Титандар шайқасы: неліктен әйгілі шортшы Эндрю Лефт Palantir-ге қарсы бәс тігуде?
Citron Research инвестициялық фирмасының негізін қалаушы әрі белгілі шортселлер Эндрю Лефт Palantir акцияларының шектен тыс қымбаттауын сынға алды. Әскери және азаматтық мақсатқа арналған жасанды интеллект шешімдерін жеткізетін компанияның бағалы қағаздары жыл басынан бері шамамен 140%-ға қымбаттап, S&P 500 индексінде көш бастады. Дегенмен, Лефт Palantir-дің ағымдағы нарықтық бағасын «ақылға қонымсыз» деп, әділ құны қазіргі деңгейден шамамен үш есе төмен болуы керек деп есептейді.
Ол қателесу ықтималдығын мойындап, акциялар әлі де өсуі мүмкін екенін айтады, бірақ нарықтағы ықтимал түзетуге дайын болу үшін Palantir-ді «шорт» позицияда ұстап отыр.
Лефттің уәжі
MarketWatch-тың жазуынша Эндрю Лефт Palantir-дің қазіргі бағасын жасанды интеллект тақырыбына қызыққан, негізінен жекелеген инвесторлар көтеріп отырғанын алға тартады. Басылым бұл жағдайды «екі титанның шайқасы» деп сипаттады.
Жыл басынан бері Palantir акциялары шамамен 140%-ға өсті. Нарықтық мультипликаторлар да рекордтық деңгейге жетті. Алдағы 12 айдағы болжамды пайдаға шаққандағы коэффициенті — 242, ал жылдық түсіміне шаққанда — 137. FactSet-тің дерегінше компанияның P/E көрсеткіші 290-ға жеткен.
«Мен коэффициенттерге қарауды қойдым, себебі олар шектен тыс ақылға сыйымсыз, — деді Лефт Fox Business-ке 13 тамызда. — Мұндай пайда коэффициентімен ешбір компания 50%-дан төмен түзетусіз қала алмайды».
Оның пікірінше Palantir — «оңай ақша табу» емес, керісінше шамадан тыс бағаланған және күткен нәтижелерді асыра сілтеген компания. Лефт компанияны және оның бас директоры Алекс Карпты жоғары бағалайтынын айтады, бірақ тіпті Nvidia-ның 2023 жылғы мультипликаторын қолдансақ та, Palantir акциялары қазіргі бағасынан үштен екіге арзан болуы тиіс.
Лефттің «әділ» бағалауынша акциялар $65–$70 шамасында болуы керек. «Мен абсолютті максимумды ұстап алуға тырыспаймын. Портфелім әртараптандырылған. Nasdaq-та ұзақ позициядағы бірнеше қағазым бар, мысалы Amazon мен Apple-ді жақсы көремін. Ал Palantir-ді нарық түзетілген жағдайда пайда көру үшін ғана шорттаймын», — дейді ол.
Басқа сарапшылар не дейді?
Уолл-стриттегі ең кең тараған ұсыныс — Palantir акцияларын сатпай, портфельде ұстау (29 сарапшының 17-сі Hold рейтингін берген). Сегізі ғана сатып алуды ұсынса (Buy және Overweight), төртеуі сатуға кеңес береді (Underweight және Sell).
Тамыз басындағы мықты қаржылық есептен кейін бірнеше аналитик Palantir акцияларына мақсатты бағасын көтергенімен, орташа консенсус бағасы әлі де ағымдағыдан төмен. Уолл-стриттің орташа таргеті — $153,4, бұл 13 тамыздағы жабылу бағасынан шамамен 17%-ға төмен.
