«Экономика әлі де тұрақты»: АҚШ-тың төрт ірі банкі есеп берді

АҚШ-тың ең ірі төрт банкі — JPMorgan, Goldman Sachs, Citigroup және Wells Fargo жаңа есеп беру маусымын сенімді әрі тосынсыйсыз бастады, деп жазады Quartz. Барлық төрт банктің де үшінші тоқсандағы табысы мен пайдасы Уолл-стрит болжамынан жоғары болды. Бұған сауда операцияларының жандануы, бірігу және сатып алу мәмілелерінің артуы, сондай-ақ IPO нарығының қайта жандана бастауы әсер етті. Инвестбанк басшыларының айтуынша, АҚШ экономикасы тұрақтылығын сақтап тұр, бірақ қауіптің әлі бар екенін ескертті.

Алайда күткеннен жақсы нәтиже көрсетілгеніне қарамастан, инвесторлардың реакциясы әртүрлі болды: JPMorgan мен Goldman Sachs акциясы 14 қазандағы саудада құлдырады, ал Citi мен Wells Fargo қағазы күрт өсті.

Банктер қандай нәтижеге қол жеткізді және неге JPMorgan мен Goldman Sachs үшін бұл сәуірден бергі ең нашар күн болды — төменде баяндаймыз.

JPMorgan 

АҚШ-тағы ең ірі банк — JPMorgan Chase & Co үшінші тоқсандағы пайдасы жылдық мәнде 16% өсіп, акцияға шаққанда $5,07 болды. MarketWatch FactSet дерегіне сүйене отырып хабарлағандай, бұл көрсеткіш Уолл-стрит болжамынан 4,5% жоғары, бірақ 2024 жылдың екінші тоқсанынан бергі ең төменгі асыра орындау деңгейі саналады. Банктың үшінші тоқсандағы табысы да болжамнан 2% артық болып, $46,43 млрд-қа жетті, ал сарапшылар небәрі $45,47 млрд күткен. Bloomberg мәліметінше, JPMorgan-ның таза пайыздық кірісі $24 млрд болды, бұл Уолл-стрит күткен $24,1 млрд-тан сәл төмен.

Банктың бас директоры Джейми Даймон барлық негізгі бизнес бағыттары үшінші тоқсанда жақсы нәтиже көрсеткенін айтты. Оның сөзінше, инвестициялық-банктік қызметтерден түсетін комиссиялар 16% артқан, оған акционерлік капитал нарығының және бірігу мен сатып алу мәмілелерінің жандануына байланысты өсім әсер еткен.

Джейми Даймонның айтуынша, нарықтағы белгісіздік жоғары деңгейде, оған геосаяси шиеленіс, сауда және тарифтік тәуекелдер, активтердің шамадан тыс қымбат бағалануы және инфляцияның ұзақ уақыт жоғары деңгейде сақталу қаупі әсер етуде. Ол сондай-ақ банктың осы факторлардың ықпалын азайту үшін әртүрлі даму сценарийлеріне дайындалып жатқанын айтты. Даймон атап өткендей, соңғы бірнеше жылда несие беру жағдайлары қолайлы болып келгенімен, экономика баяулаған жағдайда банктер бірқатар несиелер бойынша залалдың өсуімен бетпе-бет келуі мүмкін.

Reuters LSEG дерегіне сілтеме жасап хабарлағандай, JPMorgan төртінші тоқсанда таза пайыздық кірісін $25 млрд деңгейінде болжайды, ал сарапшылардың орташа болжамы — $24,67 млрд. 2025 жылдың қорытындысы бойынша банк бұл көрсеткішті шамамен $95,8 млрд деңгейінде күтуде, бұл сарапшылардың болжамынан $400 млн жоғары.

Wells Fargo 

Wells Fargo банкінің үшінші тоқсандағы пайдасы өткен жылдың сәйкес кезеңімен салыстырғанда $1,42-дан $1,66-ға дейін өсіп, FactSet консенсус-болжамындағы $1,55-дан жоғары болды. Банктың табысы $21,44 млрд-қа дейін артты, ал нарық қатысушылары $21,15 млрд күтті. Таза пайыздық кіріс $260 млн-ға өсіп, $11,95 млрд болды, бірақ бұл FactSet болжамындағы $12,03 млрд-тан сәл төмен. MarketWatch атап өткендей, банк бұл көрсеткіш бойынша сарапшылар болжамын соңғы рет 2024 жылдың төртінші тоқсанында ғана асыра орындаған.

Бас директор Чарли Шарф банк соңғы үш жылдағы несие берудің ең жоғары тоқсандық өсіміне қол жеткізгенін айтты. «Белгілі бір белгісіздік сақталғанымен, АҚШ экономикасы тұрақты, ал біздің клиенттеріміз бен серіктестеріміздің қаржылық жағдайы берік, — деді ол.

