Citi сарапшысы Nvidia акциясының тағы 20% өсуін күтеді. Ол қандай тәуекелді ескертті?
Citi сарапшысы чип өндіруші Nvidia компаниясының мақсатты бағасын көтеріп, акциялары тағы 20% өседі деп күтуде. Оның айтуынша, негізгі өсім драйвері ретінде жасанды интеллект инфрақұрылымын дамытуға бағытталған мемлекеттік бастамаларды атап өтті. Дегенмен, сарапшы АҚШ үкіметінің чип экспортына қатысты шектеулері жаңа тәуекелдер туғызуы мүмкін екенін де ескертті.
Егжей-тегжейлі
Citi сарапшысы Атиф Малик Nvidia акцияларының мақсатты бағасын $180-нен $190-ға көтеріп, “сатып алуға болады” (Buy) деген кеңесін растады, деп хабарлайды MarketWatch. Жаңа мақсатты баға 7 шілдедегі жабылу бағасынан тағы 20% өсу мүмкіндігін білдіреді. Маликтің айтуынша, ЖИ нарығы қарқынды кеңейіп жатыр, және Nvidia бұл өсімнен әлі де пайда көре береді. Сондай-ақ, ол деректер орталықтарына арналған AI-чиптер нарығының көлемі 2028 жылға қарай $563 млрд-қа дейін өседі деп болжап отыр. Бұған дейін ол $500 млрд деп болжаған еді.
Маликтің пікірінше, Nvidia компаниясының негізгі өсім драйвері — «суверенді ЖИ-дің» жедел дамуы болады. Бұл — мемлекеттердің өз жасанды интеллект инфрақұрылымын құруға бағытталған ауқымды бастамалары. Қазірдің өзінде бұл бағыт Nvidia-ға 2025 жылы миллиардтаған доллар табыс әкелуі мүмкін, ал келесі жылы оның бизнесіндегі үлесі одан әрі өседі.
Сарапшының айтуынша, Nvidia алдағы бірнеше жылда ондаған гигаватт есептеу қуатына тікелей қол жеткізе алады — бұл компанияға мемлекеттік және корпоративтік жасанды интеллект инфрақұрылымын салуға мүмкіндік береді. Ол сондай-ақ Nvidia бүгінде дерлік барлық мемлекеттік ЖИ жобаларына қатысып жатқанын атап өтті. Сарапшының пікірінше, бұл жағдай компанияны жаһандық ЖИ-инфрақұрылым үшін бәсекеде басты ойыншылардың біріне айналдырады.
Маликтің айтуынша, Nvidia биылғы қаржы жылының соңына дейін түзетілген жалпы табыс маржасын шамамен 75%-ға дейін қалпына келтіре алады. Сарапшы компанияның жаңа буындағы Blackwell архитектурасына көшу кезінде туындаған негізгі қиындықтарды еңсергенін атап өтті. Оның бұл сенімі GB200 Blackwell чиптерінің сәтті іске қосылуымен және жаңа GB300 чипінен үлкен үміт күтілуімен күшейіп отыр.
Қандай тәуекел болуы мүмкін?
Сарапшы жаңа тәуекел туралы ескертті: Дональд Трамп әкімшілігі Оңтүстік-Шығыс Азияға, нақтырақ айтқанда Малайзия мен Таиландқа, жасанды интеллект чиптерін экспорттауға шектеу қоюы мүмкін. Bloomberg мәліметінше, бұл шара АҚШ чиптерінің Қытайға қайта сатылуын болдырмау үшін қарастырылып жатыр. Себебі Қытайға мұндай чиптерді тікелей жеткізуге АҚШ-та қазірдің өзінде тыйым салынған. Әзірге бұл тек талқылау деңгейінде, нақты шешім әлі қабылданған жоқ. Маликтің ойынша, мұндай шектеу Nvidia үшін орташа деңгейдегі қауіп тудырады, бірақ Citi бағалауы бойынша компания өз GPU чиптерінің қайда жеткізілетінін бақылауға мүмкіндік беретін сенімді жүйелерге ие.
Акциялардың жай-күйі
8 шілдедегі саудада Nvidia акциялары 1% өсіп, бір дана үшін $159,7-ге жетті. Компания акциялары тарихи максимумға жақын, ал оның нарықтық құны $4 трлн-ға алғаш жетуі мүмкін. Бұл межеге жету үшін акциялар бағасы 7 шілдедегі жабылу бағасынан тағы 1,4% өсіп, $160,46-дан төмен болмауы керек, деп жазады MarketWatch. 7 шілде қорытындысы бойынша, Nvidia-ның нарықтық капитализациясы $3,85 трлн болды (бір акция бағасы — $158,24). Бұл көрсеткіш бойынша компания әлемдегі ең қымбат жария компанияға айналды.
2025 жылдың басынан бері Nvidia-ның нарықтық құны 18% өсті, ал сол кезеңде АҚШ-тың негізгі қор индексі S&P 500 небәрі 6%-ға ғана көтерілген.
Басқалар не дейді?
Сейсенбі күні Bernstein сарапшысы да Nvidia акцияларын сатып алуға кеңесін растады, ал мақсатты бағасын $185 деп көрсетті. Инвестбанк өкілдерінің айтуынша, жасанды интеллект саласындағы серпіліс пен көптеген деректер орталықтарының салынуы Nvidia-ны ерекше тиімді жағдайға қойып отыр. «Деректер орталықтары нарығы — бұл орасан зор мүмкіндік, әрі ол әлі даму жолының басында тұр. Сондықтан бұл сегментте өсуге айтарлықтай әлеует бар», — деп жазды сарапшы өз жазбасында. Бұл пікірді CNBC келтіреді.
Сондай-ақ, Nvidia-ға рейтинг берген сарапшылардың 90%-ы акцияны сатып алуға кеңес береді, ал олардың орташа мақсатты бағасы — $174, бұл 7 шілдедегі жабылу бағасынан тағы 10% өсу мүмкіндігін білдіреді.
