Goldman Sachs: доллар енді «қауіпсіз айлақ» емес
Goldman Sachs сарапшыларының айтуынша, жақын арада АҚШ доллары «тәуекелді» валюта сияқты саудалана бастауы мүмкін. Доллардың құбылмалылығы артуы мүмкін — бұл Ақ үйдің сауда саясатының болжанбайтындығымен және жаһандық резервтердің басқа активтерге қарай ауысуымен байланысты. 2025 жылы ең алаңдатарлық белгі – доллар бағасының акция нарығымен бірге төмендеуі. Бұрын мұндай кезде доллар күшейетін. Бұл АҚШ валютасы бұрынғыдай «қауіпсіз айлақ» мәртебесін жоғалтып, керісінше тұрақсыздық көзіне айналып бара жатқанын көрсетеді, дейді банк.
Егжей-тегжейлі
Goldman Sachs сарапшылары Карен Рейчготт Фишман мен Лекси Кантердің айтуынша, инвесторлар доллар алдағы уақытта да құбылмалы, «тәуекелге бейім» валюта ретінде әрекет етуі мүмкін екеніне дайын болуы керек. Бұл туралы Bloomberg хабарлады.
Фишман мен Кантердің пікірінше, бұрын қорғаныс активі ретінде саналатын және дағдарыс кезінде тұрақтылық көрсеткен АҚШ валютасының позициясы әлсіреуі мүмкін. Бұған бірнеше фактор әсер етеді: АҚШ-тың баж салықтарына қатысты белгісіздік, Федералды резерв жүйесінің тәуелсіздігіне байланысты алаңдаушылық, АҚШ-тың қаржылық тұрақтылығына деген сенімсіздік, жаһандық резервтердің басқа активтерге ауысуы.
2025 жылғы ең таңғаларлық өзгерістердің бірі – доллар бағасының АҚШ-тың акция нарығымен қатар төмендей бастауы. Бұрын мұндай құбылыс тек дамушы елдерге тән еді, ал АҚШ сияқты жетекші экономикаларда сирек кездесетін, деп жазады MarketWatch. Биыл доллар мен АҚШ акциялары бір мезетте бұрынғы он жылдыққа қарағанда екі есе жиі арзандаған, дейді Bloomberg. Бұл доллардың сенімді «тыныш айлақ» ретіндегі мәртебесін жоғалтып, керісінше тұрақсыздық көзіне айналып жатқанын білдіруі мүмкін.
Егер бұл үрдіс жалғаса берсе, ол АҚШ долларының позициясын айтарлықтай әлсіретуі мүмкін, дейді Goldman Sachs сарапшылары. Қазірдің өзінде көптеген инвесторлар доллар арзандап кетуі мүмкін деп қауіптеніп, өз портфельдерін (АҚШ акциялары мен облигацияларын) хедждей бастады. Сарапшылардың пікірінше, бұл әрекеттер доллар бағасына қосымша қысым түсіреді. Бұдан бөлек, соңғы кезде сирек әрі алаңдатарлық жағдай жиі байқалып жүр: бір мезгілде акциялар да, мемлекеттік облигациялар да, доллар да арзандап жатыр. Фишман мен Кантердің айтуынша, бұл жалпы АҚШ активтеріне деген қызығушылықтың төмендеп жатқанын көрсетеді.
«Біз доллардың қорғаныс активі ретіндегі тартымдылығы мүлде жойылды деп ойламаймыз. Соңғы апталарда оның бұрынғыдай әрекет ете бастағанын байқадық. Бірақ бәрібір доллар кез келген сәтте қайтадан тәуекелге бейім валюта ретінде қозғала бастау ықтималдығы бар», – деді Goldman Sachs сарапшылары MarketWatch келтірген түсіндірмесінде. Олар корреляцияның өзгеруі доллардың қашу кезеңдерінде нығаюын болжауды қиындатып отырғанын атап өтті.
Доллардың жай-күйі
ICE доллар индексі 2025 жылдың алғашқы жартысын өзінің тарихындағы ең нашар көрсеткішпен аяқтады — бұл индекс 1973 жылы іске қосылғаннан бері болмаған жағдай. Алғашқы алты айда индекс 10%-дан астамға төмендеді. Шілдеде доллар сәл қалпына келе бастады: ай басынан бері индекс 1% өсті.
Басқалар не дейді?
«Доллардың ұзақ мерзімді перспективасы бірнеше себепке байланысты нашар: жаһандық сауданың баяулауы, дедолларизация және хеджирлеу стратегияларының қайта қаралуы. Бірақ доллар қазірдің өзінде едәуір арзандады, ал нарықтар түзу бағытта сирек қозғалады. Қысқа мерзімді қайта өсуі мүмкін», – дейді Bloomberg стратегі Саймон Уайт.
«Валюта нарығындағы трейдерлерге ойлануға себеп көп: бюджет тапшылығы шектен тыс, ал оны азайтуға республикашылдар да, демократтар да ынталы емес. Әскери және сауда салаларында одақтастармен қарым-қатынас та нашарлап тұр. Нарықта негативті факторлар жеткілікті. Ал егер тренд басталса, оны тоқтату оңай емес», – деді CNBC арнасына берген сұхбатында B. Riley Wealth Management компаниясының бас нарық стратегы Арт Хоган. Оның айтуынша, доллар бағамына қысым тым күшейіп кеткен болуы мүмкін, бірақ іргелі факторлар тұрғысынан алаңдауға толық негіз бар.
Дегенмен, жағдайға оң баға беретін сарапшылар да бар. Мысалы, Capital Economics-тің Азия–Тынық мұхиты аймағы бойынша басшысы Томас Мэттьюс маусым–шілдедегі қор нарығындағы ралли АҚШ активтеріне деген сенімнің артқанын көрсетеді дейді. Оның пікірінше, доллардың әлсіреуі негізінен басқа валюталардың күшеюімен және хеджирлеу стратегияларының өзгеруімен байланысты болған. Wells Fargo сарапшылары да доллар бағамына қатысты қауіптерді тым асыра бағалау деп есептейді. Банк стратегінің айтуынша, статистикалық тұрғыда доллар жаһандық сауда мен қаржы жүйесінің орталық элементі болып қала береді және өзінің рөлін әлі де жоғалтқан жоқ.
