Стейблкоиндар туралы заң қабылдануы USDC эмитентін раллиге әкелді. Тағы кімдер ұтты?
АҚШ Сенаты маңызды салалық заң жобасын қабылдағаннан кейін, негізгі стейблкоиндердің бірін жасаушы Circle-дің нарықтық капитализациясы үштен бірге күрт өсті. Бұл құжат доллармен қамтамасыз етілген криптовалюта — стейблкоиндарға арналған федералдық нормативтік базаны бекітеді. Сонымен қатар, басқа да криптовалюта саласындағы ойыншылардың акциялары қымбаттады.
Егжей-тегжейлі
Circle акциялары АҚШ Сенатында стейблкоиндарды реттеу туралы заң жобасының қабылдануына байланысты 34% шарықтап, $199,6-ға жетті. Бұл активтер шын мәнінде криптовалютадағы доллар баламасы ретінде қарастырылады. Құжаттың атауы — GENIUS (Guarding, Enabling, and Nurturing Innovation in the U.S.), яғни «АҚШ-та инновацияны қорғау, дамыту және қолдау».
«Біз тарихи сәттің куәсі болып отырмыз: АҚШ Сенаты GENIUS заң жобасын мақұлдап, Американың алдағы ондаған жылға экономикалық және технологиялық көшбасшылығын қамтамасыз ететін озық заңнаманы қабылдауға бір қадам жақындатты», — деп жазды Circle компаниясының тең құрылтайшысы әрі бас директоры Джереми Аллер X әлеуметтік желісінде.
Бұдан небәрі екі апта бұрын биржаға шыққан Circle капитализациясы IPO-дан бері 544% артты. Бұл өсім криптовалютаға деген құлшыныстың өсімен байланысты, деп жазады Yahoo Finance. Circle — нарықтық құны бойынша әлемдегі екінші стейблкоин саналатын USDC-тің эмитенті. CoinGecko деректері бойынша, оның көлемі шамамен $61,4 млрд-қа жеткен. Ал CoinDesk мәліметінше, сәрсенбі күні барлық стейблкоиндардың жиынтық нарықтық құны тарихи максимумға — $251,7 млрд-қа дейін өсіп, жыл басынан бері 22% артқан.
18 маусымда криптовалютаға қатысы бар бірнеше компанияның котировкалары өсті. USDC-тің тең құрылтайшысы Coinbase-тің акциялары 16,3% күрт қымбаттады. Цифрлық активтерді саудалайтын Robinhood платформасының бағасы 4,5% өсті. Ал өзінің JPMD стейблкоинин шығаруға дайындалып жатқан JPMorgan банкінің қағаздары 1,7% артты.
Бұл нарық үшін нені білдіреді?
GENIUS заң жобасы әлі де Өкілдер палатасы мен президент Трамптың қолдауын алуы керек. Бұл құжат америкалық компанияларға доллармен қамтамасыз етілген стейблкоиндарды шығарып, төлем жасауға рұқсат беретін нақты ережелерді бекітеді. Заң жобасы екі партияның қолдауымен қабылданды. Бұл криптовалюта саласын реттеу туралы ұзаққа созылған даулы талқылауда маңызды бетбұрыс болды және осы сала үшін үлкен жетістік саналады, деп жазады Reuters.
Егер бастама толық мақұлданса, стейблкоиндар тек өтімді активтермен — мысалы, АҚШ долларымен немесе қысқа мерзімді қазынашылық облигациялармен қамтамасыз етілуі тиіс. Ал оларды эмитенттері ай сайын резервтерінің құрамын ашық түрде жариялап отыруы керек.
