BofA Palantir акцияларының бағасын көтерді. Банк 18% өсімнің екі себебін атады
Bank of America әскери және азаматтық бағыттарға жасанды интеллект шешімдерін жасайтын Palantir компаниясының акцияларына жаңа жоғары баға қойды. Банк енді олардың нарықтағы құнын тағы 18% өседі деп күтеді. Инвестбанк Palantir-дың мемлекеттік және коммерциялық сектордағы күшті орнын атап өтті. Негізгі себеп ретінде Ұлыбритания Қорғаныс министрлігімен алғашқы миллиардтық келісімді және ерекше ЖИ-инженерлер тобын атады. Дегенмен, бұл көзқарас Уолл-стриттегі жалпы пікірден өзгеше: көптеген сарапшы бейтарап қалыпта қалып отыр және Palantir-ға деген үміт тым жоғары деп санайды.
Егжей-тегжейі
BofA сарапшысы Palantir акцияларының бағасын 180 доллардан 215 долларға көтеріп, «сатып алу» деген бағасын растады, деп хабарлады Barron’s. Жаңа баға 23 қыркүйектегі саудадағы жабылу деңгейінен 18% жоғары.
BofA-ның айтуынша, компанияның мемлекеттік сектордағы жетістіктері акцияның басты қозғаушысы болады. Өткен аптада Дональд Трамптың Лондонға сапары кезінде Palantir АҚШ-тан тыс алғашқы миллиард долларлық келісімге қол жеткізді. Ол — Ұлыбритания Қорғаныс министрлігімен бес жылдық келісім.
Сарапшылардың сөзінше, Palantir акцияларын көтеретін тағы бір фактор — Forward Deployed Engineers (FDE) немесе «Дельта» деп аталатын ЖИ-инженерлер тобы. Бұл мамандар қарапайым бағдарламашылардан өзгеше: олар тікелей клиентпен жұмыс істеп, Palantir-дың ЖИ негізіндегі бағдарламасын ұйымдардың нақты қажеттіліктеріне бейімдейді. BofA бұл тәсіл Palantir бизнесін, әсіресе коммерциялық бағытта, тезірек дамытуға көмектеседі деп санайды.
Осыған байланысты банк Palantir-дың табыс пен кіріс болжамын да көтерді. Енді олар 2026 жылы акцияға шаққандағы табыс 85 цент, 2027 жылы 1,14 доллар болады деп күтеді (бұрын 84 цент және 1,12 доллар). 2025–2030 жылдар аралығындағы орташа жылдық кіріс өсімін 23%-дан шамамен 35%-ға дейін көтерді.
Акция жағдайы
23 қыркүйектегі саудада Palantir акциялары 1,8%-ға өсіп, 182,55 долларға жетті. Бұл — 13 тамыздан бергі ең жоғары жабылу бағасы. Жыл басынан бері компанияның нарықтық құны 141%-ға артты. Салыстыру үшін: АҚШ-тың негізгі индексі S&P 500 осы кезеңде небәрі 13%-ға өсті.
23 қыркүйекте Boeing Palantir-мен келісім жасағанын хабарлады. Екі компания Boeing-тің қорғаныс және ғарыш саласына Palantir-дың ЖИ жүйелері мен бағдарламасын енгізбек. Келісімнің қаржылық шарттары жарияланбады. Сол күні Boeing акциялары 2%-ға қымбаттады.
Қазір Palantir акцияларының бағасы болашақтағы табысқа шаққанда (forward P/E) шамамен 228-ге тең. Бұл S&P 500 индексінің 23 көрсеткішінен әлдеқайда жоғары. Сол себепті Уолл-стриттегі көптеген сарапшы компания акцияларына сақтықпен қарайды. Palantir-ды бақылайтын 29 сарапшының 18-і акцияларды тек сақтап отыруға кеңес береді. Жетеуі сатып алуды ұсынады, ал төртеуі сатуды дұрыс көреді.
Уолл-стриттің орташа бағасы Palantir акциясына 155,5 доллар. Бұл — қазіргі деңгейден 15%-дан артық төмендеу дегенді білдіреді.
