Енді Walmart тауарды ChatGPT арқылы сатады
АҚШ-тағы ең ірі ритейлер Walmart онлайн-сатып алу саласында OpenAI-мен серіктестік орнатқанын хабарлады. Компаниялар ChatGPT жасанды интеллектісіне тауарды тікелей чат-бот интерфейсі арқылы сатып алу мүмкіндігін қоспақ. Бұл жаңашылдық шопингті жылдамырақ әрі жекелендірілген етуі мүмкін, алайда деректердің құпиялығы мен алгоритмдердің сенімділігіне қатысты сұрақтар туындап отыр. Инвесторлар серіктестікті өте жағымды қабылдады — Walmart акциясы рекорд жаңартты.
Егжей-тегжейлі
АҚШ-тағы ең ірі бөлшек сауда ритейлері Walmart сейсенбі күні OpenAI-мен серіктестік туралы келісім жасасқанын хабарлады. Бұл серіктестік сатып алушыларға ChatGPT арқылы тікелей және жылдам сауда жасауға мүмкіндік береді. «Бұл — агенттік коммерцияның жаңа кезеңі. Мұнда жасанды интеллект реактивті әрекеттен проактивтіге, статикалықтан динамикалыққа өтеді. Ол үйренеді, жоспарлайды және болжайды, сатып алушылардың қажеттіліктерін өздері аңғармай тұрып алдын ала түсінуге көмектеседі», — делінген Walmart хабарламасында.
Сатып алу процесі ChatGPT-дің Instant Checkout функциясы арқылы жүзеге асады. Бұл қызмет туралы OpenAI алғаш рет қыркүйек айының соңында жариялаған еді. Walmart келісімнің қаржылық шарттарын ашқан жоқ, алайда CNBC мәліметінше, OpenAI ChatGPT арқылы жасалған әрбір транзакциядан комиссия алмақ. Осылайша, сервис компания үшін жаңа табыс көзіне айналады.
Walmart бас директоры Даг Макмиллон онлайн-сауданың жаңа кезеңі басталғанын атап өтті: «Көп жылдар бойы онлайн-шопинг іздеу жолағы мен ұзын нәтижелер тізіміне ғана тіреліп келді. Енді бәрі өзгереді. Бізді жасанды интеллектке негізделген — мультимедиялық, жекелендірілген және контекстік тәжірибе күтіп тұр», — деді ол.
14 қазандағы саудада Walmart акциясы 5%-дан астам өсіп, $107,7 деңгейінде жаңа рекорд орнатты. 2025 жылдың басынан бері олардың бағасы 19% артқан.
Сарапшылар неліктен риза?
Mizuho сарапшысы Дэвид Беллинджердің айтуынша, Walmart пен OpenAI арасындағы серіктестік — ЖИ-негізделген агенттік сауданы енгізу мен оны кеңінен қабылдаудағы маңызды қадам. Бұл туралы Barron’s хабарлады.
«Walmart бұл жерде айқын алғашқылардың бірі, ал қалғандары әлі де баяу бейімделіп жатыр немесе тіпті ЖИ-боттардың веб-қызметтерге қол жеткізуін шектеуге тырысуда. Біздің ойымызша, осы бағыттағы ерте көшбасшылық мәртебе Walmart-тың негізгі бизнесі — тұтыну тауарлары мен азық-түлік сату көлемін едәуір арттыра алады», — деп жазды Беллинджер.
DA Davidson компаниясының сарапшысы Майкл Бейкер де бұл мәміле дәстүрлі ритейлерлер арасындағы агенттік сауда саласындағы көшбасшылық үшін жарыста Walmart-тың алда тұрғанын дәлелдейді деп атап өтті.
Дегенмен, жасанды интеллект арқылы сатып алу технологиясы тез таралып жатқанымен, қауіптер де бар. NBC News мәліметінше, технология әлі де ақауға бейім, ал дербес деректерді қорғау саласындағы мамандар ЖИ-ассистенттерді пайдалану ритейлерлерге тұтынушылар туралы бұрынғыдан да көп жеке ақпарат жинауға мүмкіндік береді деп ескертеді.
MarketWatch дерегінше, Walmart акциясы бойынша 40 рейтинг бар және олардың басым бөлігі компания қағазын сатып алуға кеңес берді. Buy — 31, Overweight — 8, ал Hold — 1 ғана рейтингін берген. Сарапшылардың орташа мақсатты бағасы — $114,53, бұл соңғы жабылу бағасынан шамамен 12% жоғары.
Контекст
Walmart-пен серіктестік — соңғы апталарда OpenAI жасаған келісімдердің кезектісі. Компания жасанды интеллект пен чип өндіру саласындағы ең ірі серіктестермен ұзақ мерзімді әріптестік орнатты. Бұл келісімдердің көбі «жабық инвестициялар» қағидасына негізделген — яғни ақша айналымы бір топ ірі компаниялардың арасында ғана жүреді, деп жазады NBC News. Сарапшылардың айтуынша, мұндай ішкі құрылым жасанды интеллект бумының алдыңғы қатарында тұрған компаниялардың әлсіз жақтарын жасыруы мүмкін. Алайда, Walmart сияқты сыртқы серіктестермен әріптестік орнату алаңдаушылықты ішінара сейілте алады, дейді телеканал.
