Bloomberg Азиядағы қорғаныс компаниялары арасында 400%-ға жуық өскен акцияны тапты
Танымал емес австралиялық дрондарға қарсы жүйелерді әзірлеуші DroneShield компаниясының акциялары Азиядағы қорғаныс саласындағы ең жылдам өсуші бағалы қағаздар болды. Бұл өсімге Еуропа мен АҚШ үкіметтерімен жасалған бірқатар келісімшарттар түрткі болды.
Егжей-тегжейлі
2025 жылы DroneShield компаниясының акциялары 388%-ға қымбаттап, Bloomberg-тің қорғаныс компаниялары индексіндегі өңірлік бәсекелестерін басып озды. Қыркүйек айының басында аталған акциялар Австралия қор нарығының негізгі индексіне енгізілді, деп хабарлайды агенттік.
Bell Potter Securities сарапшысы Дэниел Лэингтің айтуынша биылғы жылы алынған келісімшарттардың көлемі сұраныстың өскенін көрсетеді және DroneShield бұл сұранысты қанағаттандыруға қауқарлы.
Алайда кейбір инвесторлар DroneShield акцияларының қарқынды өсуіне күмәнмен қарайды. Seneca Financial Solutions портфельдік басқарушысы Бен Ричардстың пікірінше, компанияның негізгі қаржылық көрсеткіштері оның қазіргі нарықтық құны — 3,2 млрд австралиялық доллар ($2,1 млрд) — үшін жеткіліксіз. Ричардс үшін алаңдататын белгі — директорлар кеңесінің бірнеше мүшесінің акциялар өсіп жатқанда оларды сата бастауы болды.
DroneShield не өндіреді
DroneShield ұрыс дрондарын бақылауға және істен шығаруға арналған шешімдер әзірлейді. Маусым айында компания 62 млн австралиялық доллар ($40 млн) сомасындағы Еуропалық тапсырыс берушілерден тарихындағы ең ірі тапсырысты алғаннан кейін, оның акциялары күрт өсті.
Жақында компания АҚШ Қорғаныс министрлігінен 5,2 млн доллар сомасында екі келісімшарт ұтып алды. Тамыз айында DroneShield бірінші жартыжылдықтағы табысы өткен жылмен салыстырғанда үш есеге артқанын хабарлады. Бұл өсімді компания өз қызметін негізгі нарығы — АҚШ-тан тыс, атап айтқанда, Еуропа мен Азия-Тынық мұхиты аймақтарында кеңейтумен байланыстырды.
Контекст
2025 жылы қорғаныс секторындағы акциялар әскери қақтығыстар мен геосаяси шиеленістер аясында өсіп жатыр — бұл көптеген елдерді қорғаныс бюджеттерін ұлғайтуға итермеледі.
Мысалы, Оңтүстік Кореяның Hanwha Aerospace компаниясы кеңестік жүйелерге қарсы қару өндірісіндегі тәжірибесінің арқасында пайда көріп отыр, ал Қытайдың қорғаныс компанияларының акциялары Бейжіңде өтетін Қытай тарихындағы ең ірі әскери парад қарсаңында өсті.
Research and Markets компаниясының 2025 жылға арналған нарық шолуы бойынша, дрондарға қарсы жүйелер нарығы алдағы бірнеше жылда $1,9 млрд (2024) көрсеткішінен $5,5 млрд (2029)-ға дейін өседі. 2024 жылы бұл нарықта Солтүстік Америка көш бастағанымен, алдағы жылдары Азия-Тынық мұхиты аймағы ең жылдам өсетін өңір болады деп болжайды зерттеу.
