Citi: AMD мен OpenAI келісімінен пайда көретін акция 30%-ға өсуі мүмкін
Citi сарапшылары Astera Labs компаниясының акциялары шамамен 30%-ға өсуі ықтимал деп болжайды. Жасанды интеллект пен бұлтты инфрақұрылымға арналған аппараттық және бағдарламалық шешімдер әзірлейтін бұл компания AMD мен OpenAI арасындағы келісімнен негізгі бенефициарлардың бірі болады, деп түсіндіреді банк сарапшылары. Алайда Уолл-стриттің ортақ бағасы мұндай оптимизмді бөліспейді — сарапшылардың консенсус-бағасы қазіргі нарық бағасынан 9%-ға төмен. Айта кетейік, биылғы жылдың басынан бері Astera Labs акциясы 60%-ға өсті.
Егжей-тегжейі
Citi сарапшысы Атиф Малик Astera Labs акциясына Уолл-стриттегі ең жоғары мақсатты бағаны $275 деңгейінде қалдырды, деп жазады CNBC. Бұл мақсатты баға 17 қыркүйекте белгіленген. Қазір ол 7 қазан күнгі сауда жабылуындағы бағадан 29,7%-ға жоғары. Малик акцияны сатып алуға кеңес беруді жалғастырып отыр. Оның айтуынша, AMD мен OpenAI арасындағы келісімнен кейін Astera Labs акциясы күрт өсуі мүмкін.
7 қазан күнгі саудада Astera акциялары 3,9%-ға төмендеп, $212,1 деңгейінде жабылды. Бұған дейін дүйсенбі күні AMD мен OpenAI арасындағы миллиардтаған долларлық келісім туралы жаңалықтан кейін компания акциялары 10%-ға қымбаттаған еді.
Citi неге өсім күтеді?
Astera Labs бұлттық шешімдер мен деректерді өңдеу орталықтарына арналған жоғары жылдамдықты жартылай өткізгіш байланыс жүйелерін әзірлейді. Бұл жүйелер жасанды интеллект технологияларының жұмыс істеуін қамтамасыз етеді. Инвестбанктің түсіндіруінше, AMD мен OpenAI арасындағы келісім аясында Astera компаниясы AMD-нің 2026 жылы іске қосылатын Helios платформасы үшін негізгі желілік инфрақұрылымды жеткізеді.
Сондай-ақ Astera Labs AMD-мен серіктестік арқылы OpenAI-мен байланысты келісімнен қосымша пайда көруі мүмкін. Бұл келісім бірнеше жыл ішінде 6 гигаваттқа дейін қуат тұтынатын AMD Instinct жеделдеткіштерін кең көлемде енгізуді көздейді, дейді Малик.
Ол өз жазбасында былай деп көрсетеді: «Бұл жаңалық Astera Labs үшін оң әсер етеді. Себебі компания ашық желілік экожүйелердің көшбасшысы, оның ішінде AMD Helios платформасында қолданылатын UALink технологиясы да бар».
UALink — бұл жасанды интеллект чиптері мен коммутаторларын өзара байланыстыратын ашық өнеркәсіптік стандарт. Бұл технология жасанды интеллект модельдерін тиімді әрі ауқымды түрде оқыту мен қолдануға мүмкіндік береді. Стандартты UALink Consortium әзірлеген. Оның құрамында AMD, Intel, Broadcom, Cisco, Google, HPE және басқа ірі ойыншылар бар.
Маликтің пікірінше, Astera Labs ашық форматтағы rack-level шешімдердің кеңінен таралуынан да пайда көреді. Бұл компанияға әрбір жеделдеткіштен $1000-ға дейін табыс табуға мүмкіндік береді.
Басқа сарапшылар не дейді?
Evercore ISI тамыз айында Astera Labs акциясының мақсатты бағасын $104-тен $215-ке дейін көтеріп, «нарықтан жоғары» деген ұсынымын сақтады. Инвестбанк бұл компанияны жасанды интеллект саласындағы «таза актив» деп атады. Бұл бағаның өсуі екінші тоқсан бойынша табыстың күшті нәтижелерімен байланысты. Компанияның кірісі бір жыл бұрынғы кезеңмен салыстырғанда 150%-ға артып, $191,9 млн-ға жетті.
MarketWatch дерегіне сүйенсек, Astera Labs акцияларын бақылайтын 21 сарапшының 16-сы сатып алуға кеңес береді, төртеуі ұстауға, ал біреуі сатуға ұсыныс жасаған. Уолл-стрит сарапшыларының орташа бағасы $192,3, бұл қазіргі нарықтық бағадан 9,3%-ға төмен.
