«Дүрілдеген 20-жылдар»: Yardeni неге S&P 500 индексі 70%-ға өседі деп санайды?
АҚШ-тың жетекші биржалық индексі қазір тарихи шегінен небәрі 2%-ға ғана төмен саудаланып жатыр.
АҚШ-тың Ирандағы ядролық нысандарға жасаған соққысы және оған Тегеранның ұстамды жауап беруі алдағы бес жылда S&P 500 индексінің шамамен 70%-ға өсуіне түрткі болуы мүмкін, дейді Yardeni Research компаниясының президенті әрі бас инвестициялық стратег Эд Ярдени. Оның айтуынша, бұл – экономика шарықтаған жаңа «дүрілдеген жиырмасыншы жылдардың» сценарийіне сай келеді. Орта Шығыстағы жағдайды нарық үшін оң деп бағалап отырған өзге сарапшылар да бар. Мәселен, Morgan Stanley геосаяси оқиғаларға байланысты нарықтағы құбылмалылық әдетте қысқа мерзімді әрі шамалы болады деп есептейді.
Толығырақ
АҚШ 22 маусымға қараған түні Иранның ядролық нысандарына соққы жасап, өзінің әскери күшпен тежеу қабілетін қалпына келтірді және президент Дональд Трамптың «күш арқылы бейбітшілік» деген ұранына нақты негіз берді деп есептейді Эд Ярдени. Оның ойынша, бұл жағдай «дүрілдеген 20-жылдардың» басталуына жол ашып, 2030 жылға дейін S&P 500 индексі 10 000 пунктке дейін өсуі мүмкін. Бұл 20 маусымдағы жабылу деңгейімен салыстырғанда 67%-ға жоғары көрсеткіш.
Ярденидің бастапқы сценарийі бойынша, Тегеран АҚШ-тың шабуылына қатаң жауап бермей, бейбіт шешімге ұмтылады деп күтілген. Бұл жағдайда мұнай бағасы төмендеп, әлем бойынша қор нарықтары өсіп, алтын арзандайды деп болжаған. Сарапшының пайымынша, алтын бағасының төмендеуі оны орталық банктер үшін тиімді инвестиция құралына айналдырады, себебі олар резервтерін әртараптандыруды жалғастырады.
23 маусымда Иран АҚШ-тың Катардағы әскери базасына соққы жасағанымен, Bloomberg дереккөздері мұны алдын ала келісілген әрекет деп бағалады. Reuters дереккөздерінің мәліметінше, Иран шабуыл алдында АҚШ-ты ескерткен.
«Біз үшін, инвестициялық стратегтер үшін ең маңызды қорытынды — АҚШ акциялар нарығындағы “бычий” (өсуге бағытталған) үрдіс 2022 жылдың қазанынан бері жалғасып келеді», — деді Ярдени. Ол S&P 500 индексі осы жылдың соңына дейін 6 500 пунктке жетеді деп болжайды. Бұл 22 маусымдағы деңгеймен салыстырғанда шамамен 9%-ға жоғары.
Басқа сарапшылар не дейді?
Bloomberg хабарлауынша, Morgan Stanley сарапшылары (Майкл Уилсонның жетекшілігімен) жағдайға байсалды оптимизммен қарайды. Олар геосаяси шиеленістерге байланысты биржадағы төмендеулер әдетте қысқа мерзімді және шектеулі болады деп есептейді. Мысалы, мұндай оқиғалардан кейін S&P 500 индексі бір айда орта есеппен 2%, үш айда — 3%, бір жылда — 9% өсім көрсеткен. Уилсонның айтуынша, нарықтың келешек бағыты мұнай бағасына байланысты болмақ: егер ол барреліне 120 доллардан асып кетсе, экономикалық циклге қауіп төнуі мүмкін.
«Қазір бізге төнетін қауіптерді түсінеміз, бірақ олар әзірге алыс көрінеді», — деді Уилсон.
23 маусымдағы Иран шабуылдарынан кейін Brent маркалы мұнай бағасы 7%-ға құлдырап, 1 баррель үшін 72 доллардан төмендеді. Ал S&P 500 индексі керісінше 0,8%-ға өсіп, 6014 пунктке жетті. Бұл – тарихи максимумнан шамамен 2%-ға ғана төмен.
«Көпшіліктің пікірі бойынша, қазір Иран ядролық қару жасау мүмкіндігінен 20 маусымға қарағанда алшақ тұр. Бұл – нарық үшін және Орта Шығыстағы жағдайдың бейбіт шешім табу ықтималдығы үшін оң фактор», — деді CNBC арнасына берген сұхбатында Уортон бизнес мектебінің қаржы профессоры, Wisdom Tree компаниясының бас экономисі Джереми Сигел. Оның айтуынша, егер Тегеран тарапынан қатаң әрекет болмаса, S&P 500 индексі алдағы апталарда-ақ жаңа тарихи рекорд орната алады.