Goldman Sachs 

Goldman Sachs банкінің үшінші тоқсандағы пайдасы жылдық мәнде 46% өсіп, акцияға шаққанда $12,25 болды. Бұл көрсеткіш FactSet консенсус-болжамынан ($11,03) 11% жоғары шықты. Компанияның табысы да Уолл-стрит күткеннен асып, $15,18 млрд болды — бұл банк тарихындағы үшінші ең жоғары көрсеткіш. Табыстың жылдық өсімі 20%-ды құрады, ал сарапшылар $14,12 млрд болжаған еді. Акция операцияларынан түскен кіріс 7% өсіп, $3,74 млрд болды. Бұл S&P 500 индексінің жаңа тарихи максимумдарға жетуімен байланысты, бірақ көрсеткіш сарапшылардың $3,9 млрд болжамынан төмен қалды. MarketWatch мәліметінше, бұл — 2021 жылдың төртінші тоқсанынан бері алғаш рет банктың Уолл-стрит болжамына жете алмаған жағдайы.

Goldman Sachs Group бас директоры Дэвид Соломон мұндай нәтижелер инвестициялық-банктік қызметтің жандануымен, соның ішінде бірігу мен сатып алу мәмілелерінің артуы және АҚШ-тағы IPO нарығының қайта жандануы есебінен болғанын айтты. Ол сондай-ақ, банктың жыл соңына дейін және 2026 жылы бірігу мен сатып алу нарығы үшін неғұрлым қолайлы орта күтіп отырғанын атап өтті, егер макроэкономикалық күйзелістер орын алмаса. «Біз жағдайдың тез өзгеруі мүмкін екенін білеміз, сондықтан тәуекелдерді тиімді басқаруға ерекше назар аударуды жалғастырамыз», — деп ескертті Соломон.

Citigroup 

Citigroup банкінің үшінші тоқсандағы пайдасы акцияға шаққанда $1,86 болды, ал FactSet консенсус-болжамы $1,73 еді. Банктың табысы да Уолл-стрит күткеннен жоғары болып, $22,1 млрд-қа жетті (күтілгені — $21,09 млрд). Barron’s атап өткендей, Citi де өз бәсекелестері сияқты бірігу мен сатып алу нарығындағы белсенділіктің артуынан пайда көрді.

Бас директор Джейн Фрейзер мұндай нәтижелерге ұйымдық құрылымды оңайлату және жаңартылған стратегияны жүзеге асыру ықпал еткенін айтты. «Біздің трансформация, жаңартылған стратегия және құрылымды жеңілдету — Citi-дің бәсекеге қабілеттілігін түбегейлі жаңа деңгейге шығарды», — деді ол.

Сонымен қатар, Citigroup жыл қорытындысы бойынша болжамын жақсартты: енді банк табысы $84 млрд-тан жоғары болады деп күтеді (шілдедегі болжам — $84 млрд шамасында еді). Ал FactSet сарапшыларының орташа консенсус-болжамы — $85,02 млрд.

Акция ахуалы

Төрт ірі инвестициялық банктың барлығы пайда мен табыс бойынша Уолл-стрит болжамдарынан асыра орындағанына қарамастан, 14 қазандағы саудада акциясы әртүрлі динамикада қозғалды. JPMorgan акциясы бір сәтте 4,5% құлап, $294,2 деңгейіне түсті. Barron’s дерегінше, бұл — 4 сәуірден бергі ең ірі біркүндік төмендеу. Кейін қағаз құлдырау қарқынын 1% баяулатты. Жыл басынан бері компанияның нарықтық құны 27%-дан астам плюсте.

Goldman Sachs қағазы 5,6% төмендеп, $742,4 болды — бұл 10 сәуірден бергі ең үлкен пайыздық құлдырау. Кейін котировка да шығынның бір бөлігін өтеді. 2025 жылдың басымен салыстырғанда, Goldman акциясы 36%-дан астам плюсте.

Citigroup акциясы керісінше 4,72% күрт өсіп, $100,7 деңгейіне жетті. Жыл басынан бері инвестициялық банктің нарықтық капитализациясы шамамен 43% артқан.

Wells Fargo котировкасы бірден 8% шарықтап, $85,3 болды, ал жыл басынан бері 21% плюсте. Aptus Capital Advisors компаниясының сарапшысы Дэвид Вагнер Reuters-ке берген түсініктемесінде өткен тоқсанды Wells Fargo үшін «үміттендіретін кезең» деп атап, «Компанияның активтер лимиті оның әлеуетін қалай тежеп келгенін көрсетті», — деді ол.

«Ең маңызды түсіну керек нәрсе — нәтижелердің болжамнан жақсы болғанында емес, осы компаниялардың акциясы қазір тарихи максимумға жақын саудаланып жатқанында», — деп түсіндірді нарықтағы динамиканы B Riley Wealth компаниясының бас нарық стратегі Арт Хоган. Соңғы айларда банктердің акциясы ставкалардың төмендеуін күту және жасалған мәмілелер көлемінің артуы аясында қатты өсім көрсетті, дейді MarketWatch.