Citi мен JPMorgan Қытайдың құнды акцияларын тарифтік тәуекелдерден қорған бола алады
АҚШ пен Қытай арасындағы жаңа сауда шиеленісі инвесторларға капиталдың бір бөлігін өсімге бағытталған акциялардан Қытай нарығының арзандау әрі қорғаныш сипаттағы сегменттеріне көшіруге себеп бола алады. Бұл туралы JPMorgan Chase пен Citi сарапшылары мәлімдеді.
Олар клиенттеріне тұрақты табысы бар және дивиденд төлеу тарихы қалыптасқан қытай банктерінің акцияларын сатып алуға, сондай-ақ ішкі нарыққа бағытталған дивидендтік компанияларға назар аударуға кеңес берді.
Егжей-тегжейлі
Citi сарапшылары Қытайдың ішкі нарығына бейімделген компаниялардың акцияларына инвестиция салуды ұсынды. Bloomberg агенттігінің хабарлауынша олар мұндай қағаздарды тарифтердің көтерілу қаупінен кейін түзетілген нарықта салыстырмалы түрде қауіпсіз таңдау деп санайды.
Сол күні JPMorgan Chase де өз клиенттеріне тұрақты табыс пен тұрақты дивиденд көрсеткіштері бар қытай банктерінің акцияларына назар аударуды ұсынды.
Басқа сарапшылар не дейді
Lotus Asset Management инвестициялар жөніндегі директоры Хао Хунның айтуынша алдағы апталарда Қытай қор нарығында өсу акцияларынан (growth stocks) құнды акцияларға (value stocks) қарай ауысу кезеңі басталуы мүмкін.
Оның сөзінше бұл екі категория арасындағы табыстылық айырмасы тарихи рекордқа жақындады және жуық арада орташа деңгейге қайта оралуы ықтимал.
Macquarie Capital сарапшылары инвесторларға инерциялық өсім көрсеткен акциялардан шығып, Қытайдағы тұтыну сұранысын ынталандырудан пайда табуы мүмкін компаниялардың қағаздарына көшуге кеңес берді.
Macquarie сарапшысы Юджин Сяо былай деп жазды: «Инвесторлар жоғары құбылмалылыққа ие брокерлік, фармацевтикалық және жартылай өткізгіш компаниялардың акцияларын сату және тұтыну сұранысын ынталандырумен байланысты салаларға — мысалы, тұрмыстық емес тауар өндірушілеріне — назар аударуы тиіс».
Контекст
13 қазанда Қытайдың қор индекстері соңғы 10 жылдағы ең жоғары деңгейінен күрт төмендеді.
Бұл құлдырауға АҚШ президенті Дональд Трамптың Қытай импортына қосымша 100%-дық баж салығын енгізу туралы ескертуі себеп болды. Ол бұл шараны Пекиннің сирек кездесетін металдар мен өзге де стратегиялық шикізат экспортына ауқымды шектеу қоюына жауап ретінде ұсынды.
Дегенмен, Bloomberg атап өткендей, Қытайдағы кейбір өсу сегменттері әлі де тартымдылығын жоғалтқан жоқ — әсіресе өндірісті жергіліктендіруге бағытталған компаниялар.
Мысалы, қытай чип өндірушілерінің акциялары 13 қазанда жалпы нарық құлдырағанына қарамастан өсті, себебі инвесторлар сауда шиеленісі Пекиннің технологиялық тәуелсіздікке және АҚШ импортына тәуелділікті азайтуға деген ұмтылысын күшейтеді деп күтеді.
Bloomberg агенттігінің байқауынша Қытай нарығы төзімділік танытты. Құлдырау сәуір айындағыдай ауыр болған жоқ — ол кезде Трамп алғаш рет жаңа тариф мөлшерін жариялаған еді.
Сонымен қатар, таңертеңгі сату толқынынан кейін индекстер күн соңында шығынның бір бөлігін өтей алды. Сауда күнінің екінші жартысындағы жылдам серпіліс инвесторлардың төмен бағамен белсенді сатып алуға кіріскенін көрсетеді.
