Батарея өндірушісі Energizer үшін биржада ең нашар күн болды. Бағаға не әсер етт?
Batteray өнімдерін шығаратын әрі атымен аттас брендке ие small-cap компания Energizer Holdings акциясы 18 қарашада сауда басталғалы бергі ең төмен деңгейге түсті. Компанияның айтуынша, импорттық баж салығы пайдасын азайтып жатыр, ал тұтынушылық сұраныс әлсіз күйде.
Егжей-тегжейлі
Energizer Holdings қағазы 18 қарашада Нью-Йорк биржасында 18,5% құлдырап, $19,44-ға дейін түсті. Бұл — компанияның ашық саудаға шыққаннан бергі ең төмен бағасы.
Инвесторлардың реакциясы 30 қыркүйекте аяқталған 2025 қаржы жылының төртінші тоқсанына жарияланған есепке байланысты болды. Есепке сәйкес, компанияның таза сатылымы жылдық динамикада 3,4% өсіп, $832,8 млн-ға дейін жеткен. Бірақ өсім негізінен сатып алынған компаниялар есебінен болды, ал органикалық сатылым сұраныстың төмендеуінен 2,2% азайды.
Соңғы есепте көрсетілгендей, түзетілген жалпы маржа 3,7 пайыздық пунктке төмендеп, 38,5%-ды құрады. Компания бұған өндірістік шығындардың артуы әсер еткенін айтады. Шығындар өсіміне өндірістің төмен тиімділігі және импорттық баж салығының қымбаттауы себеп болды. АҚШ президенті Дональд Трамп импорттық тарифтердің ондаған пайызға өсетінін биыл сәуірдің басында жариялаған еді, содан бері мөлшерлемелер бірнеше рет қайта қаралған.
Есепті тоқсанда компанияның таза пайдасы 26,7% құлдырап, $34,9 млн-ға дейін түсті. Түзетілген бір акцияға шаққандағы пайда 14% төмендеп, $1,05-ға дейін түсті. Уолл-стрит бұл көрсеткіш $1,12 болады деп күткен еді, деп жазды MarketWatch.
«Макроорта өзгеріп жатыр. Импорттық баж салығы біздің шығындарды ұлғайтты. Жыл соңында тұтынушылық сұраныс төмендеді, ал жеткізу тізбектері жедел қайта теңгеруді талап етті», — деді компанияның бас директоры Марк ЛаВинья. Оның айтуынша, компания баж салығының әсерін азайту үшін өндірісті қайта құрып, рентабельділікті сақтау мақсатында бағаны көтеру сияқты шараларды қолға алған. Алайда мұндай қадамдар «оңай болмады», деп атап өтті ол.
Компания перспективасы
ЛаВиньяның айтуынша, 2026 қаржы жылы Energizer үшін бетбұрыс кезең болмақ. Компания органикалық таза сатылымы қазіргі деңгейде сақталады немесе кей сегменттерде сәл өседі деп күтеді, ал жалпы рентабельдік аздап төмендеуі мүмкін.
Түзетілген бір акцияға пайда 2025 қаржы жылындағы $3,52 көрсеткішімен салыстырғанда $3,3–3,6 диапазонында болады. Ал түзетілген EBITDA $580–610 млн деңгейінде болжануда (2025 жылы — $623,6 млн).
Акция ахуалы
19 қарашадағы таңертеңгі саудада Energizer акциясы 2,2% сәл өсті.
Уолл-стрит компания перспективасына сақ қарайды: MarketWatch дерегінше, «ұстау» (hold) — 5, ал «сатып алу» — 1 ғана рейтинг берген. Орташа мақсатты баға — $29,67, бұл 18 қарашадағы жабылудан шамамен 53% жоғары.
