Басты жаңалықтар: Трамп Канадаға тариф енгізбек, JPMorgan нарықты ескертуде
Дональд Трамп 1 тамыздан бастап Канададан импортқа 35% кедендік баж салығын енгізетінін айтып, Оттаваны АҚШ-қа қарсы жауапты шаралар қабылдағаны үшін айыптады және жақын сағаттарда ЕО-ға қатысты тариф мөлшерін жариялауға уәде берді. JPMorgan бас директоры Джейми Даймон нарықтардың сауда саясатына қатысты шамадан тыс жайбарақаттығына алаңдаушылық білдірді. Биткойн опциондар нарығындағы дүрбелең, институционалдық сұраныс пен реттеуші ережелердің жұмсаруы күтілімі аясында $116 000-нан асып, жаңа рекорд орнатты. Осы және басқа да тақырыптар 11 шілде таңындағы басты оқиғалар шолуында.
Трамп 1 тамыздан бастап Канадаға 35% жаңа тариф енгізетінін ескертті
CNBC-дің хабарлауынша АҚШ президенті Трамп 1 тамыздан бастап Канададан импортқа 35 пайыздық баж салығын енгіземін деп мәлімдеді. «АҚШ-пен ынтымақтаса жұмыс істудің орнына, Канада өз кедендік шараларымен жауап қайтарды», — деді Трамп ел премьер-министрі Марк Карниге арнаған Truth Social әлеуметтік желісінде жарияланған хатында.
Ол бұл тарифтің салалық баж салықтарынан бөлек болатынын атап өтті: қазіргі таңда канадалық импортқа болат пен алюминийге 50%, автокөліктерге 25% кедендік баж салығы қолданыста, ал 1 тамыздан бастап мысқа 50% тариф күшіне енеді. Трамп сонымен қатар, егер Канада өз қарсы сауда шектеулерін жалғастыра берсе, 35% баж салығының одан әрі өсуі мүмкін екенін ескертті.
Бұдан бөлек, президент NBC телеарнасына алдағы бірнеше сағатта ЕО-ға қатысты тарифтерді де жариялайтынын және негізгі сауда серіктестері үшін 15% немесе 20% көлеміндегі әмбебап тарифтерді қарастырып жатқанын айтты. «Менің ойымша, тарифтер өте оң қабылданды. Қор нарығы жаңа рекордтық көрсеткішке жетті», — деді Трамп телеарнаға берген сұхбатында.
JPMorgan басшысы: нарықтар тарифтер мен мөлшерлемелердің өсу қаупін бағаламай отыр
JPMorgan Chase бас директоры Джейми Даймон нарықтар жоспарланған кедендік тарифтерге тым сенімділікпен қарап отырғанын және мөлшерлемелердің көтерілу қаупін бағаламай отырғанын ескертті, деп жазады Bloomberg. «Өкінішке қарай, менің ойымша, нарықтар тарифтерге байланысты жаңалықтарға шамадан тыс тыныш әрекет етуде», — деді ол Дублинде өткен іс-шарада.
Даймон АҚШ Федералды резервтік жүйесі мөлшерлемені арттыруы мүмкін деген ықтималдықты көпшіліктен жоғары бағалайтынын айтты. Оның пікірінше, Уолл-стрит керісінше күтсе де, реттеуші бұған бара алады. «Егер нарық бұл ықтималдықты 20% деп бағаласа, мен оны 40–50% деп бағалаймын», — деп нақтылады Даймон.
Биткойн жаңа белесті бағындырды
Биткойн рекордтық раллиін жалғастыруда: бейсенбі күні ол алғаш рет $116 000 деңгейінен асып түсті, деп хабарлайды Bloomberg, ал жұма күні тіпті $118 000-ға дейін көтерілді.
Криптовалюта осы деңгейге жеткеннен кейін, Deribit биржасындағы ашық қызығушылық — яғни жабылмаған келісімшарттар саны — $115 000 және $120 000 мақсаттарымен колл-опциондар айналасында шоғырланды. Қыркүйек пен желтоқсан айларында аяқталатын ұзақмерзімді опциондарға қатысты $140 000 және $150 000 страйкаларына қызығушылықтың артқаны байқалады, деп хабарлайды агенттік.