Bernstein сарапшылары бұл заң жазда толығымен қабылданады деген сенімде. «GENIUS заң жобасының негізгі мақсаты — стейблкоиндарға байланысты инновацияларды офшорлық аймақтардан АҚШ-қа қайтару», — деді Bernstein сарапшысы Гаутам Чхугани Yahoo Finance-ке берген пікірінде. Оның айтуынша, құжат стейблкоинды төлем құралы ретінде анықтап, оны цифрлық қолма-қол ақшаға теңестіріп отыр. Бұл өз кезегінде стейблкоиндарды тек криптонарықта ғана емес (қазір барлық операциялардың 80–90%-ы сол жерде жүреді), басқа да төлем және есеп айырысу салаларында қолдануды кеңейтуге жол ашады.
«Стейблкоиндарға деген сұраныс қазірдің өзінде таңқалдырады, бірақ Конгрессте қаралып жатқан жаңа заң жобасы бұл өсімді жылдамдатуы мүмкін», — дейді Zacks Investment Research компаниясының стратегия жөніндегі сарапшысы Эндрю Рокко. — «Бұл заң жобасы стейблкоиндарды шығару мен пайдалануға арналған нормативтік базаны қалыптастырып, салаға деген сенімді арттырады».
Ал KBW брокерлік компаниясының сарапшылары: «Стейблкоиндардың мойындалуы негізгі криптовалюталарға, мысалы, биткоинға да оң әсер етуі мүмкін», — деп болжайды.
«Стейблкоиндардың мойындалуы биткоин секілді негізгі криптовалюталар үшін қатты серпін беруі мүмкін», — деп болжады KBW брокерлік компаниясының сарапшылары.
Стейблкоиндарды кімдер шығара алады?
— JPMorgan JPMD деп аталатын токен шығаруды жоспарлап отыр. Бұл — банк депозитінің цифрлық баламасы, яғни deposit token. Токен Coinbase компаниясы Ethereum негізінде жасаған Base атты ашық блокчейнде жұмыс істейді. Алайда бұл токен ашық нарықта болмайды, тек банктің институционалдық клиенттеріне ғана қолжетімді болады. Оны ұстаушылар депозит бойынша пайыз ала алады.
— Bank of America (BofA) да стейблкоин шығаруы мүмкін екенін өткен аптада банк басшысы Брайан Мойнихан мәлімдеді.
— Францияның Société Générale банкі АҚШ долларымен қамтамасыз етілген өз стейблкоинин шығаруды жоспарлап отырғанын айтты.
— Испаниялық Banco Santander цифрлық активтер саласындағы жұмысын кеңейтіп, өз стейблкоинин шығаруды ойластырып жатқанын Bloomberg хабарлады. Алайда банк бұл ақпаратты ресми түрде растамады.
— Walmart пен Amazon секілді ірі бөлшек сауда желілері де стейблкоин шығаруды немесе пайдалануды зерттеп жатыр. Бұл оларды дәстүрлі қаржы жүйесінен тыс қолма-қол және картамен төлемдерді өңдеуге көшіріп, комиссия шығындарын миллиардтаған доллар үнемдеуге мүмкіндік беруі мүмкін. Алайда Walmart бұл ақпаратты теріске шығарды, ал Amazon түсініктеме бермеді.
Қазір қандай стейблкоиндар бар?
— Капитализациясы бойынша ең ірі стейблкоин — USDT. Оны Tether атты блокчейн платформасы шығарады. Барлық токендердің жиынтық құны $155 млрд-тан асады.
— АҚШ президенті Дональд Трамптың криптовалюта жобасы — World Liberty Financial биыл USD1 деп аталатын стейблкоинның эмитенті атанды. CoinGecko деректеріне сәйкес, оның нарықтық капитализациясы шамамен $2,2 млрд.
— PayPal төлем алпауыты 2023 жылдың тамызында төлемдер мен аударымдарға арналған стейблкоин шығарып, мұндай қадамға барған алғашқы ірі финтех-компания болды.
— Paxos криптовалюта компаниясы екі стейблкоин жасап шығарды: Global Dollar (USDG) және Pax Dollar (USDP). Сонымен қатар, Paxos әлемдегі ең ірі криптобиржалардың бірі — Binance-пен серіктестікте BUSD токенін де шығарады.
