Boeing 2026 жылы оң ақшалай ағынға оралуы мүмкін
Авиакосмос компаниясы Boeing 2026 жылы қайтадан оң ақшалай ағын қалыптастыра бастайды деп күтеді. Bloomberg жазғандай, бұл компания бірнеше дағдарыстан кейін балансын қалпына келтіруде маңызды кезең болмақ. Инвесторлар жаңалықты жақсы қабылдады: компания акциялары 10%-дан астам өсіп, сәуірден бергі ең жоғары күндік өсімді көрсетті.
Егжей-тегжейі
Компанияның қаржы директоры Джей Малаве 2 желтоқсанда UBS инвестициялық конференциясында Boeing келесі жылы бос ақшалай ағынды «бір таңбалы төмен пайыздар» деңгейінде (шамамен 1–3%) қайтара алады деп мәлімдеді. Бұл туралы Bloomberg хабарлады.
Bloomberg мәліметінше, бұл Boeing үшін үлкен алға жылжу болмақ. Компания 2025 жылдың қорытындысы бойынша 2 млрд доллар бос ақшалай ағын жоғалтады деп күтілуде. Малавенің бұл пікірі 2026 жылға берілген алғашқы нақты болжам. Бұл маңызды, себебі Boeing келесі жылы жеткізілімдерді арттыру және өндіріс тізбегін тұрақтандыру арқылы қалпына келуді жеделдетуді көздеп отыр.
Компанияның жылдық бос ақшалай ағымы 2023 жылдан бері оң көрсеткішке шықпаған. Биылға дейінгі онжылдықтың алғашқы жартысында Boeing жалпы 39 млрд доллар шығын жинады, оның ішінде өткен жылы — 13,1 млрд доллар.
Нарық қалай жауап берді?
Малаве мәлімдемесінен кейін Boeing акциялары 2 желтоқсанда 10,2% өсіп, 205,4 долларға жетті. Бұл — сәуірден бергі ең жоғары күндік өсім. Енді компания акциялары 2025 жылдың басымен салыстырғанда 16% қымбат.
Bloomberg Intelligence сарапшысы Джордж Фергюсонның айтуынша, бұл хабарлама инвесторлардың сенімін арттырды. Себебі қазан айында Boeing 777X лайнерінің тағы да кешігуіне байланысты 4,9 млрд долларды шығынға жазып, нарықта компанияны қалпына келтіру қабілетіне қатысты күмән күшейген еді.
Фергюсон Малавенің мәлімдемесі қосымша мәнге ие дейді, өйткені ол Boeing-ке сырттан келген: тамызда Lockheed Martin компаниясынан ауысқан. «Келесі жылға арналған жоспарлардың нақтылануы — Boeing операциялық жағынан дұрыс жолда екенін жақсы көрсетеді», — деді сарапшы.
Компания тағы не айтты?
Малаве айтуынша, ұзақ мерзімді перспективада Boeing бос ақшалай ағынды 10 млрд долларға жеткізу мақсатын сақтап отыр. Бұл мақсатты бұрынғы басқарушы команда 2025 жылға қойған еді, бірақ бірнеше дағдарысқа байланысты кейінге қалдырылған.
«Өндіріс көлемін арттырғанда бұл мақсатқа жетпеуге себеп жоқ. Біз 10 млрд долларды қамтамасыз ете аламыз деп толық сенемін», — деді Малаве.
Топ-менеджер Boeing зауыттарындағы өндіріс қарқынының жақсарғанын, әсіресе 737 Max және 787 Dreamliner бағдарламалары бойынша, сондай-ақ дайын тұрған ұшақтар қорын қысқартқанын атап өтті. Сонымен қатар, қорғаныс бөлімшесінің пайдасы өсіп, сатудан кейінгі қызмет көрсету бағытында тұрақты кеңею жүріп жатқанын айтты.
Сонымен бірге, 2026 жылы Boeing АҚШ Әділет министрлігіне 737 Max ұшақтарына байланысты екі апат жөніндегі істің аясында ірі төлем жасауға міндетті. Малаве сондай-ақ Max 10 моделінің сертификаттауы 2026 жылдың соңына дейін аяқталмайтынын, сондықтан кейбір жеткізілімдер 2027 жылға ауыстырылатынын ескертті.
Компания келесі жылы 8 млрд доллар қарыз өтеуі керек, ал Spirit AeroSystems компаниясын сатып алу аяқталғаннан кейін оның 3 млрд доллар қарызын да жабуы тиіс.
Сарапшылар не дейді?
Bloomberg жазғандай, сарапшылар Boeing 2026 жылы 2,46 млрд доллар бос ақшалай ағын көрсете алады деп есептейді. Бұл болжамдар шілдеден бері екі еседен көп төмендетілді, себебі 777X сертификаттауы тағы кешігіп, лайнер өндіріс кестесінен жеті жылдан астам уақытқа қалып қойған. Малаве бұл кешігу ақшалай есепте шамамен 2 млрд доллар «қысым» тудырып отырғанын айтты.
2 желтоқсанда Rothschild & Co Redburn Boeing акцияларын сатып алуды ұсынуды растады, бірақ мақсатты бағаны 6% төмендетіп, 270 доллардан 255 долларға түсірді. Дегенмен бұл баға да компания акцияларының қазіргі құнынан 24% жоғары. Сарапшылардың пікірінше, Boeing-тің үшінші тоқсан есебінен кейінгі төмендеуі акция сатып алу үшін жақсы мүмкіндік берген.
MarketWatch дерегінше, Boeing акцияларын қадағалап отырған 28 сарапшының 23-і «сатып алуды» ұсынады, төртеуі «ұстау» дейді, біреуі ғана «сату» қажет деп есептейді. Уолл-стриттің орташа мақсатты бағасы — 248,2 доллар, бұл қазіргі бағадан 21% жоғары.
