Безос Amazon-нан кеткеннен кейін алғаш рет басқарушылыққа оралады. Қандай қызметке?
Amazon негізін қалаушы, миллиардер Джефф Безос инженерия мен компьютерлер, автокөліктер және ғарыш аппараттарын өндіру салаларында жасанды интеллекттіні қолдануға бағытталған жаңа стартаптың екі басшысының бірі болады, деп хабарлады The New York Times.
Project Prometheus деп аталатын компания $6,2 млрд инвестиция тартқан, оның бір бөлігін Безос өзі құйды, деп жазды NYT дереккөздері. Бұл стартапты әлемдегі ең көп қаржыландырылған ерте кезең жобаларының біріне айналдырады. NYT мәліметінше, екінші тең-гендиректор — физик әрі химик Вик Баджадж. Ол Google X зерттеу бөлімінде Google теңқұрылтайшысы Сергей Бринмен тығыз жұмыс істеген.
Project Prometheus қазірдің өзінде OpenAI, DeepMind (Google бөлімшесі) және Meta сияқты жетекші ЖИ-компанияларынан келген зерттеушілерді қоса алғанда, шамамен 100 қызметкерді жұмысқа алған, деп жазды The New York Times дереккөздері.
NYT атап өткендей, бұл — Джефф Безостың Amazon бас директоры қызметінен 2021 жылдың шілдесінде кеткеннен кейін алғаш рет бизнестегі ресми операциялық рөлге оралуы. Ол жеке ғарыш компаниясы Blue Origin жұмысына қатысқанымен, онда оның ресми мәртебесі негізін қалаушы рөлімен шектеледі.
Жаңа стартаптың іске қосылуымен Безос ЖИ саласындағы қатаң бәсекелі нарыққа кіріп отыр. Бұл нарықта көптеген шағын компаниялар жаңа өнімдер мен технологиялар арқылы өздерін көрсетуге тырысады, сонымен қатар OpenAI, Meta және Google сияқты ірі ойыншылармен де бәсекелесуге мәжбүр, деп атап өтті Reuters.
