BP биыл бизнесін екінші рет талдайды
Британдық мұнай-газ алыбы BP биыл екінші рет бизнестің тиімділігі мен шығындар бағдарламасына қайта қарауды бастайды. Ақпандағы стратегияның жаңаруы акциялардың құлдырауын тоқтата алмағандықтан, осындай шешім қабылданды. Компания басшылары капиталды дұрыс жұмсауға және артық шығынды азайтуға тырысып жатырмыз деп акционерлерді сендіру үшін қайта талдау жүргізуді қолға алды.
Егжей-тегжейлі
BP өз бизнесіне қайта талдау жасауды қыркүйекте бастайды. Бұл кезеңде директорлар кеңесінің жаңа төрағасы Альберт Мэнфолд қызметіне кіріседі, деп мәлімдеді компания басшысы Мюррей Очинклосс 5 тамызда тоқсандық есеп жарияланғаннан кейін, деп жазады Financial Times. Оның айтуынша, Мэнфолдпен компанияның бизнес портфелін «мұқият зерттеу» жоспары алдын ала талқыланған, басты мақсат – акционерлік құнды максималды арттыру. Сонымен қатар, BP «қосымша шығындарды қайта қарауды» қолға алады.
Қосымша талдау жүргізу қажеттілігі ақпанда жарияланған «іргелі стратегияны жаңартудан» кейін туындады. Ол инвесторлар тарапынан салқын қабылданып, компания акцияларының бағасына оң әсер етпеді, деп жазады FT. Осы орайда активистік инвестқор Elliott Management компаниядағы үлесін арттырып, әлдеқайда батыл әрекеттерге шақырды. Атап айтқанда, ол 2027 жылдың соңына дейін жыл сайынғы үнемді $4–5 млрд-қа жеткізу жөніндегі жоспардан бөлек, тағы да $5 млрд шығынды қысқартуды ұсынды.
BP акциялары Лондон биржасында 2%-дан астамға қымбаттады. Сәуірдегі минимумнан бері компанияның нарықтық құны 25% өскен.
BP қалай есеп берді?
Қиын жағдайға қарамастан, BP-дің екінші тоқсандағы қаржылық нәтижелері нарықтағы күтулерден асып түсті. Мұнай-газ алыбы $2,4 млрд көлемінде түзетілген таза пайда жариялап, бұл консенсус-болжамнан үштен бірге жоғары көрсеткіш болды. Компания тоқсандық дивидендті 4%-ға өсіріп, акцияларды кері сатып алу бағдарламасын $750 млн деңгейінде сақтап қалды.
Мұнай мен газ өндіру көлемінің алдыңғы тоқсанмен салыстырғанда шамамен 3% өсуі шикізат бағасының төмендеуін ішінара өтеді. Ақпанда жарияланған қайта құрылымдау жоспары аясында BP $1,7 млрд шығынды қысқартып, активтерді сатудан $3 млрд табыс тапты.
Сарапшылар пікірі
RBC Capital Markets сарапшысы Бирадж Борхатария BP-дің жаңа қайта қарауы өзінің пайда әкелетін Castrol майлау материалдары бизнесін сату жоспарын кейінге шегеруі мүмкін бе деген сұрақ қойды. Мәміле 2027 жылға дейін жүзеге асуы тиіс және компанияға $20 млрд табыс әкеледі деп күтілуде.
Контекст
BP — соңғы болып өткен тоқсанға қатысты пайда туралы деректерін жариялаған бес ірі мұнай-газ алпауытының («супермейджорлардың») бірі болды. Bloomberg-тің жазуынша, британдық Shell мен америкалық Exxon Mobil және Chevron күтілген нәтижеден жоғары пайда көрсетсе, француздық TotalEnergies болжамды ақтай алмады. Ал әлемдегі ең қымбат мұнай компаниясы — мемлекеттік Saudi Aramco 5 тамызда қатарынан оныншы тоқсанда пайдасының азайғанын хабарлады. Себебі өндірістің өсуі мұнай бағасының төмендеуімен теңестірілді.
Бұл есепті кезең мұнай нарығындағы жоғары құбылмалылықпен сипатталды. Бұған АҚШ президенті Дональд Трамп бастаған сауда соғысы, ОПЕК+ ұйымының өндіруге қойылған шектеулерді біртіндеп алып тастауы және Иран мен Израиль арасындағы қақтығыстың ушығуы әсер етті. Brent маркалы мұнай бағасы тоқсан ішінде шамамен 9% төмендеп, барреліне $70 шамасында тұрақтады —дәл осы көрсеткіш BP-дің қаржылық мақсаттарын есептеуде негіз ретінде алынады, деп жазады Bloomberg.
Бес жыл бұрын BP 2030 жылға қарай мұнай мен газ өндірісін 40% қысқартуды көздеп, жаңартылатын энергия көздеріне басымдық беруге шешім қабылдаған еді. Алайда бұл энергетикалық ауысымға жұмсалған шығындар компанияның кірістілігін төмендетіп жіберді: акционерлерге түсетін пайда көлемі Shell көрсеткішінен екі есе, ал Exxon-нан төрт есе аз болды. Нәтижесінде BP басшылық құрамын жаңартып, стратегиялық бағытын өзгертіп, мұнай мен газ секторына қайта басымдық беруге мәжбүр болды.
