Deutsche бен Standard доллар үшін әлсіз ай болатынын ескертті. Citi керісінше ойлайды
Deutsche Bank және Standard Bank сарапшылары алдағы апталарда доллар үш түрлі қысымға ұшырап, онсыз да маусымдық әлсіз кезеңді күшейтуі мүмкін деп ескертті. Ал Citigroup стратегтері керісінше, дамушы нарықтардағы инвесторларға доллардың күшеюіне дайын болуға кеңес береді. Валютаға кері әсер еткен тенденциялар 2025 жылдың ортасында-ақ әлсірей бастады, дейді олар.
Неге доллар арзандауы мүмкін?
Standard Bank пікірінше, доллар үш фактордан зардап шегуі мүмкін, деп жазады Bloomberg.
Бірінші — АҚШ Жоғарғы сотының Дональд Трамп енгізген импорттық тарифтерді заңсыз деп тану ықтималдығы.
Екінші — Трамптың Ұлттық экономикалық кеңестің бұрынғы басшысы Кевин Хассетті ФРЖ төрағасы лауазымына ұсынылу мүмкіндігі.
Үшінші — желтоқсанда Жапонияда пайыздық мөлшерлеме көтерілсе, иенаның күрт нығаюы.
Standard Bank валюталық стратегы Стивен Барроудың айтуынша, «Жапониядағы мөлшерлемені көтеру, тарифтер бойынша қолайсыз шешім және Хассеттің ФРЖ төрағасы болуы доллар үшін үш жақтан соққы болуы ықтимал. Бұл биылғы жылдың соңында болмаса да, 2026 жылдың басында әсер беруі мүмкін».
Standard Bank және Deutsche Bank түсіндіруінше, Жапонияда мөлшерлеменің көтерілуі тарихи түрде иенаның, әсіресе доллармен салыстырғанда, күрт нығаюына әкелген. Ал Хассетт пайызды агрессивті төмендетуді қолдайтын тұлға ретінде белгілі. Russell Investments өкілі Ван Лудың айтуынша, «Хассетт басқарса, ФРЖ саясаты одан да жұмсарады», бұл долларды еуромен салыстырғанда төрт жылдық минимумнан да төмендетуі мүмкін (шамамен 1,19 доллар).
Deutsche Bank те жылдың соңында доллар перспективаларына пессимистік сипатта қарайды. Себебі — Жапонияда ақша-несие саясатының қатаю қаупі және басқа елдерде мықты экономикалық көрсеткіштердің жариялануы. Deutsche Bank макростратегі Тим Бейкер Bloomberg-ке берген пікірінде соңғы он жылда желтоқсан «доллар үшін ең әлсіз ай» болғанын айтты. Оның сөзінше, трейдерлер жыл соңында басқа америкалық активтерден түскен пайданы теңестіру үшін долларды жиі сатады. Қазіргі өсім толқыны осы айда бәсеңдеуі мүмкін.
«Біз доллар үшінші тоқсандағы минимумдарға — қазіргі деңгейден шамамен 2% төмен түсуі мүмкін деп санаймыз», — деді сарапшы.
Неге доллар күшеюі мүмкін?
Bloomberg жазғандай, Citi стратегтері Луис Коста бастаған топ мүлде басқа пікірде. Citi пікірінше, долларды әлсіреткен үрдістер жылдың ортасында-ақ бәсеңдей бастаған. Инвесторлардың назары ЖИ саласындағы серпінге және АҚШ-та тарифтердің өсуінен кейін де жаһандық сауда құлдырауының айқын белгілерінің жоқтығына ауысты.
Citi сарапшылары: «Осы екі фактор АҚШ-тың ерекшелік тақырыбының қайта күшеюіне ықпал етті, бұл доллар динамикасын да өзгертті. Егер америкалық акциялар қомақты қайта бағаланбаса, жаһандық нарық осы сценарийде қала береді, ал бұл неғұрлым тұрақты доллар деген сөз», — деп жазды.
Банк бағалауынша, АҚШ экономикасы 2026 жылы тұтынушылық шығындардың артуы есебінен қалпына келуге дайын, «егер әлемнің ЖИ-ге деген қызығушылығы бәсеңдемесе». «2025 жылдың алғашқы жартысындағыдай дамушы елдер валюталарының сол деңгейде өсуін жаһандық макрокөрініс қайталайды деп ойламаймыз», — деді Коста.
