Еуропа техкомпанияларының акциялары электроникаға баж салығы тоқтаған соң өсті
Трамп осы аптада чип өндірушілеріне қатысты жаңа кедендік баж салығы мөлшерін жарияламақ
14 сәуір, дүйсенбі күні еуропалық технологиялық компаниялардың акциялары күрт өсті. Бұған АҚШ тарапынан Қытайдан импортталатын электроникаға 125%-дық баж салығын уақытша тоқтату туралы шешім себеп болды. Wall Street бұл жаңалықтың басты бенефициарлары ретінде Қытайда өндіріс жүргізетін Apple жеткізушілерін атауда.
Толығырақ
Еуропаның жетекші Stoxx 600 индексі 14 сәуірдегі саудада 2,2%-ға өсті. Әсіресе бағдарламалық жасақтама секторындағы акциялар көш бастады.
Швейцариялық Logitech акциялары 8,8%-ға қымбаттап, өсім көшін бастады.
Британдық Convatec (медициналық технологиялар) бағасы 7%-ға жуық өсті.
Даттық GN Group (аудиотехника өндіруші) акциялары шамамен 6%-ға қымбаттады.
CNBC атап өткендей, технологиялық сектордағы өсім басқа салаларға да оң әсер етті. Мысалы, мұнай-газ секторы — +3,1%, банктер — +3,3%.
Нарыққа не әсер етті?
Жұма күні кешке АҚШ Қытайдан әкелінетін смартфондар, компьютерлер мен өзге де электрониканы (20 тауар санаты) 125%-дық баж салығынан босатты. Сонымен қатар басқа елдерге салынған 10%-дық базалық баж да бұл санаттағы тауарларға уақытша қолданылмайды.
Алайда АҚШ Кеден және шекара қызметі хабарлағандай, Қытайдан келетін тауарларға бұрыннан салынған 20%-дық жалпы баж күші жойылмайды.
Жексенбі күні Truth Social желісінде Дональд Трамп бұл жеңілдік уақытша ғана екенін қадап айтты: «Ешкім бұл жағдайдан жеңіл құтылмайды. Бұл тауарлар жай ғана басқа «тарифтік себетке» ауыстырылады. Біз жартылай өткізгіштер мен электроника жеткізу тізбегінің БАРЛЫҒЫН қарастырамыз».
Bloomberg мәліметінше, Трамп осы аптада чип өндіруші компаниялар үшін жаңа баж мөлшерлемесін жариялайды.
Қытай акциялары қалай жауап берді
Citigroup сарапшысы Кина Вонгтың айтуынша бұл жаңалықтың басты бенефициарлары Apple жеткізушілері болмақ. Себебі қазіргі таңда iPhone-ды жинақтау қуатының 90%-ы және iPad құрылғыларының 80%-ы Қытайда орналасқан.
Сонымен қатар Nvidia-ның жеткізу тізбегіндегі компаниялар да біршама пайда көреді, дегенмен жартылай өткізгіштер секторындағы белгісіздік әлі де сақталып отыр.
Нарықтағы реакция:
Hon Hai Precision Industry (Foxconn) — Тайвандық iPhone жинаушы компания дүйсенбі күнгі саудада 7,8%-ға дейін қымбаттады.
Lenovo (Гонконг) — Нарығының үштен бірі Америкада орналасқан компьютер өндіруші 10%-ға өсті.
LG Innotek (Оңтүстік Корея) — Негізгі табысын Apple-ден түсіретін компонент өндіруші 5,8%-ға өсті.
Luxshare Precision Industry (Қытай) — Түсімінің шамамен 75%-ы Apple-мен байланысты бұл компанияның акциялары 7%-ға дейін көтерілді.
Advantest (Жапония) — Nvidia-ға жеткізуші компания Токио биржасында 5%-ға жуық өсім көрсетті.
АҚШ-тағы фьючерстер де өсуде
АҚШ-тың жетекші қор индекстеріне арналған фьючерстік келісімшарттар 1,1–1,8%-ға дейін өсті. Ең жоғары өсімді технологиялық Nasdaq-100 фьючерстері көрсетті. Сонымен қатар, Apple акциялары премаркетте 6%-ға қымбаттаса, Nvidia котировкалары шамамен 3%-ға көтерілді.
Сарапшылар не дейді
Mizuho Bank-тің экономика және стратегия бөлімінің жетекшісі Вишну Варатан Bloomberg-ке берген пікірінде: «Бұл – белгілі бір деңгейде жеңілдік. Нарық қазір электроникаға қатысты баж салығы 125%-дан төмен болады деп күтуде. Сонымен қатар, компаниялар қойма қорын жинауға мүмкіндік алып отыр. Қысқа мерзімде пайданы Қытай көретін сияқты, бірақ оған бағытталған қысым әлі де сақталуда, – деп ескертті.
Wilson Asset Management портфельдік менеджері Мэттью Хаупттың айтуынша: «Нарық қазіргі шудан алыстап, бұл жағдай келіссөз арқылы шешіледі деп үміттенеді. Нәтижесінде, қазіргі шарттарға қарағанда тиімдірек келісім жасалуы мүмкін. Бірақ, саясаттың жиі өзгеруі мен қарама-қайшы мәлімдемелердің көптігі қысқа мерзімді сауда жүргізуді мүмкін емес етеді», – дейді сарапшы.
