Deutsche Bank 2026 жылға арналған S&P 500 бойынша ең жоғары болжамды жариялады
Deutsche Bank-тың болжамынша S&P 500 индексі 2026 жылдың соңына қарай 8000 тармаққа жетуі мүмкін. Бұл — қазіргі деңгейден шамамен 17% өсім. Мұндай оптимизмнің негізгі себебі — экономиканы да, қаржы нарықтарын да жылдам өзгертіп жатқан ЖИ-бум. Дегенмен, әлеуеті жоғары болғанымен, ЖИ-көпіршік қаупі толық жойылған жоқ.
HSBC, JPMorgan, Wells Fargo сияқты өзге ірі банктер де оптимистік көзқараста, бірақ Deutsche Bank берген таргет — Уолл-стриттегі ең жоғарысы.
Егжей-тегжейлі
Yahoo Finance жазғандай, Deutsche Bank S&P 500-ге 2026 жылдың соңына арналған жаңа мақсатты — 8000 тармақ деңгейінде белгіледі.
Банк бұл өсімді бірнеше фактор қолдайды деп сенеді: капитал ағынының жалғасуы, компаниялардың акцияларын кері сатып алуы, корпоративтік табыстың тұрақты өсуі.
FactSet дерегіне сәйкес S&P 500 компанияларының табысы үшінші тоқсанда 13,4% өсті — бұл нарық көңілінен шығып отыр.
Стратег Бинки Чадханың командасы:
«2026 жылы біз табыстың сенімді өсуін және компания бағаларының жоғары деңгейде қалуын күтеміз», — деп атап өтті.
Басқа аналитиктер не дейді?
Deutsche Bank-тың таргеті — Уолл-стриттегі ең жоғары көрсеткіш.
HSBC: S&P 500 → 7500 тармақ (өсім әлеуеті ~10%).
Банк ЖИ-ға инвестициялар корпоративтік табысты әрі қарай да қолдайды деп санайды, бірақ төмен табысты тұтынушыларға қысым күшейіп отыр.HSBC-дің пікірінше 2025 жыл — тарифтер, миграциялық шектеулер және геосаяси белгісіздік жылы, ал 2026 жыл экономиканың әркелкі өсуімен сипатталады.
JPMorgan: индекс 7500-ге жетуі мүмкін, ал ФРЖ мөлшерлемені тағы төмендетсе, 8000-ге дейін өрлеу ықтималдығы бар.
Олар ФРЖ екі рет мөлшерлемені төмендетеді деп күтеді.
CME FedWatch-тың дерегінше желтоқсандағы мөлшерлеме қысқару ықтималдығы — 85% (бір апта бұрын — 30%).JPMorgan стратегі Дубравко Лакош-Буйас:
«ЖИ-көпіршігі қаупіне қарамастан, бағалар негізді. Нарық табыстың трендтен жоғары өсуін, ЖИ-инфрақұрылымға инвестицияның артуын және акционерлік төлемдердің көбеюін ескеріп отыр».
Morgan Stanley де күшті өсім күтеді: олардың бағалауынша, S&P 500 индексі 2026 жылдың соңында 7800 тармақ деңгейінде аяқталуы мүмкін (+14%). Стратег Майк Уилсон қазіргі жағдайды S&P 500 үшін «жаңа бұқа нарығы» деп атап, «жүзетін рецессия» жыл басында аяқталды, ал саясат тарапынан да, корпоративтік табыстар жағынан да қолдау әлі сақталып отырғанын айтты.
Сонымен қатар Yahoo Finance жазғандай, аналитикалық топтардың көбі бұқа нарығының келесі фазасы әлі аяқталмағанын айта бастады. Бұл пікірді Wells Fargo да қолдайды: банк алдағы 12 айда акциялар екі таңбалы өсім көрсетеді деп күтеді және 2026 жылдың соңына арналған мақсатты 7800 пункт деңгейінде белгілеп отыр.
Wells Fargo-ның болжамынша, 2025 жылы нарық екі кезеңді ралли көрсетеді: ең алдымен жылдың басында — рефляцияға үміт сценарийі ойнайды; екінші кезекте жылдың екінші жартысында — өсімді ЖИ-бумның жаңа толқыны жеделдетеді.
