Биткоин мамырдан бері алғаш рет жаңа рекорд орнатты
9 шілде күні өткен сауда барысында биткоин бағасы алғаш рет 112 мың доллардан асып, жаңа рекорд тіркелді. Криптовалютаға сұраныс инвесторлардың тәуекелге бейімділігінің артуы мен ірі қаржылық ұйымдардың тұрақты қызығушылығының арқасында өскен.
Егжей-тегжейі
CNBC мәліметінше, сәрсенбі күнгі саудада биткоин бағасы 112 052,24 долларға жетті. Binance платформасында бұл көрсеткіш 112 030,02 доллар болды. Осылайша, криптовалюта мамыр айынан бері алғаш рет жаңа рекорд орнатты. Бұған дейінгі ең жоғары баға (111 999 доллар) 22 мамырда тіркелген.
Алайда CoinMarketCap және CoinGecko биржаларындағы деректерге сәйкес, осы мақала жарияланған сәтте биткоин бағасы мамырдағы рекордтан төмен болған.
Bloomberg жазуынша, биткоиннің тарихи максимумға жетуі тәуекелі жоғары басқа активтермен, соның ішінде акциялармен қатар жүріп отыр. 2025 жылдың басынан бері биткоин шамамен 20%-ға қымбаттады. Reuters бұл өсімді инвесторлардың тәуекелге деген тәбеті мен институционалдық қатысушылардың тұрақты сұранысымен байланыстырады.
CNBC де бұл пікірмен келіседі: акциялар нарығындағы өсім, әсіресе Nvidia компаниясының жетекшілігімен болған ралли, биткоиннің көтерілуіне ықпал етті. 9 шілдедегі саудада Nvidia тарихта алғаш рет нарықтық құны 4 трлн доллардан асқан компания болды. Алайда жасанды интеллектке арналған процессорлар нарығындағы көшбасшы бұл межені күн соңына дейін сақтай алмады.
Сарапшылар не дейді?
Bloomberg агенттігіне пікір білдірген криптоинвестициялық компания GSR-дің OTC сауда бойынша жаһандық жетекшісі Спенсер Халларнның айтуынша, биржалық қорлар (ETF) мен цифрлық активтерді резерв ретінде ұстайтын компаниялар тарапынан сұраныстың артуы биткоинге деген тұрақты қызығушылықты нығайтты.
Алайда агенттік атап өткендей, цифрлық активтер нарығы 2025 жылғы құбылмалы кезеңде Уолл-стриттегі құбылыстардың ықпалында қалып отыр.
«Трейдерлер табысты бекіту немесе макроэкономикалық өзгерістерден туындайтын түзетулерге дайын болуы керек. Бірақ қазіргі жағдайда нарық айқын түрде «бұқа» трендінде тұр», — деді Kronos Research инвестициялық директоры Винсент Лю.
