Google үшін «қара аққу»: Barclays Alphabet-тің 25%-ға құлдырау сценариін сипаттады

Google-дың холдингтік құрылымы — Alphabet, егер сот технологиялық алпауытты Chrome браузерін сатуға мәжбүр етсе, нарықтық құнының 25%-ына дейін жоғалтуы мүмкін, деп есептейді Barclays. Іздеу жарнамасы нарығындағы монополияға қатысты іс бойынша Alphabet-ке қандай жаза қолдану керектігін сот жаздың соңына дейін шешуі тиіс. Әзірге Barclays компанияны бөлу ықтималдығын төмен деп бағалап отыр және биыл 10%-дан аса арзандаған акцияларды сатып алуды инвесторларға әлі де ұсынып келеді.

Егжей-тегжейлі

Егер АҚШ-тың округтік судьясы Амит Мехта Alphabet компаниясынан Chrome браузерін сатуды талап етсе, оның акциялары 15–25%-ға дейін күрт құлдырауы мүмкін, деп жазды Barclays сарапшысы Росс Сэндлер 2 маусымдағы жазбасында. Ол Chrome-ды сату «ықтималдығы» әлі де төмен болғанымен, 30 мамырдағы соттағы қорытынды пікірталастардан кейін «артқанын» атап өтті. Судья санкцияға қатысты шешімді тамызда шығарады деп күтіліп отыр — бұл шешім Google-дың іздеу империясының болашағын айқындайды, деп жазады Yahoo Finance.

«Бұл — маңызды оқиға, акциялар үшін «қара аққу» болар еді, — делінген сарапшының жазбасынан үзінді келтірген басылым. — Егер бұл сценарий жүзеге асса, акциялар бірден құлдырайтыны анық, өйткені біз сөйлескен бірде-бір инвестор мұндай нәтижені мүмкін деп санамайды».

Сэндлердің айтуынша, Chrome-ды мәжбүрлі түрде сату тек Alphabet акцияларының құлдырауына ғана емес, сонымен қатар акцияға шаққандағы пайданың шамамен 30% төмендеуіне әкеледі. Сарапшының дерегінше, Chrome-ның 4 млрд қолданушысы бар және Google-дың іздеу табысының 35%-ы осы браузерге тиесілі.

«Сот санкцияға қатысты қандай шешім қабылдайтынын білмейміз. [Жұма күні] біз бір күн бойы қорытынды пікірталастарды тыңдадық, кей сәтте өзімізді нашар сезіндік, ал кей сәтте – жақсырақ (Google акцияларына әсері тұрғысынан)», — деп атап өтті ол.

Сэндлердің айтуынша, егер Alphabet мәжбүрлі түрде бөлінетін болса, Chrome браузерінің «ең ықтимал сатып алушылары» ретінде «жақсы қаржыландырылған ЖИ компаниялары – OpenAI, Anthropic немесе Perplexity» болуы мүмкін.

Соған қарамастан, Barclays әзірге Alphabet акцияларына берген Overweight рейтингін сақтап отыр және инвесторларға оларды сатып алуды ұсынуда. Банк Alphabet котировкалары нарықтан озады деп күтеді. Жыл басынан бұл акциялар шамамен 11% жоғалтса да, сол аралықта кең нарық индексі S&P 500 – 1% өсті. 2 маусымдағы саудада Alphabet акциялары 1,6% арзандап, $169-ға түсті.

Alphabet-ті бөлуге сот неге мәжбүрлеуі мүмкін?

2024 жылғы тамызда компания АҚШ Әділет министрлігінің монополияға қарсы талабына қатысты сот процесінде жеңіліп қалды. Судья Мехта технологиялық алпауыттың іздеу жүйелері нарығында, атап айтқанда «жалпы іздеу» және іздеу нәтижелерінің жоғарғы бөлігінде көрсетілетін мәтіндік жарнама нарығында монополия орнатқанын мойындады. Алайда, Alphabet-ке қандай жаза қолданылатыны әлі нақты шешілген жоқ.

30 мамыр, жұма күні, Google мен АҚШ Әділет министрлігі арасындағы тараптардың пікірталастары аяқталды. Ведомство соттан Google компаниясын Chrome браузерін сатуға міндеттеуді, іздеу деректерін бәсекелестермен бөлісуді және Google-ға мобильді құрылғылар мен браузерлерде әдепкі іздеу жүйесі мәртебесін беретін эксклюзивті келісімдер жасауды тоқтатуды талап етті. Компанияның мұндай келісімдері Apple және Samsung-пен бар.

Google монополияға қатысты іс бойынша соңғы шешімді күтіп отыр, өйткені кейін бұл шешімге апелляция бермек. «Біз соттың бастапқы шешімі қате болғанына сенімдіміз, және оны қайта қарату мүмкіндігін асыға күтеміз», — деді компания X әлеуметтік желісінде.

Инвесторлар үшін не тиімдірек?

Егер Alphabet компаниясы бірнеше бөлікке бөлінсе, бұл акционерлер үшін тиімдірек болар еді, деп санайды DA Davidson сарапшысы Гил Лурия. Мамыр айында ол өзінің клиенттері – ірі институционалдық инвесторлар – Google-ды «ауқымды бөлшектеуді» қолдайтынын жазған. Ал АҚШ Әділет министрлігі монополия ісі аясында компанияны тек «жекелеген бөлуді» ұсынып отыр.

Лурияның пікірінше, технологиялық алпауыт әрбір бизнес бағытын жеке жария компания ретінде бөліп шығаруы керек: видеохостинг YouTube, іздеу жүйесі Google, бұлтты қызмет Google Cloud, пилотсыз такси қызметі Waymo және ЖИ-ге қатысты бағыттар. Alphabet пен оның бәсекелестерінің есепті деректеріне сүйенген сарапшының есебінше, егер бұл бизнес бағыттары бөлек саудаланса, олардың құны әлдеқайда жоғары болар еді. Қазір Alphabet-тің нарықтық капитализациясы $2 трлн-ды құрайды. Алайда Лурияның есептеуінше, бизнес бағыттарын жеке бағалағанда олардың жиынтық құны $3,7 трлн-ды құрайды.