Citigroup Ресейдегі банкін сатады. Акцияларына не болды?
Америкалық ірі банк Citigroup Ресейдегі еншілес банкін сату үшін Кремльден рұқсат алды. Бұл банкті «Ренессанс Капитал» компаниясы сатып алады.
Ресей президенті Владимир Путин 12 қарашада осыған байланысты жарлыққа қол қойды. Құжатта мәміле жайлы қосымша мәліметтер жоқ. Қазір Батыс компаниялары Ресей нарығынан кету үшін арнайы рұқсат алуы керек. Сонымен қатар, активтерін жеңілдікпен сату және Ресей бюджетіне міндетті төлем жасау сияқты талаптарды орындауы тиіс, деп түсіндіреді Bloomberg.
Citigroup акциялары Нью-Йорк биржасындағы премаркетте 0,4% өсті. Биыл олар 43%-ға қымбаттап, 2008 жылдан бері алғаш рет бір акцияның бағасы $100-ден асты.
Citigroup Ресей нарығында қалған ірі батыс банктерінің бірі болды. 2021 жылы бұл компания Ресейдегі бөлшек сауда бизнесінен шығатынын хабарлаған. Бұл шешім банктың негізгі емес нарықтардан кету жоспарына сай қабылданған. 2022 жылы Citigroup Ресейдегі еншілес банкінің жұмысын дерлік тоқтататынын айтты. 2022 жылдың тамызындағы мәлімет бойынша, Ресейден кетуге байланысты шығын $170 млн деп бағаланған. Бұл қаржы негізінен қайта құрылымдауға және жеткізушілермен келісімшартты бұзғаны үшін өтемақы төлеуге жұмсалған.
