Чипмейкерге сенім азайды: BofA Marvell акциясын ұсынбайды
Marvell Technology ағымдағы тоқсанға жасаған болжамы инвесторлардың жоғары күтулерін көрсете алмағандықтан, Bank of America чипмейкер акциясына берген ұсынымын нашарлатты. Өйткені ірі бұлтты клиенттерге ЖИ-чиптердің жеткізілімі тұрақсыз болған, дейді Reuters. Нәтижесінде, BofA Marvell-дің ЖИ-ге арналған өнімдеріне сұраныс артады дегенге сенімін жоғалтты. Компанияның акциясы 29 тамыз, жұма күнгі саудада 18%-дан астамға құлдырады.
Егжей-тегжейлі
Marvell Technology екінші тоқсанға есеп жариялап, рекордтық табысты көрсеткенімен, ағымдағы тоқсанға күткеннен әлсіз болжам бергеннен кейін, Bank of America сарапшысы Вивек Арья чипмейкер акциясының рейтингін төмендетті. Енді ол бұл қағазды сатып алуды емес, портфельде ұстап тұруды ұсынады. Сарапшы сондай-ақ мақсатты бағаны $90-нан $78-ға түсірді. Жаңа таргетке қарамастан, акцияның әлі де 29 тамыздағы жабылу бағасымен салыстырғанда 24%-ға дейінгі өсу әлеуеті бар.
Marvell акциясының котировкасы бейсенбі кешкісін жарияланған есептен кейін жұма күні 18,6% төмендеп, $62,7 болды. Жыл басынан бері компания құнының 43%-ын жоғалтты.
Marvell есебі бәсекелестердің котировкасына да ықпал етуі мүмкін: жұма күнгі саудада Broadcom акциясы 3,6%, ал Nvidia — 3,3% арзандады.
BofA сенімін неге жоғалтты?
CNBC келтірген жұма күнгі жазбасында BofA сарапшысы тоқсандық есеп күткен деңгейде болғанымен, чипмейкер қағазының өсім перспективасына банктің сенімі азайғанын айтты. «Алдыңғы конференц-қоңыраулардан айырмашылығы, Marvell-дің ЖИ сегментіндегі қысқа және орта мерзімді перспективада өсімге қатысты бұрынғы сенімділігі мен ашықтығын естімедік», — деп ескертті Арья.
Оның айтуынша, қазір екі бағытта күшейген белгісіздік бар. Microsoft үшін Maia чиптерін өндіруді іске қосу мерзімі 2027 қаржы жылынан 2028-ге шегерілуі мүмкін. Сондай-ақ компанияның Amazon жобасына — AWS үшін жаңа буын ЖИ-чиптерін 3-нм техпроцеспен жасауға қаншалықты қатысатыны әзірге белгісіз.
«Нәтижесінде, біз дата-орталықтарға арналған өнім сатылымы өсіміне болжамды 2026 күнтізбелік жылына қатысты бұрынғы 23–25%-дық жылдық мәннен mid-teens деңгейіне (әдетте 14–16% диапазоны) дейін төмендетіп отырмыз», — деп түйіндеді сарапшы.
Басқа сарапшылар не дейді?
Marvell-дің табысының барған сайын үлкен үлесін Amazon мен Microsoft секілді бұлтты компанияға арналған жеке чиптер (custom silicon) қалыптастырып отыр. Олар Nvidia-ға тәуелділікті азайту үшін өз шешімдерін жасап жатыр, деп жазады Reuters.
Бұл ретте Microsoft үшін жаңа чип өндірісін іске қосудың шегерілуінде Marvell-дің кінәсі жоқ — мерзімді ірі технологиялық компанияның өзі жылжытқан. Кейбір сарапшы үлкен тапсырыстарға қатысты алаңдаушылық асыра айтылған деп санайды.
«Бұл кідіріс Marvell-дің пайдасына жұмыс істеуі мүмкін, себебі Microsoft компанияға тәуелділігін арттырады, — деді Reuters-ке Morningstar сарапшысы Уильям Кервин. — Инвесторды толғандыратын басты сұрақ — Marvell AWS пен Microsoft тапсырысын өзінде сақтай ала ма. Біз бұл тұрғыда оптимистерміз».
Summit Insights сарапшысы Кингай Чан Marvell акциясына бейтарап рейтинг қойып, компанияның әзірге ең ірі ойыншылармен салыстырарлық ауқымы жоқ екенін айтты. Оның сөзінше, гиперскейлерлер барған сайын бір жеткізушіге тәуелді болғысы келмейді, бұл чипмейкердің маржасына қысым жасауы мүмкін.
MarketWatch дерегінше, Marvell акциясын қадағалайтын 43 сарапшының басым бөлігі оларды сатып алуды ұсынады: 32 бағалау — Buy, тағы 3 — Overweight. Тағы сегізі қағазды портфельде ұстауға (Hold) кеңес береді. «Сату» рейтингі жоқ.
Компания қалай есеп берді?
Marvell-дің 2026 қаржы жылының шілдеде аяқталған екінші тоқсанындағы табысы өткен жылдың дәл осы кезеңімен салыстырғанда 58% өсіп, рекордтық $2,01 млрд болды — бұл LSEG сұратқан сарапшылардың болжамымен толық сәйкес келеді, деп жазады CNBC. Бас директор Мэтт Мерфидің айтуынша, сатылым өсіміне ЖИ-сегментіндегі сұраныстың артуы — тапсырыс чиптер мен компанияның оптоэлектрондық шешімдері де әсер еткен.
Салыстырылған бір акцияға шаққандағы пайда $0,67 құрап, Уолл-стрит болжамынан 1 центке асып түсті. Ал өткен жылғы екінші тоқсандағы $193,3 млн залалдың орнына биыл компания $194,8 млн таза пайда көрсетті.
Инвесторлармен өткізілген конференц-қоңырауда Мерфи үшінші тоқсанда табыс айтарлықтай өзгермей, шамамен $2,06 млрд деңгейінде қалатынын айтты. Reuters атап өткендей, сарапшылар $2,11 млрд болжап еді. Бұл Уолл-стритті алаңдатты, өйткені дата-орталықтар — ЖИ-инфрақұрылым жабдығына сұранысты көрсететін негізгі сегмент.
Дегенмен Marvell басшысы төртінші тоқсанда тапсырыс сегментінде өсім күтетінін айтты — бұл жылдың соңына қарай жеткізілім көлемінің арту мүмкіндігін көрсетеді.
