JPMorgan-ның стейблкоин нарығына болжамы оптимистік бағалардан әлдеқайда төмен шықты
Стейблкоин нарығы 2028 жылға қарай $500 млрд-ға дейін өседі, деп болжады JPMorgan. Бұл кей сарапшылар келтірген ең оптимистік болжамдардан бірнеше есе төмен. Олардың айтуынша, нарық капитализациясы $1 трлн-нан $2 трлн-ға дейін жетуі мүмкін. JPMorgan сарапшылары нақты активтерге байланған криптовалюталарға қазіргі сұранысты ұстамдылықпен бағалап отыр және депозиттер мен ақша нарығынан оларға ауқымды қаражат ағыны болады деп күтпейді.
Егжей-тегжейлі
«Біз стейблкоин нарығы қазіргі $250 млрд деңгейінен алдағы бірнеше жылда $1–2 трлн-ға дейін өседі деген болжамдарды шамадан тыс оптимистік деп есептейміз», — делінген Николаос Панигирцоглу бастаған JPMorgan сарапшыларының CoinDesk келтірген зерттеу есебінде.
Стейблкоиндар — бұл басқа активтерге, мысалы, алтынға немесе долларға байланған құны бар криптовалюталар. Олар криптонарықта маңызды рөл атқарады: төлем инфрақұрылымы ретінде де, халықаралық аударымдар үшін SWIFT жүйесіне балама ретінде де қолданылады. Алайда, JPMorgan сарапшыларының айтуынша қазіргі кезде стейблкоиндарға сұраныстың негізгі драйвері — криптонарық ішіндегі белсенділік, ал оларды кеңінен төлем жүйесіне енгізу әлі орын алған жоқ. Банктің бағалауы бойынша қазіргі сұраныстың шамамен 88%-ын криптоактивтермен операциялар құрайды, ал нақты төлемдер айналымының тек 6%-ын ғана береді.
JPMorgan болжамы
JPMorgan сарапшылары тіпті оң сценарийде де стейблкоиндардың есеп айырысудағы танымалдығы жалпы нарық көлемін айтарлықтай ұлғайтпайды деп есептейді. Сондай-ақ олар стейблкоиндар дәстүрлі банктік депозиттерді немесе ақша нарығы қорларын ығыстырады деген идеяға да күмәнмен қарайды — өйткені олардың табыстылығы жоқ және фиат валюталар мен криптоактивтер арасындағы аударымдар қосымша қиындықтар туғызады. Осы себепті JPMorgan 2028 жылға қарай нарық көлемі тек $500 млрд-қа дейін — қазіргі деңгейден екі есе өседі, ал ең оптимистік сценарийлердегі төрт-бес еселену болмайды деп болжап отыр.
Сарапшылар сондай-ақ стейблкоиндарды Қытайдың цифрлық юанымен (e-CNY) немесе Alipay мен WeChat Pay жүйелерімен салыстыруды да орынсыз деп санайды — өйткені бұлар орталықтандырылған жүйелер және стейблкоиндардың жұмыс қағидаларына сәйкес келмейді.
Сөйтіп, банк стейблкоиндарға деген сұраныстың қалыпты өсуін күтеді. Ол көбінесе криптоиндустрияның ішкі қажеттіліктерімен анықталады және олардың жаппай қолданылу сценарийін шетке ысырады.
Басқа сарапшылар не дейді
2024 жылғы сәуірдегі зерттеуінде Standard Chartered банкі АҚШ-та стейблкоиндардың шығарылуы мен нақты активтермен қамтамасыз етілуін реттейтін GENIUS Act заңы қабылданса, олардың ұсынысы он есеге артуы мүмкін екенін жазған еді.
«Бұл заңның қабылдануы стейблкоин индустриясын заңдастырады», — деп жазды сол кезде банк сарапшылары. «Біз бұл құбылыс стейблкоиндардың жалпы ұсынысын бүгінгі $230 млрд-тан 2028 жылдың соңына қарай $2 трлн-ға дейін жеткізеді деп бағалаймыз», — деп қосты олар.
2024 жылғы маусымда АҚШ Сенаты GENIUS Act заңын қабылдағаннан кейін криптоиндустрияда белсенділік артып, бірқатар компания өз стейблкоиндарын шығаруға дайын екенін жариялады. Осыған дейін USDT стейблкоинын шығарушы Circle компаниясы IPO өткізіп, оның акциялары $299-ға дейін көтерілді — бұл орналастыру бағасынан он есе жоғары. Мұндай жылдам ралли тіпті листинг ұйымдастырушыларының бірін алаңдатты. JPMorgan бұл өсім бақылаудан шығып кеткенін айтып, акцияларды сатуға кеңес берді.
