«Бірдеңе міндетті түрде бұзылады». АҚШ-тағы шатдаун 6 аптаға созылуы мүмкін — Moody’s
Moody’s Analytics бас экономисі Марк Занди YouTube-тағы Inside Economics подкастында АҚШ федералды үкіметінің жұмысының тоқтауы 5 немесе 6 аптаға дейін созылуы мүмкін деп ескертті. Оның айтуынша, қаржыландыру жөнінде кең келісімге қол жеткізілмесе, негізгі мемлекеттік қызметтер істен шыға бастағанға дейін шатдаун жалғасады. «Егер бір айдан ұзаққа созылса — келісім сөзсіз болады. Бірдеңе міндетті түрде бұзылады», — деді Занди.
Салдары қандай болуы мүмкін?
Moody’s экономисі Брендан ЛаСерда Benzinga басылымына берген түсініктемесінде АҚШ үкіметінің жұмысын уақытша тоқтатуының салдары жылдам және өте ауыр болуы мүмкін деп ескертті. Оның айтуынша, қысқа мерзімді шатдаун айтарлықтай әсер етпейді, бірақ «бір ай өткен соң жағдай күрт және бақылаудан тыс дамуы мүмкін».
ЛаСерда ықтимал салдар ретінде федералдық мердігерлердің жұмысының бұзылуын, әлеуметтік төлемнің кешігуін және тұтынушы мен инвестор сенімінің күрт төмендеуін атады.
АҚШ-тағы саяси тығырық елді іс жүзінде «ақпараттық тұмшалауға» әкелді — негізгі экономикалық деректердің жариялануы тоқтатылды, дейді Benzinga. Нәтижесінде АҚШ Федералдық резерв жүйесі қазан айының соңындағы отырысқа дайындалу кезінде жұмыспен қамту мен инфляция жөніндегі ресми есептерсіз, яғни негізгі көрсеткіштерсіз, шешім қабылдауға мәжбүр.
Контекст
UBS дерегінше, соңғы жылдары АҚШ-та шатдаун жиі болып тұрғанымен, азы ғана бір аптадан асқан. Банктің мәліметінше, қысқа мерзімді үкімет жұмысының тоқтауы экономика мен нарыққа айтарлықтай әсер етпейді. Ең ұзақ шатдаун 2018–2019 жылдардың тоғысында тіркелген — 34 күнге созылды. Сол кезде S&P 500 индексі қаржыландыру тоқтағанға дейінгі бір аптада 7%-дан астам, ал екі аптада 8%-дан астам төмендеді, ал облигациялар кірістілігі 9% қысқарды. Алайда, сол уақытта басқа да факторлар қысым жасады — кедендік баж салығы мен ФРС саясатының қатаюы. Бірақ, дағдарыс аяқталған соң нарық тез қалпына келіп, қайта өсе бастады, деп еске салды UBS сарапшылары.
