келіссөздер сәтсіз аяқталса, Иранға қарсы санкциялар сақталып, бұл ұсынысты азайтып, мұнай бағасын жоғары деңгейде ұстап тұруы мүмкін.

Ресей мен Украина арасындағы соғыс жағдайы да мұнай жеткізу тұрақтылығына қатысты алаңдаушылықты арттырып, бағаны ұстап тұр.

Сонымен қатар, Канаданың Альберта провинциясындағы орман өрттері кейбір мұнай-газ нысандарындағы өндірісті уақытша тоқтатуға әкелді. Reuters мәліметінше өрттердің салдарынан күніне шамамен 344 мың баррель өндіріс жоғалып отыр — бұл елдің жалпы өндірісінің 7%-ын құрайды.

ANZ банкі тауар стратегиясы жөніндегі аға сарапшысы Дэниел Хайнстың айтуынша дүйсенбі күнгі баға өсімі негізінен OPEC+ күтпеген шешім қабылдамағаны үшін туындаған «жеңілдік сезіміне» байланысты. «Ең нашар қауіп расталмаған соң, инвесторлар демалыс күндері алдындағы қысқа позицияларын жапты», — деді ол.

CNBC мәліметінше 2 маусым дүйсенбіде АҚШ-тың ірі болат компанияларының акциялары күрт қымбаттады. Бұған Дональд Трамптың импорттық болатқа салынатын баж салығын арттыру туралы мәлімдемесі түрткі болды.

Cleveland-Cliffs компаниясының акциялары шамамен 23%-ға, ал Steel Dynamics пен Nucor акциялары 10%-ға өсті. Болат секторын қадағалайтын VanEck Steel ETF (SLX) 3%-дан астам көтерілді.

Жұма күні Пенсильваниядағы митинг кезінде Трамп АҚШ-қа импортталатын болатқа салынатын салықты 25%-дан 50%-ға дейін арттыратынын мәлімдеді. Бұл жаһандық сауда саласындағы шиеленісті күшейтіп, халықаралық әріптестер тарапынан сынға ұшырады.

«Импортталатын болатқа салынатын тарифті 25 пайыздық пунктке арттырамыз — бұл АҚШ болат өнеркәсібін бұрынғыдан да нығайтады», — деді Трамп.

Еуроодақ Трамптың бұл әрекеттері «келісілген шешімге жету бойынша жүргізіліп жатқан жұмысты бұзады» деп атап, «қарымта шаралар қабылдауға дайын екенін» мәлімдеді.

Сондай-ақ, Трамп U.S. Steel мен жапондық Nippon Steel арасындағы «ауқымды келісім» туралы айтты. Ол U.S. Steel компаниясы «АҚШ бақылауында қалады» және жұмыстан қысқарту болмайды деп уәде берді. Бұған дейін ол бұл мәмілені «бірігу» деп атамай, «серіктестік» деп сипаттап, ол 70 мыңға жуық жаңа жұмыс орнын құратынын айтқан.

Латвиялық Aerones технологиялық компаниясы жел генераторларын жөндеуге арналған жасанды интеллект негізіндегі роботтар мен шешімдерді әлем бойынша іске қосу үшін $62 млн инвестиция тартты. Бұл туралы Reuters агенттігіне компанияның тең құрылтайшысы және бас директоры Дайнис Крузе хабарлады.

Жел энергиясы бүгінде әлемдегі электр қуатының шамамен 10%-ын қамтамасыз етіп отыр және бұл сектор қарқынды өсіп келеді. Алайда көпшілік турбиналар әлі де қолмен қызмет көрсетуді қажет етеді — бұл ұзақ тоқтаулар мен энергетикалық компаниялар үшін айтарлықтай шығындарға әкеледі.

Крузе айтуынша Aerones роботтары алып турбина қалақтарын адамдарға қарағанда кем дегенде екі есе жылдам қызмет көрсете алады және бұл — тиімді, қауіпсіз әрі үнемді шешім.

«Саланың ауқымы жылдам өсуде, ал техникалық қызмет көрсету — ең әлсіз тұсы. Турбинаның тоқтап қалуы жөндеу жұмысының өзінен де қымбат — бұл жаңартылатын энергияның құнын арттыратын басты кедергілердің бірі. Біз қалақ құлап түскенше күтпейміз, алдын ала әрекет етеміз», — деді ол.

Инвестициялық раундты АҚШ-тың Activate Capital және S2G Investments қорлары басқарды. Сондай-ақ, Aerones ЕО-ның Инновациялық қорынан 4 млн еуро көлемінде грант алған. 2023 жылы компания тағы 30 млн еуро тартқан.

Крузенің айтуынша компания АҚШ-та белсенді дамып келеді — өткен жылы Даллас қаласында кеңсе ашып, жергілікті мамандарды жұмысқа алған. Сондықтан америкалық әріптестерді тарту маңызды болды. Aerones жыл соңына қарай нарыққа қайта оралып, венчурлік қарыз түрінде тағы $15–20 млн тартуды жоспарлап отыр.

Компания мәліметінше 2020 жылдан бері Aerones шешімдері қосымша 400 мың МВт/сағат таза электр қуатын өндіруге және 165 мың тонна көмірқышқыл газының ауаға таралуының алдын алуға көмектескен.

CNBC хабарлауынша Азия-Тынық мұхиты аймағының қор нарықтары сейсенбі күні өсті. Бұл дүйсенбі күні Уолл-стриттегі үш негізгі индекстің де көтерілгенінен кейін орын алды. Бұл ретте жаһандық сауда шиеленісі күшейіп келеді — Қытай АҚШ-ты уақытша сауда келісімін бұзды деп айыптаса, ЕО Дональд Трамптың болат бажын 50%-ға дейін арттыру ниетін сынауда.