Deutsche Bank 1600% өсім көрсеткен жасанды интеллект акциясына бәс тікті
Дата-орталықтарға арналған технологияларды жеткізуші Vertiv компаниясы жасанды интеллект төңірегіндегі бумның негізгі бенефициарларының біріне айналды. Алайда Deutsche Bank сарапшыларының пікірінше соңғы үш жылда 1600%-дан астам өскен бұл акцияның раллиін өткізіп алған инвесторлар да әлі үлес қоса алады, бірақ әрине, бұрынғыдай ауқымда емес.
Егжей-тегжейлі
Vertiv (бұрынғы атауы — Emerson Network Power) акцияларының қазіргі бағасы болашақ кіріске (forward P/E) қатысты жоғары болып көрінеді. Бірақ бағаның өсу қарқынын ескеретін табыс коэффициенті (PEG) бойынша бұл бағалау салыстырмалы түрде арзан, дейді Deutsche Bank аналитигі Николь Деблейз.
Оның есептеуінше Vertiv акциялары мультисалалық және электротехникалық сектордағы ұқсас компаниялармен салыстырғанда PEG көрсеткіші бойынша төмен квартильде орналасқан. Бұл олардың нарықтық бағасы салыстырмалы түрде төмен екенін білдіреді, деп жазады MarketWatch.
Деблейз акциялардың мақсатты бағасын $168-ден $216-ға дейін көтерді, бұл шамамен 20% өсу әлеуетін көрсетеді.
Оның айтуынша, егер нарықтағы жағдай оңтайлы сценарий бойынша дамыса, баға $230-ға дейін, яғни қазіргі деңгейден 27% жоғары көтерілуі мүмкін.
Сарапшының пайымдауынша, егер ірі технологиялық компаниялар жаңа AI-жобаларын жариялай берсе, бұл болжам да «аса оптимистік емес» болып қалуы ғажап емес.
Контекст
Morgan Stanley-дің мәліметінше биыл жетекші технологиялық алпауыттар — Alphabet, Amazon, Meta, Microsoft және CoreWeave — нейрожелілер инфрақұрылымына $400 млрд инвестиция салуды жоспарлап отыр.
Жасанды интеллект бумының басты ойыншысы — OpenAI — соңғы апталарда Nvidia, AMD және Broadcom сияқты ірі чип өндірушілерімен стратегиялық келісімдерге қол қойды.
Reuters-тің дерегінше бұл келісімдердің жиынтық инвестициялық көлемі $1 трлн-нан асып түсуі мүмкін. Мақсат — есептеу қуатын 26 гигаваттқа дейін арттыру, бұл шамамен 20 млн америкалық үйдің энергия тұтынуына тең.
Meta Platforms те бірнеше гигаватт қуатқа ие AI-дата орталықтар салып жатыр. Олардың ішінде 2026 жылы іске қосылатын Prometheus жобасы және қуаты 5 гигаваттқа дейін жететін Hyperion орталығы бар.
Мұндай ірі мәмілелер тізбегіндегі соңғысы — Aligned Data Centers компаниясының $40 млрд-қа сатылуы болды.
Сатып алушылар қатарында Nvidia, Microsoft және BlackRock бар инвесторлар тобы аталды.
