Еуропа автоалыптары АҚШ-пен келісімнен 4 млрд еуро табыс табады. Бірақ тәуекелдер бар
Еуроодақ пен АҚШ арасындағы жаңа сауда келісімі BMW, Mercedes-Benz секілді көлік алыптарының табысын 4 млрд еуроға арттырады. Алайда баж салығының 27,5%-дан 15%-ға төмендеуі саладағы барлық қауіп-қатерді сейілтеді деген сөз емес. Жаңа алымдар көлік компанияларына қысым түсіріп, өндірісті АҚШ-қа көшіру туралы ойлануға мәжбүрлеп отыр.
Егжей-тегжейлі
BMW, Mercedes-Benz және басқа да еуропалық автоконцерндер АҚШ пен Еуроодақ арасындағы сауда келісімі нәтижесінде 4 млрд еуроға (€4,7 млрд) дейін қосымша пайда табады, деп хабарлайды Bloomberg. Келісім аясында ЕО-дан келетін көліктерге салынатын баж салығы 27,5%-дан 15%-ға төмендетіледі.
Оған қоса, BMW мен Mercedes жыл сайын АҚШ-тағы зауыттарынан экспорттайтын шамамен 185 000 көлікке баж салығынан босатылды, деп жазды Bloomberg Intelligence аналитигі Майкл Дин өзінің жазбасында.
«Бұл — бастапқыда өте күрделі көрінген жағдайдан шыққан ең жақсы нәтиже. Неміс пен швед автоконцерндерінің бас директорлары соңғы апталармен салыстырғанда бүгін түнде әлдеқайда тыныш ұйықтайды деп ойлаймын», — деді автосарапшы Маттиас Шмидт жексенбі кешке берген пікірінде.
Дүйсенбі күнгі сауда басталғанда BMW, Mercedes-Benz және Porsche акциялары өсе бастады, алайда кейін өсім тоқтап, төмендеу тіркелді. Мақала жарияланған сәтте бұл компаниялардың акциялары 1,5–2% аралығында арзандап жатты. Volvo акцияларында елеулі өзгеріс болған жоқ.
Жеңілдік пе, әлде жаңа қауіптер ме?
Жаңа баж салығы бұрынғы деңгейден едәуір жоғары — биыл көктемде АҚШ президенті Дональд Трамп сауда соғысын бастағанға дейін бұл көрсеткіш небәрі 2,5% болатын. Салықтың күрт өсуі көлік компанияларына бағаны көтеру немесе өндірісті АҚШ-қа көшіру туралы шешім қабылдауға мәжбүр етеді, деп жазады Bloomberg.
2024 жылы АҚШ еуропалық автоконцерндер үшін ең ірі сыртқы нарыққа айналды — ЕО-тың жалпы автомобиль экспортының 22%-ы осы елге тиесілі, деп хабарлайды Еуропалық автокөлік өндірушілер қауымдастығы (ACEA).
Контекст
Бұл сауда келісімі Mercedes, BMW, Porsche және Volvo үшін маңызды нарықта айқындық орнатты. Трамп сәуір айында жаңа тарифтер енгізетіні туралы хабарлағаннан кейін автоконцерндер миллиардтаған долларлық қосымша шығын мен жеткізу тізбегінің күрделенуі жайлы ескертіп келген. Бірқатар компания өздерінің жылдық қаржылық болжамдарын қайта қарауға немесе төмендетуге мәжбүр болды, деп жазады Bloomberg.
Автомобиль саласы жаһандық жеткізу тізбегінің жоғары деңгейде өзара байланысына және Солтүстік Америкадағы өндірістік қуаттарға қатты тәуелділігіне байланысты тарифтік қысымға ең осал салалардың бірі болып саналады.
