OpenAI-мен жасалған мәміле Broadcom-ға $40 млрд жылдық табыс әкеледі — сарапшы
Melius Research сарапшысы Бен Райтзестің айтуынша, OpenAI-пен мәміле чип өндіретін Broadcom табысына айтарлықтай өсім әкеледі. Жоба туралы 13 қазан, дүйсенбі күні хабарланған. Маржасы Broadcom-ның басқа бизнес бағыттарымен салыстырғанда төмен болуы мүмкін, бірақ кіріс пен пайданың өсу әлеуеті тәуекелдерді толығымен ақтайды, деп санайды сарапшы.
Егжей-тегжейлі
MarketWatch хабарлауынша, Melius Research сарапшысы Бен Райтзес ChatGPT платформасын жасаған OpenAI мен Broadcom арасындағы жаңа мәміле чип өндірушіге кірістің айтарлықтай өсуін қамтамасыз етеді деп санайды.
Райтзестің айтуынша, мәміле Broadcom бас директоры Хок Танның ағымдағы қаржы жылын мен келесі жылы ЖИ-чиптерден түсетін табысты екі еселеу жөніндегі жоспарын толықтыра түседі. Сонымен қатар, бұл келісім екі компания арасындағы ұзақ мерзімді серіктестіктің бастамасы болуы мүмкін, дейді сарапшы.
OpenAI мен Broadcom бірлесіп 10 гигаватт қуаттылықтағы жасанды интеллект процессорларын жобалап, шығарып және енгізетінін мәлімдеді. Райтзестің есебінше, әр гигаватт қуаттан түсетін жалпы кіріс шамамен $20 млрд-ты құрауы мүмкін, бұл жыл сайынғы табыстың шамамен $40 млрд-қа өсу әлеуетін білдіреді. Салыстырмалы түрде, Broadcom-ның ЖИ-бағыты 2024 қаржы жылында $12,2 млрд табыс әкелген, деп еске салады Reuters. Сарапшының мәліметінше, OpenAI-пен серіктестіктен түсетін кіріс 2026 жылдың екінші жартысы мен 2029 жылдар аралығында компанияның қаржылық нәтижелерінде көрініс таба бастайды.
Жасанды интеллект саласындағы келісімдерде ірі сома аталғанымен, инвесторлар мұндай жобалардың пайда көрсеткішіне барған сайын көбірек назар аудара бастады. Дегенмен, Бен Райтзес бұл жөнінде алаңдауға себеп жоқ деп есептейді, тіпті келісімнің рентабельділігі Broadcom-ның басқа бизнес бағыттарымен салыстырғанда төмен болса да.
«Егер мәміленің маржасы төмен болса, біз оған таңғалмаймыз, — деді сарапшы. — Бірақ акцияға шаққандағы пайда мен табыстың күтілетін өсімін ескерсек, бұл тәуекел айтарлықтай емес».
OpenAI-пен келісім туралы хабардан кейін Broadcom акциясы 13 қазанда 10% күрт өсті. Алайда, 14 қазанда котировка құлап, мәтін жарияланған сәтте 2,7% төмендеген.
Басқа да сарапшылар пікірі
OpenAI-пен мәміле аясында бірнеше талдау компаниялары мен банктер Broadcom акциясының мақсатты бағасын жаңартты. Deutsche Bank таргетті $400-ға дейін көтеріп, бұл 13 қазандағы жабылу бағасымен салыстырғанда 12%-дық өсу әлеуетін білдіретінін атап өтті және «сатып алу» ұсынысын растады. Investing.com мәліметінше, банк жетекші ЖИ-стартаппен серіктестік компанияға $100 млрд табыс әкеледі деп күтеді.
Mizuho да мақсатты бағаны $430-ға дейін көтерді, бұл ағымдағы котировкалардан 20% жоғары. Сарапшылар OpenAI-пен ынтымақтастықтан түсетін табысты $150–200 млрд шамасында бағалады.
MarketWatch дерегінше, Уолл-стрит сарапшыларының басым бөлігі Broadcom акциясын сатып алуға кеңес берді — мұндай ұсынымдардың саны 45-ке жеткен. Тек төрт сарапшы бейтарап позицияда, ал «сату» бойынша ұсыныс жоқ.
Контекст
Broadcom сейсенбі күні Thor Ultra деп аталатын жаңа желілік чипті таныстырды. Ол компанияларға деректі өңдеуге арналған жүздеген мың процессорды біріктіріп, жасанды интеллект жүйелерін құруға мүмкіндік береді, деп хабарлайды Reuters. Өнім Nvidia-ның желілік интерфейс чиптерімен бәсекелесе алады және ЖИ-қосымшаларға арналған дата-орталықтар ішіндегі желілік байланыстарды бақылауда Broadcom позициясын күшейтеді, деп атап өтті агенттік.