Бұл ралли қысқа позициялардың жаппай жабылуына себеп болды: Coinglass деректері бойынша соңғы 24 сағат ішінде токенге қарсы 1 миллиард доллардан астам позициялар жойылған, деп жазады Bloomberg. Инвесторлар биткойн-ETF-терге қарай ұмтылды – бейсенбіде оларға 1,2 миллиард доллар құйылды.
Институционалдық сұраныс негізінде қалыптасқан биткойн серпілісі криптовалюта нарығындағы оптимизмді растады, әсіресе қарашадағы сайлаудан кейін. Bloomberg атап өткендей, инвесторлар Трамптың екінші президенттік мерзімі салаға қатысты реттеуді жұмсартады деп үміттенеді. Жыл басынан бері биткойн шамамен 25%-ға қымбаттап, тәуекелді активтерге деген қызығушылықпен, оның ішінде тарихи максимумдарға жеткен қор нарықтарымен қатар дамып келеді.
Үндістан IPO көлемі бойынша рекорд орнатуға жақын
Үндістан алғашқы орналастыру арқылы қаражат тарту бойынша рекордтық жылға жақындап қалды: бұған пайыздық мөлшерлемелердің төмендеуі мен ішкі акциялар нарығына тұрақты сұраныс ықпал етіп отыр, деп жазады Financial Times.
Жыл басынан бері листингтер аясында $6,7 млрд тартылды, бұл 2024 жылдың сәйкес кезеңіндегі $5,4 млрд көрсеткішінен жоғары. Dealogic деректеріне сәйкес, бұл Үндістанды АҚШ-тан тыс ең ірі IPO нарығына айналдырды. Бірқатар ірі орналастырулар — атап айтқанда, Tata Capital-дің $2 млрд көлеміндегі IPO-сі — өткен жылғы жалпы $21 млрд көлемінен асып түсуі мүмкін.
«Біз екінші жартыжылдықта алғашқы нарықтағы белсенділіктің айтарлықтай артқанын байқаймыз», — деді Goldman Sachs-тің Үндістандағы қаржыландыру бағытының басқарушы директоры Суннил Кхайтан. Оның болжамынша бұл кезеңде $20 млрд дейінгі қаражат тартылуы мүмкін.
Nifty 50 қор индексі жылдың басындағы баяу бастамадан кейін қалпына келді. Сол кездегі баяулау экономика өсімінің бәсеңдеуі, АҚШ тарапынан тарифтік қысым және Пәкістанмен қысқа мерзімді қақтығыспен байланысты болды. Қазір индекс 2025 жылы шамамен 7% өсіп, тарихи максимумға жақындап қалды.
Нарықтарда не болып жатыр
Азия-Тынық мұхиты өңірінің нарықтары АҚШ президентінің Канадаға қатысты баж салығын жариялауына байланысты өсім көрсетті.
— Жапондық Nikkei 225 индексі сауда басталғанда 0,51%-ға көтерілді, бірақ кейін барлық өсімді жоғалтты. Topix индексі 0,4%-ға артты.
— Оңтүстіккореялық Kospi сауда басында 1% көтерілсе де, күн соңында 0,2% төмендеп жабылды. Kosdaq шағын компаниялар индексі күнді 0,3% өсіммен аяқтады.
— Гонконг пен Қытай нарықтары да өсіммен ашылды: Гонконгтағы Hang Seng индексі 1,6%-ға, ал Қытайдың материктік CSI 300 индексі 0,5%-ға көтерілді.
— Сингапурлық Straits Times индексі жаңа максимумға жетіп, 0,5% өсті.
АҚШ-тың негізгі қор индекстерінің фьючерстері Трамптың мәлімдемесіне жауап ретінде кемінде 0,3%-ға төмендеді.
