Еуропа мен Киев Украинадағы соғысты тоқтату жоспарының негізгі тармағын қабылдамады
Киевтің ең ықпалды еуропалық одақтастары президент Владимир Зеленскийді қолдап, соғысты аяқтауға арналған АҚШ пен Ресей ұсынған жоспардың негізгі тармақтарын қабылдамады. Бұл жоспар Ресейге елеулі жеңілдіктер беруді қарастырады, деп жазды Bloomberg.
Германия канцлері Фридрих Мерц, Франция президенті Эмманюэль Макрон және Ұлыбритания премьері Кир Стармер жұма күні Зеленскиймен өткізген телефон арқылы сөйлесуде Украина қарулы күштері елдің егемендігін қорғау қабілетін сақтауы тиіс екенін, ал ағымдағы байланыс желісі кез келген бейбіт келіссөздердің бастапқы нүктесі болуы керегін атап өтті, делінген Германия үкіметінің мәлімдемесінде.
«Бұл әңгіме әділ әрі ұзақ мерзімді бейбітшілік туралы. Біз бұл жоспардың кейбір тармақтары осы мақсатқа жетуге көмектесуі мүмкін деп санаймыз. Біз бұл процесті Украинада тұрақты бейбітшілікке жақындататын бағытқа қарай ілгерілетуге конструктивті түрде қатысқымыз келеді», — деді Германия үкіметінің өкілі Штефан Корнелиус жұма күні Берлиндегі журналистерге.
Мерц бұл сөйлесуді АҚШ пен Ресей ЕО мен Украинаның қатысуынсыз дайындаған соғысты тоқтату жоспарына бірлескен жауап әзірлеу үшін ұйымдастырды. Жоспарда 28 тармақ бар, олардың ішінде Украинаның НАТО-ға кірмеуі және аумақтық жеңілдіктер беру сияқты талаптар бар. Financial Times дереккөздерінің айтуынша, Вашингтон Киевке бұл жоспарды қабылдатуға қысым көрсетіп жатыр. Украина президенті Владимир Зеленский Киев «бейбітшілік жоспарының тармақтары бойынша конструктивті, ашық және жедел жұмыс істеуге дайын» екенін мәлімдеді.
Еуропалық көшбасшылар 22 қарашада Оңтүстік Африкада өтетін G20 саммитінің кулуарында да кездесіп, келесі қадамдарды талқылайды, деп хабарлады Bloomberg дереккөздері.
АҚШ пен Ресей соғысты тоқтату талпыныстарында Еуропаны көбіне шетке ысырып қойғанымен, Еуропаның бұл ұсынысқа реакциясы Украинаның келесі қадамын айқындауда шешуші мәнге ие, деп атап өтТі агенттік. Сонымен қатар, Еуропалық одақ АҚШ-тың көмегінің қысқаруы аясында Украина әскери күштерін қолдау үшін шамамен €140 млрд (шамамен $160 млрд) көлеміндегі қаражатты босатуға мүмкіндік беретін механизмді әлі де келісуге тырысып жатыр.
