BofA жаһандық ақауға қарамастан Cloudflare акцияларына деген ставканы сақтап қалды
Жаһандық веб-трафиктің шамамен 20%-ы өтетін хостинг-провайдер Cloudflare акциялары ауқымды ақаудан кейін де Bank of America үшін тартымдылығын жоғалтқан жоқ. Уолл-стриттің ең ірі банктерінің бірі Cloudflare үшін ықтимал беделдік тәуекелдерді мойындайды, бірақ оқиғаның жағымсыз әсері минималды болады деп есептейді.
Егжей-тегжейлі
18 қараша күні Cloudflare қауіпсіздік жүйесіндегі ақау салдарынан жаһандық интернет бірнеше сағатқа тұрып қалғаннан кейін, BofA сарапшысы Томер Зильберман компания акциялары үшін «сатып алу» (Buy) рейтингін және қазан айының соңында белгілеген бір акцияға $255 мақсатты бағасын растады. Зильберманның пікірінше бұл инцидент Cloudflare үшін «жекелеген беделдік тәуекел» тудыруы мүмкін, бірақ ол ұзақмерзімді проблемаға айналмайды, деп хабарлайды Seeking Alpha.
«Cloudflare-дің соңғы ақауы ірі инфрақұрылымдық провайдерлерге тәуелділіктің сөзсіз тәуекелін көрсетеді: бұл өткен айда Amazon Web Services пен Azure жүйелеріндегі іркілістерден кейін орын алды», — деп еске салды Зильберман клиенттеріне. «Біз компаниядан ақауға қатысты қосымша түсініктеме күтеміз, алайда оқиғаның ұзақмерзімді ықпалы шектеулі болады деп санаймыз», — деді BofA сарапшысы.
Зильберман Cloudflare өнімдерінің клиенттер арасында жоғары адалдыққа ие екенін («жабысқақ болып қалатынын») және басқа провайдерлерге көшу шығындарының айтарлықтай болатынын атап өтті. Сонымен қатар, сарапшы компенсациялар мен жеңілдіктер ұсыну сервистің сенімділігіне деген сенімді қалпына келтіру барысында қысқамерзімді қысым туғызуы мүмкін екенін мойындады. Соған қарамастан, BofA Cloudflare компаниясының кірісі 2025 жылдың төртінші тоқсанында 31%-ға және 2026 жылдың бірінші тоқсанында 29%-ға жылдық өседі деген болжамын сақтап қалды — бұл Уолл-стрит күткен 28%-дан жоғары.
Акцияға қатысты Уолл-стриттің ойы
Уолл-стрит Cloudflare-ге қатысты тұрақты оптимизмін сақтап келеді. FactSet деректеріне сәйкес соңғы үш айда провайдер акцияларын сатып алуға кеңес беретін (Buy немесе Overweight рейтингтері бар) сарапшылар саны өзгерген жоқ (19). Сонымен бірге скептиктер лагері азайды: «ұстау» (Hold) ұсынымдары 14-тен 13-ке, ал «сату» (Underweight және Sell) ұсынымдары 3-тен 2-ге қысқарды, бұл консенсус-болжамды «нарықтан жоғары» (Overweight) деңгейінде күшейтті. Көптеген сарапшылар ралли әлеуетін көруде: акцияға орташа мақсатты баға $245, бұл Cloudflare бағамдарының жылдық перспективада 24%-ға өсуін білдіреді.
