Доллар әлсіреп жатыр: нарық неге қарсы?
Bloomberg Dollar Spot индексі — доллардың негізгі әлемдік валюталарға қатысты қозғалысын көрсететін көрсеткіш — жыл басынан бері шамамен 8%-ға төмендеді. 23 желтоқсанда индекс қазан айының басынан бергі ең төменгі деңгейге түсті. Бұл 2025 жыл доллар үшін 2017 жылдан бергі ең нашар жыл болуы мүмкін екенін көрсетеді, деп жазады Bloomberg.
Опциондар нарығындағы сигналдар да доллардағы қысым 2025 жылдың соңғы сауда сессияларында да, одан кейін де сақталуы мүмкін екенін аңғартады.
Егжей-тегжейлі
Bloomberg-тің дерегінше доллар соңғы сегіз жылдағы ең әлсіз нәтижемен жылды аяқтауы мүмкін. 2025 жылдың басынан бері Bloomberg Dollar Spot индексі, яғни АҚШ долларының негізгі әлемдік валюталар қоржынына қатысты қозғалысы, шамамен 8%-ға төмендеді.
23 желтоқсанда индекс сәттік түрде тағы 0,4%-ға құлдырап, қазан айының басынан бергі ең төменгі деңгейге жетті.
Кейінірек, 23 желтоқсанда, АҚШ экономикасының 2025 жылдың үшінші тоқсанында жылдам өскенін көрсететін статистика жарияланған соң, индекс төмендеуінің бір бөлігі қайта қалпына келді. Агенттік атап өткендей, нақты ЖІӨ жылдық есеппен 4,3%-ға өсті, бұл сарапшылар күткен деңгейден жоғары болды.
Алайда осы оң деректерге қарамастан, Bloomberg атап өткендей, опциондар нарығы трейдерлердің доллардың одан әрі әлсіреуіне ставка жасап отырғанын көрсетеді. Бұл үрдіс 2025 жылдың соңында ғана емес, кейінгі кезеңде де жалғасуы мүмкін.
Нарықтағы көңіл күйді көрсететін risk reversals индикаторы соңғы үш айда доллар бойынша ең пессимистік көзқарас қалыптасқанын білдіреді. Соңғы сауда сессияларында доллардан бас тартудың негізгі құралдары ретінде еуро мен австралиялық доллар таңдалған. Бұл АҚШ-тың Депозитарлық-клирингтік корпорациясының (DTCC) деректерімен расталады.
Долларға қысым жасап отырған факторлар
Bloomberg-тің жазуынша долларға ең алдымен Федералдық резерв жүйесінің пайыздық мөлшерлемелерді одан әрі төмендетуі мүмкін деген күтілімдер әсер етіп отыр. Ал басқа ірі орталық банктер керісінше, жұмсарту циклін аяқтауға жақын.
Қосымша теріс фактор — маусымдық әсер: желтоқсан айында доллар әдетте әлсірейді. Соңғы бір айдың өзінде американдық валюта 1%-дан астамға арзандады.
Пессимистік көңіл күй АҚШ-тың Тауарлық фьючерстермен сауда комиссиясының (CFTC) деректерінен де байқалады. Реттеушінің соңғы мәліметіне сәйкес, 16 желтоқсанға дейінгі аптада алыпсатар трейдерлер доллардан “аюлы” позицияға өтті. Бұл қазан айынан бергі алғашқы жағдай.
Нарық не дейді?
Pioneer Investments өкілі Пареш Упадхьяя: «2026 жылы доллардың төмендеу үрдісі жалғасады деп күтемін, бірақ ол жұмсағырақ әрі бірқалыпты болады», - дейді. Оның айтуынша, бұл сценарийге басты қауіп — АҚШ экономикасының қайтадан «ерекше» қарқынмен өсуі.
«Соңғы тоқсандағы ЖІӨ өсімі дәл осы тәуекелді көрсетіп отыр», — деп қосты ол.
Swissquote компаниясының аға аналитигі Ипек Озкардеская 23 желтоқсанда жариялаған жазбасында: «Доллар бойынша болжам әлі де айтарлықтай негативті», — деп жазды.
Оның сөзінше, қазір долларды қолдайтын «бұқалық» ставкалар өте сирек. Сонымен қатар, бюджеттік тәртіпке қатысты алаңдаушылық пен саудадағы шиеленіс долларды әлсіретіп отыр.
Дегенмен сарапшы ескерткендей, егер алдағы макродеректер нарықты ФРЖ саясатына қатысты анағұрлым «қатаң» көзқарасқа итермелесе, доллар күрт қайта нығаюы мүмкін.
Markets Live макростратегі Кристин Акино да пікір білдірді: «Экономикалық өсім мен акциялар мен облигациялар үшін қолайлы саясаттың қатар жүруі — доллар үшін кері фактор».
Оның айтуынша, доллар әдетте инвесторлар тәуекелден жаппай қашқанда немесе АҚШ экономикасы айқын түрде өзгелерден озып тұрған кезде ғана жақсы нәтиже көрсетеді.
«Егер АҚШ экономикасы қалыпты өсім режимінде қала берсе, бұл факторлар долларды әлсіретуді жалғастырады», — деп түйіндеді ол.
