Британдық миллиардер дискриминация ісі бойынша шешімге шағымданбақ
XTX Markets трейдинг компаниясының негізін қалаушы әрі Ұлыбританиядағы ең ірі салық төлеушілердің бірі Александр Герко, 2022 жылы Ресей азаматтығынан бас тартқан еді. Ол LinkedIn-де жариялаған жазбасында өз талабын қанағаттандырмаған Лондон сотының шешіміне шағымданатынын мәлімдеді. Герко аудиторлық және бухгалтерлік қызмет көрсететін Mazars компаниясын Теңдік туралы заңды бұзды деп айыптады. 2022 жылы компания XTX Markets-ке оның иесі ресейлік болғандықтан қызмет көрсетуден бас тартқан. Ал Mazars өз шешімін санкциялық талаптарды сақтау қажеттілігімен түсіндірген, бірақ миллиардер британдық санкциялар тізіміне енбеген.
Сот талап қоюға негіз жоқ деп шешіп, істі қабылдамады, өйткені компания XTX Markets-ке қызмет көрсетуден Ұлыбританияда емес, тек Франция мен АҚШ-та бас тартқан. Герконың айтуынша, егер компания Ұлыбританияда қызмет сұраған болса, Mazars-тың әрекеті Теңдік туралы заң бойынша дискриминация ретінде бағаланар еді. Ол XTX Markets-тің бас кеңсесі Ұлыбританияда орналасқанын және қызметкерлерінің көбі сол елде жұмыс істейтінін айтты. Сондай-ақ компания жалақыны есептейтін халықаралық серіктес іздегенін түсіндірді. «Сот неге біз Ұлыбританияда қызмет іздемеді деп шешті — түсініксіз», — деп жазды миллиардер.
Bloomberg миллиардерлер индексі бойынша, Александр Герконың байлығы $11,4 млрд деп бағаланады. 2023 жылы The Times басылымы оны Ұлыбританияда ең ірі салық төлеген кәсіпкерлер тізімінде бірінші орынға қойған.
