BlackRock АҚШ-тың ұзақмерзімді облигацияларынан бас тартуда
Әлемдегі ең ірі инвестициялық компанияның облигациялар жөніндегі директоры теңгерімді портфель үшін сенімді қаржы құралдарын дәстүрлі тәсілдерден тыс іздеу қажет деп есептейді. АҚШ-тың ұзақмерзімді мемлекеттік облигациялары қорғаныс құралы болудан қалды
АҚШ-тың ұзақмерзімді мемлекеттік облигациялары бұрынғыдай инвесторлар үшін қауіпсіз айлақ болудан қалды. Бұл туралы Business Insider басылымына BlackRock компаниясының жаһандық облигациялар нарығы бойынша инвестициялық директоры Рик Ридер мәлімдеді. Оның айтуынша, бұл облигациялар енді нарықтағы қауіптерді өтей алмайды және экономикалық құлдырау кезінде «сақтандыру» рөлін атқармайды. Сол себепті Ридер басқаруындағы қор құрылымын өзгертіп, икемдірек қаржы құралдарына басымдық беріп жатыр.
Жаңа стратегия 6,6% жылдық табысты қамтамасыз етіп отырған екі негізгі бағытқа негізделген: бірі — АҚШ-тағы қысқамерзімді облигациялар, екіншісі — Еуропадағы жоғары кірісті қағаздар, оларға кросс-валюталық своп арқылы қосымша табыс қосылады.
Қысқамерзімді облигацияларға пайыздық мөлшерлеме
Ридер қазіргі нарықтағы басты сын-қатерлердің бірі — нарықтың күрт әрі болжаусыз өзгеруі екенін айтады. Оның пікірінше, бұл құбылмалыққа Дональд Трамп әкімшілігінің қадамдарын қоса алғанда, саяси және экономикалық тұрақсыздық себеп.
«Бүгінде кез келген жаңалыққа реакция өте шұғыл. Нарық кейде тіпті өтімділіктен айырылады. Бірақ дәл осындай сәттерде тамаша мүмкіндіктер пайда болады. Олар 10 минут, бір сағат немесе бір күн ғана жалғасуы мүмкін», – дейді ол.
Сондықтан ол классикалық ұзақмерзімді стратегиялардың тиімділігі төмендеп жатқанын, қазір маңыздысы — тез әрекет ету екенін алға тартады. Осыған байланысты Ридер қысқамерзімді облигацияларды таңдады. Бұл қағаздар тұрақты табыс беріп, ұзақ ұстағанда туындайтын қосымша тәуекелдерден қорғайды.
Мысалы, АҚШ-тың екі жылдық облигациялары 2024 жылы 4,3%-дан 3,6%-ға дейін төмендегенімен, 2025 жылдың көктемінде қайта 4%-ға дейін өсті. Бұл оларды инвесторлар үшін қайта тартымды етті.
Қазіргі уақытта Ридердің басқаруындағы негізгі қор — 2023 жылдың мамырында іске қосылған iShares Flexible Income Active ETF. Қордың жалпы көлемі 9 млрд доллардан асады, жылдық табыстылығы — 6,6%.
Еуропалық облигацияларға қызығушылық
Ридер Еуропа нарығынан да әлеует көріп отыр. Ол B және BB рейтингтері бар еуропалық компаниялардың жоғары кірісті қағаздарына инвестиция салып жатыр. Оның айтуынша, бұл сегментте тұрақсыздық аздау болғандықтан, тәуекелі төмен табысқа қол жеткізуге болады.
Бұған себеп — АҚШ пен Еуроаймақ экономикасындағы айырмашылықтар. Еуропадағы инфляция төменірек, экономика баяу өсіп жатыр, ал Еуропа орталық банкі ақша-кредит саясатын жұмсартуға дайын. Бұл жағдай облигациялар нарығындағы пайыздық мөлшерлемелердің тұрақты болуына ықпал етеді.
«Еуропадағы пайыздық тәуекелді арттыру – АҚШ-тың ұзақмерзімді пайыздық мөлшерлемелерімен салыстырғанда, өте қызықты мүмкіндік болып тұр», – дейді Ридер.
Мысал ретінде ол 4 сәуірден бері АҚШ-тың 10 жылдық облигацияларының табысы 3,99%-дан 4,43%-ға дейін өскенін, ал Еуроаймақтағы осындай қағаздар небәрі 3 базистік пунктке ғана — 3,13%-дан 3,10%-ға дейін өзгергенін келтіреді. Бұл еуропалық нарықтың АҚШ-пен салыстырғанда әлдеқайда тұрақты екенін көрсетеді.
Қосымша табыс — валюта есебінен
Еуропадағы тұрақты пайыздық мөлшерлемелерден бөлек, Ридер валюта факторының да маңызды екенін атап өтеді. Доллардың еуроға қатысты әлсіреуі бұл инвестициялардың табыстылығын арттыра түседі.
«Кросс-валюталық своп арқылы еуропалық облигацияларға инвестиция салып, қосымша табыс табуға болады», – дейді ол.
Дегенмен Ридер тәуекелі жоғары активтермен шектелмейді. Қор құрылымындағы теңгерімді сақтау үшін ол AAA рейтингі бар сапалы құралдарды да қосады. Мысалы, құрылымдалған облигациялар арасындағы ең сенімді құрал саналатын қамтамасыз етілген несиелік міндеттемелерді (CLO) пайдаланады.
