Melius неге Broadcom акциялары құлдырайды деп санайды
Melius сарапшылары Broadcom есеп бергеннен кейін акциялары төмендеуі мүмкін деп болжады. Себебі нарықтың күтуі тым жоғары, дәл осындай жағдай бұған дейін Nvidia-да болған. Дегенмен, олар Broadcom акцияларының мақсатты бағасын көтеріп, «сатып алу» ұсынымын растады. Melius пікірінше, Broadcom жасанды интеллект саласындағы міндетті акция болып қала береді, сондықтан кез келген төмендеуді сатып алуға мүмкіндік ретінде қолдануға ниетті.
Егжей-тегжейі
Melius талдаушысы Бен Ритцес бастаған топ Broadcom акцияларының екі жылдық бағасын 305 доллардан 335 долларға көтерді және 4 қыркүйекте шығатын есеп алдында «сатып алу» ұсынымын сақтап қалды. Жаңа мақсатты баға 2 қыркүйектегі жабылу құнынан тағы 12 пайыздан астам өсу әлеуетін көрсетеді.
Ритцестің айтуынша, Broadcom үшін күтілімді ақтау қиын болуы мүмкін. Компания 2025 жылы жасанды интеллекттен түсетін кірісті 60 пайызға арттыруды жоспарлап қойған, бұдан жоғары өсімге жету шындыққа жанаса бермейді. Бұған дейін Nvidia мен Marvell есеп жариялап, жақсы көрсеткіш көрсетсе де, акциялары төмендеген еді. Broadcom да осындай тәуекелге тап болуы ықтимал.
Соған қарамастан, Melius Broadcom толық қуатта жұмыс істеп жатқанын айтады және сондықтан кез келген төмендеуді сатып алуға ыңғайлы сәт деп бағалайды.
Broadcom артықшылықтары
Melius пікірінше, Broadcom Nvidia-ға жақын ерекше жағдайда тұр. Егер Nvidia деректер орталықтары сегментінде жылына 50 пайыз өсімге қол жеткізсе, Broadcom ЖИ кірісін 60 пайызға арттыруы мүмкін: соңғы тоқсанда 5,1 млрд доллардан асып, алдағы жылы 30 млрд долларға жетеді.
Broadcom чип жобалаушы ретінде жетекші орынға ие, ал оның кірістің үштен бірін беретін желілік шешімдер сегменті ЖИ жеделдеткіштеріне және гиперскейлерлерге арналған процессорларға сұраныс арқасында артық серпін алады.
Melius сарапшысы акциялардың қымбат көрінетінін мойындады, бірақ инвесторлар үш бағыттағы үлеске ие болып отырғанын айтты: чип жобалау, деректер орталықтарына арналған желілік шешімдер және тұрақты табыс әкелетін софт.
Broadcom-ның негізгі клиенттері қатарында Google, Meta және ByteDance бар. Алдағы уақытта OpenAI, Илон Масктың компаниялары, сондай-ақ Arm Holdings пен Apple қосылуы мүмкін. Бұл кірістің 2027 жылдан кейін де өсуін қамтамасыз етеді. Бұған қоса, 2023 жылы сатып алынған VMware компанияның бұлтты және жазылым қызметтері арқылы тұрақты табыс әкеліп отыр.
Басқа пікірлер
Barron’s дерегінше, Broadcom есеп жариялаған соң ЖИ чиптер секторында жаңа драйверге айналуы мүмкін. Инвесторлар тек сұраныс болжамына ғана емес, сонымен қатар компанияның арнайы чиптері Nvidia-дан үлес тартып ала бастаған-бастамағанына назар аударады.
Yahoo Finance хабарлауынша, кейінгі айда сарапшылардың басым бөлігі болжамдарын растады. Кейінгі екі жылда Broadcom тек екі рет Уолл-стрит күткен кірісті ақтамаған. TipRanks дерегінше, консенсус болжам бойынша компания бір акцияға 1,66 доллар пайда жариялайды, бұл былтырғыдан (1,24 доллар) жоғары. Жылдық табыс шамамен 21 пайызға өсіп, 15,83 млрд долларға жетуі мүмкін. Оның ішінде жартылай өткізгіш сегментінен 9,1 млрд доллар түсім күтіледі.
3 қыркүйекте Broadcom акциялары 2 пайызға өсіп, 304,4 долларға жетті. Жыл басынан бері өсім 30 пайыз болды. Ал S&P 500 индексі осы кезеңде 9,3 пайызға ғана көтерілді.
90 пайыздан астам сарапшылар Broadcom акцияларын сатып алуды ұсынады. Уолл-стриттің орташа мақсатты бағасы 309,5 доллар, бұл қазіргі бағадан тағы 4 пайыз өсу әлеуетін білдіреді.
