BofA ЖИ-нарығында «көпіршік» жоқ екеніне төрт белгіні атады. Бірақ қандай қауіп көрді
Bank of America сарапшыларының айтуынша, жасанды интеллектке құйылған инвестициялардың жедел өсуі инфрақұрылымның шамадан тыс салынуына әкелуі мүмкін. Дегенмен, олардың бағалауынша, қазіргі жағдайды жиі салыстыратын дотком дәуіріндегі көпіршіктен айырмашылығын көрсететін төрт негізгі белгі бар.
Жасанды интеллектті дамытуға арналған дата-орталықтар құрылысының бумы 2000-жылдардың басындағы дотком көпіршігінен айтарлықтай ерекшеленеді және әлдеқайда тұрақты көрінеді, деп есептейді Bank of America сарапшыларының Вивек Арья жетекшілік ететін тобы. Сарапшылар инфрақұрылымның шамадан тыс салыну қаупі барын мойындайды, өйткені болашақтағы есептеу қуатына деген нақты сұранысты бағалау әлі де қиын, дейді MarketWatch. Алайда, қазіргі уақытта қаржы тиімдірек бөлініп, нарық теңгерімдірек күйде тұр, дейді олар. Олар бүгінде жағдайды сақ оптимистік тұрғыдан бағалауға мүмкіндік беретін төрт негізгі айырмашылық бар.
1. Есептеу қуаты шынымен де іске қосылған
Интернет дәуіріндегі «қараңғы талшық» кезеңінен айырмашылығы, қазіргі жасанды интеллект ресурстары белсенді түрде қолданылып жатыр, дейді BofA. Бұлттық қызмет жеткізушілер есептеу қуатын үнемі арттырып келеді. Сұраныс соншалық жоғары, тіпті үш жыл бұрын шығарылған Nvidia Hopper чиптері де толық жүктемемен жұмыс істеп тұр, деп атап өтеді сарапшылар.
Сонымен қатар ЖИ-инфрақұрылымының өсу шектеулері технологиялық «қызып кетумен» емес, физикалық факторлармен байланысты — энергия көлемі, дата-орталықтардың аумағы және су ресурстары. Сарапшылардың пікірінше, OpenAI секілді алпауыттар да осы ресурстар үшін бәсекелесіп отырған кең бұлттық экожүйенің бір бөлігіне айналады. Бұл жағдай нарықтың теңгерімді дамуына мүмкіндік береді.
Сонымен бірге жасанды интеллекттің таралуы телеком желілерін ауқымды жаңартуды қажет етпейді. BofA болжамынша, OpenAI үш жыл ішінде 1 миллиард пайдаланушыға жете алады. Ал Facebook-ке бұл межеге жету үшін сегіз жыл, Google-ға — он үш жыл қажет болған.
2. Компаниялардың өсуге арналған өз ресурстары бар
Банк сарапшыларының айтуынша, басты айырмашылық — 2000-жылмен салыстырғанда қаржыландыру көздерінде. Қазір жетекші бұлтты компаниялардың тұрақты операциялық ақша ағымы бар, ол капиталдық шығынды өз есебінен жабуға мүмкіндік береді. Егер дотком дәуірінде компаниялар қарыз қаражатқа тәуелді болса, бүгінде жасанды интеллект нарығындағы негізгі ойыншылар дамуды өздері қаржыландырып отыр: олар табыстың 25%-на дейінін инвестицияға бағыттайды, ал операциялық ақша ағымын 30%-дан жоғары деңгейде ұстап тұр.
3. ФРЖ тарапынан қолдау
BofA бағалауынша, тағы бір оң фактор — АҚШ Федералдық резерв жүйесінің пайыздық мөлшерлемелерді төмендетуді жалғастырады деген үміт. 2000 жылы, дотком көпіршігі жарылғанда және 2008 жылғы жаһандық қаржы дағдарысы кезінде нарықтағы құлдыраулар ФРЖ саясатының қатаюымен қатар жүрді. Ал бүгінде күтіліп отырған ақша-несие саясатының жұмсаруы инвестициялар үшін анағұрлым қолайлы жағдай жасап отыр, деп жазады сарапшылар.
4. Акциялардың ақылға қонымды бағалануы
BofA мәліметінше, қазіргі жасанды интеллект нарығының көшбасшыларының бағалауы интернет дәуіріндегі дотком-компаниялармен салыстырғанда әлдеқайда төмен. Мысалы, жасанды интеллект бумының басты бенефициары — Nvidia — қазір P/E мультипликаторы 29 деңгейінде саудалануда, яғни инвесторлар компанияның 2026 жылы күтілетін әрбір $1 пайдасы үшін $29 төлейді. Bank of America бағалауынша, бұл көрсеткіш чипмейкердің әлеуетімен салыстырғанда айтарлықтай төмен, яғни компанияның болашақта пайда табу қабілеті жоғары. Сарапшылар еске салғандай, дотком нарығының күйреуіне дейін Cisco, Nortel және Yahoo акциясының мультипликаторлары 100 және одан да жоғары деңгейде болып, нарықтың айқын қызып кетуін көрсеткен.
Қай жерде қауіп бар?
Сарапшылардың айтуынша, негізгі тәуекел нарықтың «қызып кетуінде» емес, АҚШ пен Қытай арасындағы сауда текетіресінің ушығуында жатыр. Әсіресе, бұл қақтығыс чип өндірісі үшін аса маңызды сирек кездесетін жер металдарды жеткізуге байланысты шиеленісуі мүмкін.
Bank of America өкілдері өздерінің сақ, бірақ оптимистік ұстанымда екенін атап өтті. Олар Nvidia, Broadcom, AMD және Credo Technology сияқты чипмейкерлерге, сондай-ақ жад, оптика және жартылай өткізгіш жабдық өндіретін серіктестеріне қатысты сенімділік сақтап отыр.
Контекст
Bank of America жүргізген соңғы сауалнама нәтижесіне сәйкес, әлемдік қорларды басқаратын менеджерлердің рекордтық бөлігі ЖИ-акцияларын асыра бағаланған және «көпіршіктің» шегінде тұр деп санайды, дейді Bloomberg. Қазан айында сұралғандардың 54%-ы технологиялық компаниялардың қағазы тым қымбат көрінеді деп жауап берген. Бас менеджерлер негізгі тәуекел ретінде ЖИ-нарығындағы көпіршікті атады, ал одан кейінгі қауіптер — инфляцияның өсуі мен ФРЖ тәуелсіздігін жоғалту қаупі. BofA стратегі Майкл Хартнетттің айтуынша, жасанды интеллектке қатысты алаңдаушылық — инвесторлардың толықтай «бұқалық» көңіл күйге көшуіне кедергі келтіріп отырған факторлардың бірі.
Соған қарамастан, нарықтың «қызып кетуіне» қатысты күмәндар артқанына қарамастан, менеджерлердің көзқарасы біршама оптимистік болып отыр: АҚШ акцияларына салынған инвестиция көлемі соңғы сегіз айдағы максимум деңгейге жетті, ал рецессиядан қорқу деңгейі 2022 жылдың басынан бергі минимумға түсті.
