Бірнеше сарапшы AMD-дің мақсатты бағасын көтерді. Неге олар 45% өсім күтуде?
AMD (Advanced Micro Devices) басшылығымен кездесуден кейін бірнеше сарапшы компания акциялары бойынша мақсатты бағасын жаңартты және оларды сатып алуға кеңес берді. Wells Fargo өз бағасын $300-ден $345-ке дейін көтерді. Бұл 45%-дан астам өсім әлеуетін білдіреді. Evercore ISI мақсатты бағасын $270-тен $283-ке, ал Mizuho $275-тен $285-ке көтерді. Екі болжам да шамамен 19–20% өсу мүмкіндігін көрсетеді.
12 қарашадағы саудада AMD акциялары 10%-дан астам өсті. Жыл басынан бері олардың өсімі шамамен 111%-ға жетіп, жалпы нарықтан әлдеқайда озып кетті.
Қазір AMD-ді бақылап отырған 51 сарапшының тек 12-сі бейтарап көзқараста. Қалғаны акцияларды сатып алуға кеңес береді (Buy және Outperform рейтингтері).
Сарапшылар не дейді?
Wells Fargo сарапшысы Аарон Рэйкерс CNBC арнасына берген пікірінде: «Біз AMD-дің сервер мен дербес компьютерлерге арналған процессорлар нарығындағы үлесін арттыру мүмкіндігін, дата-орталықтарға арналған графикалық процессорлар саласындағы позициясын күшейтуін және операциялық табысының өсуін оң бағалаймыз. Бұл компанияға 2027 жылға қарай бір акцияға $10 табысқа жетуге көмектеседі», — деді. 3-тоқсанда түзетілген табыс $1,2 болды, сарапшылар $1,17 деп болжаған еді (Bloomberg деректері).
Оның айтуынша, AMD сарапшылар күні аясында күткеннен де мықты қаржылық модель ұсынды. Компания жыл сайынғы табыс өсімін 35%-дан жоғары деңгейде сақтай отырып, 2030 жылға қарай бір акцияға $20 табысқа жетуді жоспарлап отыр. Бұл ретте дата-орталық сегменті жылына 60%-дан астам өсетін болады.
Дегенмен, Wells Fargo оптимистік болжамға қауіп төндіруі мүмкін факторларды да атады. Оларға технологиялық даму жоспарын іске асырудағы қиындықтар, жетекші мамандарға тәуелділік, бәсекенің күшеюі, инвесторлардың үлкен үміттері және басқа компаниялардың көрсеткіштерінің жақсаруы жатады.
Компания не айтты?
Сарапшылармен кездесуде AMD бас директоры Лиза Су алдағы 3–5 жылда компания табысы жылына шамамен 35%-ға өседі деп болжады. Бұл өсімнің басты себебі — жасанды интеллектке арналған чиптерге деген «шексіз» сұраныс, деп хабарлайды CNBC.
AMD-дің ЖИ чиптер өндірісімен айналысатын дата-орталық бизнесі жылына шамамен 80%-ға өседі және 2027 жылға қарай миллиардтаған табыс әкеледі, дейді Лиза Су. Ол сонымен қатар AMD алдағы 3–5 жылда ЖИ чиптер нарығынан кемінде 10% үлес алатынына сенеді. 2030 жылға қарай ЖИ дата-орталықтарынан түсетін табыс жылына $1 трлн болады деп болжап отыр.
